சென்னை அண்ணாசாலையில் செயல்பட்டு வரும் தமிழ்நாடு மின்வாரியத் தலைமை அலுவலகத்தில் இருந்து 34 கணினி சேமிப்பு வட்டுகள் மாயமான சம்பவம் மாநிலம் முழுவதும் பெரும் அதிர்வலைகளை ஏற்படுத்தியுள்ளது. இந்த விவகாரத்தின் பின்னணியில் திட்டமிட்ட சதியும், முக்கிய ஆவணங்கள் மற்றும் தரவுகளை மறைக்கும் முயற்சியும் இருக்கக்கூடும் என்ற சந்தேகங்கள் எழுந்துள்ளன.

இந்தச் சம்பவம் தொடர்பாக விரிவான விசாரணை நடத்தப்பட வேண்டும் என்றும், உண்மைக் குற்றவாளிகளை கண்டறிய உயர்மட்ட புலனாய்வு அவசியம் என்றும் பல்வேறு அரசியல் கட்சிகள் மற்றும் எதிர்க்கட்சி தலைவர்கள் வலியுறுத்தி வந்தனர்.இதையடுத்து, சென்னை காவல் ஆணையரின் உத்தரவின் பேரில் சிந்தாதிரிப்பேட்டை காவலர்கள் வழக்குப்பதிவு செய்து தீவிர விசாரணையை முன்னெடுத்தனர்.

விசாரணையின் போது, மின்வாரியத் தலைமை அலுவலகத்தில் கணினி அமைப்புகளை பராமரிக்கும் பொறுப்பில் இருந்த கோபிநாத் (31) என்பவர் இந்த திருட்டுச் சம்பவத்தில் தொடர்புடையவர் என்பது தெரியவந்தது.தொடர்ந்து மேற்கொள்ளப்பட்ட விசாரணையில், அலுவலகத்தில் இருந்து எடுக்கப்பட்ட 34 சேமிப்பு வட்டுகளையும் அவர் பெங்களூருவில் உள்ள தனியார் கணினி நிறுவனத்திற்கு விற்பனை செய்திருப்பது கண்டறியப்பட்டது.

இதையடுத்து தனிப்படை காவலர்கள் பெங்களூருவுக்கு சென்று அனைத்து சேமிப்பு வட்டுகளையும் மீட்டனர்.அரக்கோணம் அருகே உள்ள வளர்புரம் கிராமத்தைச் சேர்ந்த கோபிநாத், கடந்த ஒரு ஆண்டுக்கு முன்புதான் மின்வாரியத் தலைமை அலுவலகத்தில் பணியில் சேர்ந்திருந்ததாக தெரிவிக்கப்படுகிறது.

கைது செய்யப்பட்ட அவர் பின்னர் சென்னை எழும்பூர் நீதிமன்றத்தில் ஆஜர்படுத்தப்பட்டார். அவரை வருகிற 19-ஆம் தேதி வரை நீதிமன்றக் காவலில் அடைக்க நீதிமன்றம் உத்தரவிட்டதைத் தொடர்ந்து சிறையில் அடைக்கப்பட்டார். மேலும், அவரை மீண்டும் காவலில் எடுத்து விசாரிக்க காவலர்கள் திட்டமிட்டு வருவதாக தகவல்கள் வெளியாகியுள்ளன.

இதற்கிடையில், திருடப்பட்ட சேமிப்பு வட்டுகளை வாங்கியதாகக் கூறப்படும் பெங்களூருவைச் சேர்ந்த கணினி நிறுவன உரிமையாளர் முரளி மனோகரும் கைது செய்யப்பட்டுள்ளார். அவரிடமும் பல்வேறு கோணங்களில் தீவிர விசாரணை நடைபெற்று வருவதாக தெரிவிக்கப்படுகிறது.

இந்நிலையில், தமிழ்நாடு மின்வாரிய சேமிப்பு வட்டு திருட்டு வழக்கு புதிய திருப்பத்தை எட்டியுள்ளது. சென்னை காவல்துறை அளித்த பரிந்துரையைத் தொடர்ந்து, இந்த வழக்கு சிபிசிஐடி விசாரணைக்கு மாற்றப்பட்டுள்ளது.

இதன்மூலம் வழக்கின் புலனாய்வு மேலும் தீவிரமடைந்துள்ளதுடன், இந்த திருட்டின் பின்னணியில் உள்ள உண்மையான காரணங்கள் மற்றும் சாத்தியமான தொடர்புகள் குறித்து விரிவான தகவல்கள் வெளிச்சத்துக்கு வரும் என்ற எதிர்பார்ப்பு அதிகரித்துள்ளது.