தமிழகத்தில் கோடை விடுமுறை முடிந்து புதிய கல்வியாண்டு தொடங்கவுள்ள நிலையில், பள்ளி மற்றும் கல்லூரி மாணவர்கள் எவ்வித சிரமமுமின்றிப் பயணம் செய்ய ஏதுவாகப் பேருந்துகளில் இலவசப் பயணம் மேற்கொள்ளலாம் என்று தமிழ்நாடு அரசு அதிகாரப்பூர்வமாக அறிவித்துள்ளது.

பள்ளி மாணவர்களுக்கான வழிமுறைகள்:

மாண்புமிகு தமிழ்நாடு முதலமைச்சர் திரு. சி. ஜோசப் விஜய் அவர்களின் உத்தரவிற்கிணங்க, வரும் 04.06.2026 முதல் பள்ளிகள் திறக்கப்பட உள்ளன.

சீருடை ஒன்றே போதும்: 2026-27 கல்வியாண்டிற்கான புதிய கட்டணமில்லா பேருந்து பயண அட்டை (Bus Pass) மாணவர்களின் கல்வி நிறுவனங்களிலேயே வழங்க ஏற்பாடுகள் செய்யப்பட்டு வருகின்றன.

இலவசப் பயணம்: இந்த அட்டை வழங்கும் வரையிலான இடைப்பட்ட காலத்தைக் கருத்தில் கொண்டு, பள்ளி மாணவ/மாணவியர்கள் தங்களது பள்ளிச் சீருடையை (Uniform) அணிந்து, எவ்வித சிரமமுமின்றித் தங்களது இருப்பிடத்திலிருந்து பயிலும் பள்ளி வரை அரசுப் பேருந்துகளில் கட்டணமின்றிச் சென்று வர அனுமதிக்கப்படுகிறார்கள்.

கல்லூரி மாணவர்களுக்கான நடைமுறை:

பள்ளிகளைத் தொடர்ந்து அரசு கலை மற்றும் அறிவியல் கல்லூரிகள், அரசு பலதொழில்நுட்பக் கல்லூரிகள் (Polytechnic), மற்றும் அரசு தொழிற்பயிற்சி நிலையங்கள் (ITI) ஆகியவை அடுத்தடுத்து திறக்கப்பட உள்ளன. இம்மாணவர்கள் தங்களது கல்வி நிறுவனங்களால் வழங்கப்பட்ட பழைய அடையாள அட்டையை (ID Card) நடத்துநரிடம் காண்பித்து, பேருந்துகளில் கட்டணமில்லாமல் எவ்வித சிரமமுமின்றிப் பயணிக்கலாம் எனப் போக்குவரத்துத் துறை அமைச்சர் திரு. ஆ. விஜய் தமிழன் பார்த்திபன் தெரிவித்துள்ளார்.

போக்குவரத்துத் துறைக்குக் கடுமையான உத்தரவுகள்:

மாணவர்களின் பாதுகாப்பான பயணத்தை உறுதி செய்யும் பொருட்டுப் போக்குவரத்துத் கழக ஓட்டுநர்கள் மற்றும் நடத்துநர்களுக்குச் சில முக்கிய அறிவுறுத்தல்கள் வழங்கப்பட்டுள்ளன:

சிறப்புக் கண்காணிப்புக் குழு: பள்ளி துவங்கும் மற்றும் முடியும் நேரங்களில் பேருந்துகள் சரியாக இயங்குவதைக் கண்காணிக்கப் போக்குவரத்துத் கழக அலுவலர்கள் அடங்கிய தனிக் குழுக்கள் நியமிக்கப்பட்டுள்ளன.

பாதுகாப்பான இயக்கம்: பேருந்து நிறுத்தங்களில் பேருந்துகளைச் சரியாக நிறுத்தி, மாணவ/மாணவியர்களைப் பாதுகாப்பாக ஏற்றி, இறக்கிச் செல்ல வேண்டும் என ஓட்டுநர்கள் மற்றும் நடத்துநர்களுக்குத் தக்க அறிவுரைகள் வழங்கப்பட்டுள்ளன.