அதிமுக பொதுக்குழுவில் உணர்ச்சி பொங்கும் தருணம்! கரூர் 41 பலி உட்பட பலருக்கு இரங்கல்...!

சென்னை வானகரத்தில் அதிமுக தலைமையில் நடைபெற்ற செயற்குழு–பொதுக்குழு கூட்டத்தில், மறைந்த தலைவர்களுக்கும் நிர்வாகிகளுக்கும் அஞ்சலி செலுத்தும் இரங்கல் தீர்மானம் நிறைவேற்றப்பட்டது.

இந்த தீர்மானத்தை முன்னாள் அமைச்சர் செம்மலை வாசித்து அறிவித்தார்.இந்த இரங்கல் தீர்மானத்தில், திமுக முன்னாள் தலைவர் கலைஞர் கருணாநிதியின் மூத்த மகனும், சமீபத்தில் மறைந்தவருமான மு.க. முத்துவுக்கு முக்கியமான அஞ்சலி இடம் பெற்றது.

மேலும், கரூரில் நடைபெற்ற தவெக கூட்ட நெரிசலில் உயிரிழந்த 41 பொதுமக்கள், மறைந்த முன்னாள் முதலமைச்சர் எம்.ஜி.ஆரின் நீண்டகால உதவியாளர் மகாலிங்கம், தமிழ் திரைப்பட உலகின் மூத்த நட்சத்திரம் சரோஜாதேவி, நாகாலாந்து மாநில ஆளுநராக பணியாற்றிய இல. கணேசன் ஆகியோருக்கும் இரங்கல் தெரிவிக்கப்பட்டது.

மேலும், தீர்மான வாசிப்புக்குப் பிறகு, பொதுச்செயலாளர் எடப்பாடி பழனிசாமி தலைமையில் முழுக் கூட்டமும் எழுந்து நின்று 2 நிமிட மவுன அஞ்சலி செலுத்தியது. கூட்டத் தொடக்கத்தை உணர்ச்சி பொங்கச் செய்த இந்த நிகழ்வு, அரங்கில் ஒரு சில நிமிடங்கள் முழுமையான அமைதியை உருவாக்கியது.