இன்றைய நவீன வாழ்க்கை முறையில் ஆரோக்கியமான உணவுப் பழக்கத்திற்கும், வீட்டுத் தோட்ட வளர்ப்பிற்கும் மக்கள் மத்தியில் அதிக வரவேற்பு உருவாகி வருகிறது. குறிப்பாக, சமையலறையில் பயன்படுத்தப்பட்ட பிறகு வீணாக தூக்கி எறியப்படும் காய்கறி மற்றும் மூலிகைத் தண்டுகளை மீண்டும் பயன்படுத்தி புதிய செடிகளை வளர்ப்பது சுற்றுச்சூழலுக்கும், பொருளாதாரத்திற்கும் பயனளிக்கும் சிறந்த பழக்கமாக மாறியுள்ளது.சிறிய முயற்சியிலேயே வீட்டை பசுமையாக்கும் சில எளிய மூலிகை வளர்ப்பு முறைகள் தற்போது நகர்ப்புற வீடுகளிலும் வேகமாக பிரபலமாகி வருகின்றன.

துளசி – ஆரோக்கியத்தையும் அமைதியையும் தரும் செடி
துளசி ஒரு மருத்துவ குணமிக்க புனித மூலிகையாக கருதப்படுகிறது. துளசி தண்டை வெட்டி தண்ணீரில் வைத்தால் விரைவாக வேர்கள் உருவாகும். பின்னர் சத்துமிக்க மண்ணில் நட்டால் செடி நன்றாக வளர தொடங்கும்.அதிகாலை சூரியஒளி கிடைக்கும் இடத்தில் வைத்தால் துளசி செழித்து வளரும். வீட்டின் காற்றை தூய்மைப்படுத்துவதிலும், உடல்நலத்தை பாதுகாப்பதிலும் துளசி முக்கிய பங்காற்றுகிறது.

புதினா – ஒரு சிறிய தண்டு, நிறைய நறுமணம்
புதினா மிக வேகமாக பரவி வளரும் மூலிகைச் செடியாகும். கடையில் வாங்கிய புதினா கட்டிலிருந்து இலைகளை பிரித்த பிறகு எஞ்சும் தண்டுகளை வீணாக்காமல் பயன்படுத்தலாம். அந்த தண்டுகளை ஒரு சிறிய பாத்திரத்தில் தண்ணீர் நிரப்பி சூரியஒளி படும் இடத்தில் வைத்தால் சில நாட்களிலேயே புதிய வேர்கள் முளைக்க தொடங்கும்.பின்னர் அவற்றை மண் மற்றும் இயற்கை உரம் கலந்த தொட்டியில் நட்டால் புதினா செழிப்பாக வளர ஆரம்பிக்கும். வாரத்திற்கு இரண்டு முறை இயற்கை உரம் சேர்த்தால் அடர்த்தியான பசுமை கிடைக்கும்.

கொத்தமல்லி – வீட்டிலேயே மணமூட்டும் பசுமை
கொத்தமல்லி தண்டின் அடிப்பகுதியில் இருக்கும் சிறிய வேர் பகுதியை தனியாக வெட்டி மண் கலவையில் நட்டால் புதிய இலைகள் விரைவாக வளர தொடங்கும். தினமும் அளவான தண்ணீர் தெளிப்பதன் மூலம் ஆரோக்கியமான வளர்ச்சி கிடைக்கும்.அதிக வெயில் படாத இடத்தில் வைத்தால் கொத்தமல்லி நீண்ட நாட்கள் பசுமையாக இருக்கும். சமையலில் இயற்கையான நறுமணத்தை சேர்க்க இது மிகவும் உதவிகரமாக அமைகிறது.

வெங்காயத்தாள் – தண்ணீரிலேயே முளைக்கும் அதிசயம்
வெங்காயத்தின் கீழ்ப்பகுதியில் இருக்கும் வெள்ளை நிற வேர் பகுதியை மட்டும் வெட்டி ஒரு சிறிய கிண்ணத்தில் தண்ணீரில் வைத்தால் சில நாட்களிலேயே பச்சை நிற தாள்கள் முளைக்க தொடங்கும்.பின்னர் மண்ணில் மாற்றி நட்டால் தொடர்ந்து வளர்ச்சியடைந்து சமையலுக்குத் தேவையான புதிய வெங்காயத்தாளை வீட்டிலேயே பெற முடியும். சூப், சாலட் மற்றும் நூடுல்ஸ் வகைகளில் இது சுவையையும் நறுமணத்தையும் அதிகரிக்கிறது.

செடிகள் செழிக்க தேவையான பராமரிப்பு
மூலிகைச் செடிகளை வளர்க்கும்போது அளவான தண்ணீர் ஊற்றுவது மிகவும் அவசியம். அதிகப்படியான நீர் வேர்களை அழுகச் செய்யக்கூடும். காய்கறி கழிவுகள் மூலம் தயாரிக்கப்படும் இயற்கை உரங்கள் மற்றும் கம்போஸ்ட் பயன்படுத்தினால் செடிகள் ஆரோக்கியமாக வளரும்.மேலும், மிதமான சூரியஒளியும் நல்ல காற்றோட்டமும் கிடைக்கும் இடத்தில் தொட்டிகளை வைப்பது வளர்ச்சிக்கு மிகவும் ஏற்றதாகும்.

சமையலறை கழிவிலிருந்து பசுமையான வாழ்க்கை
சமையலறை கழிவுகளை மீண்டும் பயன்படுத்தி மூலிகைகள் வளர்ப்பது சுற்றுச்சூழலை பாதுகாக்கும் சிறந்த பழக்கமாக பார்க்கப்படுகிறது. இதன் மூலம் குப்பைகள் குறைவதோடு, வீட்டிலேயே ரசாயனமில்லாத புதிய கீரைகள் மற்றும் மூலிகைகளை பெற முடிகிறது.சிறிய இடம் இருந்தாலே போதும்; குறைந்த செலவில் வீட்டை பசுமையாக்கும் இந்த இயற்கை முயற்சி தற்போது நகர வாழ்க்கையிலும் புதிய மாற்றத்தை உருவாக்கி வருவதாக தெரிவிக்கப்பட்டுள்ளது.