மனைவியை கொலை செய்த வழக்கில் கைதாகி, நீதிமன்ற விசாரணைக்குப் பிறகு சிறைக்கு அழைத்துச் செல்லப்பட்டபோது காவலர்களை ஏமாற்றி தப்பியோடிய கைதி, மீண்டும் சிக்கிய சம்பவம் ராமநாதபுரம் மாவட்டத்தில் பரபரப்பை ஏற்படுத்தியுள்ளது.ராமநாதபுரம் மாவட்டம் பரமக்குடியைச் சேர்ந்தவர் திருப்பதிகுமார், 41.

இவர் தனது மனைவியை கொலை செய்த வழக்கில் கைது செய்யப்பட்டிருந்தார்.இந்த வழக்கு தொடர்பாக நீதிமன்றத்தில் விசாரணை நடைபெற்றது.

விசாரணை முடிந்ததும் திருப்பதிகுமாரை சிறையில் அடைப்பதற்காக காவலர்கள் அழைத்துச் சென்றனர்.சிறைக்கு அழைத்துச் செல்லப்பட்டுக் கொண்டிருந்தபோது, எதிர்பாராத விதமாக காவலர்களின் பிடியில் இருந்து திருப்பதிகுமார் தப்பியோடினார்.இதனால் அதிர்ச்சியடைந்த காவலர்கள், தப்பிய கைதியை பிடிக்க தீவிரமாக தேடுதல் பணியில் ஈடுபட்டனர்.

பரமக்குடி மற்றும் அதன் சுற்றுவட்டாரப் பகுதிகளில் தேடுதல் தீவிரப்படுத்தப்பட்டது.இந்நிலையில், தலைமறைவாக இருந்த திருப்பதிகுமாரை காவலர்கள் பரமக்குடியில் மீண்டும் கைது செய்தனர். பின்னர் அவரை உரிய நடைமுறைகளுக்குப் பிறகு சிறையில் அடைத்தனர்.

கைதி தப்பிய சம்பவத்தில் பணியில் கவனக்குறைவாக செயல்பட்டதாக கூறப்படும் துணை ஆய்வாளர் தினகரன் மற்றும் தலைமைக் காவலர் நீலாவதி ஆகியோர் ஏற்கனவே பணியிடைநீக்கம் செய்யப்பட்டுள்ளனர்.

மனைவி கொலை வழக்கில் கைதாகி சிறைக்கு அழைத்துச் செல்லப்பட்டபோது தப்பியோடிய கைதி, மீண்டும் அதே பகுதியில் பிடிபட்ட சம்பவம் அப்பகுதியில் பரபரப்பை ஏற்படுத்தியுள்ளது.