சென்னையில் நேற்று நடந்த அடுத்தடுத்த சாலை விபத்துகளில் 3 பேர் உயிரிழந்தனர். குறிப்பாக, தான் பணியாற்றிய மருத்துவமனையின் வேன் மோதி அதே மருத்துவமனையின் செவிலியர் ஒருவர் பலியான சம்பவம் பெரும் சோகத்தை ஏற்படுத்தியுள்ளது.

செவிலியர் பலி: பெரம்பூரைச் சேர்ந்த தீபிகா (22) ஆயிரம் விளக்கு பகுதியில் உள்ள தனியார் மருத்துவமனையில் செவிலியராகப் பணியாற்றி வந்தார். நேற்று காலை பணிக்குச் சென்றபோது, ஓட்டேரி திடீர் நகர் அருகே அவர் ஓட்டிச் சென்ற இருசக்கர வாகனம் மீது வேனொன்று மோதியதில் சம்பவ இடத்திலேயே அவர் உயிரிழந்தார்.

அதிர்ச்சித் தகவல்: காவல் துறையின் விசாரணையில், தீபிகா பணியாற்றிய அதே மருத்துவமனையின் ஊழியர்களை ஏற்றிச் செல்லும் வேன் தான் அவர் மீது மோதியது என்பது தெரியவந்தது. வேன் ஓட்டுநர் சீனிவாசன் கைது செய்யப்பட்டார்.

மேலும் இரு விபத்துகள்

தரமணி: தரமணியைச் சேர்ந்த லோகேஸ்வரன் (27), நேற்று அதிகாலை நண்பருடன் இருசக்கர வாகனத்தில் 100 அடி சாலையில் சென்றபோது, வாகனம் கட்டுப்பாட்டை இழந்து சாலைத் தடுப்புச் சுவரில் மோதியதில் அவர் தலையில் பலத்த காயமடைந்து உயிரிழந்தார். நண்பர் மணிகண்டன் மருத்துவமனையில் சிகிச்சை பெற்று வருகிறார்.

நீலாங்கரை: நீலாங்கரை வட்டாரப் போக்குவரத்து அலுவலகம் அருகே அடையாளம் தெரியாத கார் மோதியதில் 50 வயது மதிக்கத்தக்க நபர் ஒருவர் உயிரிழந்தார்.