தெற்கு ரெயில்வே வெளியிட்டுள்ள செய்திக்குறிப்பின் படி – சென்னையில் பொதுப் போக்குவரத்து சேவைகள் அனைத்தையும் ஒரே குடைச்சாயலில் கொண்டு வரும் வகையில், “சென்னை ஒன்று” என்ற புதிய செயலியை முதலமைச்சர் மு.க. ஸ்டாலின் கடந்த 22-ந்தேதி அறிமுகம் செய்தார்.

இந்த செயலியின் மூலம், பஸ், மெட்ரோ ரெயில், புறநகர் மின்சார ரெயில், வாடகை ஆட்டோ, கார் போன்ற பல்வேறு போக்குவரத்துகளுக்கு ஒரே க்யூ-ஆர் டிக்கெட் மூலம் பயணிக்கலாம். அதாவது, ஒரு மொபைல் ஆப் – பல பயண வசதிகள் என்ற முறையில், பயணிகளுக்கு மிகுந்த சுலபம் ஏற்படுகிறது.

இந்த செயலியின் வாயிலாக புறநகர் மின்சார ரெயிலில் டிக்கெட் எடுக்கலாம்.ஏற்கனவே பயணிகள் பயன்படுத்தி வந்த UTS ஆப் போலவே, இதையும் பயன்படுத்த முடியும்.ரெயில் கட்டணத்தில் எந்த மாற்றமும் இல்லை.

ஆனால், கவனிக்க வேண்டிய விஷயம் என்னவென்றால் – ஏ.சி. மின்சார ரெயிலுக்கான டிக்கெட்டுகள் இதில் கிடைக்காது.டிக்கெட் பரிசோதனையின்போது, பயணிகள் “அசல் ரெயில் டிக்கெட் காட்டு” பக்கத்தை திறந்து காட்ட வேண்டும்.

டிக்கெட் ரத்து செய்ய முடியாது.டிக்கெட்டுகளை எடுத்தவுடன் 3 மணி நேரத்துக்குள் பயணம் செய்ய வேண்டும்.

சென்னையில் தினசரி புறநகர் ரெயில் மற்றும் மெட்ரோவில் பயணிக்கும் ஆயிரக்கணக்கான மக்களுக்கு இந்த வசதி மிகுந்த உதவியாக இருக்கும் என்று நம்பப்படுகிறது. ஒரே க்யூ-ஆர் சீட்டு மூலம் பல போக்குவரத்துகளைப் பயன்படுத்தும் வசதி, சென்னையின் போக்குவரத்து முறையை இன்னும் எளிமையாக்கும் என நிபுணர்கள் கருதுகின்றனர்.