தமிழ்நாட்டில் சட்டமன்றத் தேர்தல் இன்னும் ஒரு வருடம் தாமதமாக இருக்கிறது. ஆனால், அரசியல் கட்சிகள் அனைத்தும் தேர்தலை மனதில் வைத்து இப்போதே தங்கள் திட்டங்களை தீட்டி வருகின்றன. இதேவேளை, முன்னாள் முதல்வரும் அதிமுக தொண்டர்கள் உரிமை மீட்புக் குழுவின் ஒருங்கிணைப்பாளருமான ஓ. பன்னீர்செல்வம் (ஓபிஎஸ்) எந்த அணியுடன் இணையப் போகிறார் என்பதே தற்போது அரசியலில் பரபரப்பான கேள்வியாக உள்ளது.

சுதந்திரப் போராட்ட வீரர் மாவீரர் பூலித்தேவன் பிறந்த நாளை முன்னிட்டு, ஓபிஎஸ் தென்காசி மாவட்டம் நெற்கட்டும் சேவலில் உள்ள அவரது சிலைக்கு மாலை அணிவித்து மரியாதை செலுத்தினார்.

அதையடுத்து செய்தியாளர்களிடம் பேசிய அவர், எம்ஜிஆர் – ஜெயலலிதா காலத்திலிருந்து அதிமுக உருவாக்கிய மக்கள் நம்பிக்கையை வலியுறுத்தினார்.“எம்ஜிஆர் தொண்டர்கள் இயக்கமாக உருவாக்கிய அதிமுகவை, ஜெயலலிதா மக்கள் இயக்கமாக மாற்றினார். கல்வி, வேலைவாய்ப்பு, சுகாதாரம், விவசாயம் என அனைத்து துறைகளிலும் புரட்சிகள் நடந்தன. ஆனால் இன்று அதிமுக பிளவுபட்டுள்ளது. பிரிந்திருக்கும் சக்திகள் ஒன்றிணைய வேண்டும். அதற்கான முயற்சியில் நான் இறங்கியுள்ளேன்” – ஓபிஎஸ்.

ஓபிஎஸ், தாம் தேசிய ஜனநாயகக் கூட்டணியில் (NDA) இல்லை என்றும்,“அரசியலின் வரலாற்றைப் பார்த்தால், அனைத்துக் கட்சிகளும் ஒருநாளில் ஒருவருடன் கூட்டணி வைத்திருக்கிறார்கள். எதிர்காலத்தில் எந்தக் கூட்டணி அமையும் என்பதை மக்களே முடிவு செய்வார்கள்”
என்று கூறினார்.

மேலும், விஜய்யின் 'தமிழக வெற்றிக் கழகம்' (தவெக) தொடர்பான கேள்விக்கு அவர்,“விஜய் இப்போது தான் அரசியலுக்கு வந்துள்ளார். தேர்தலில் நின்று வெற்றி பெற்று, பின்னர் என்ன செய்கிறார் என்பதை பார்த்துத்தான் கருத்து சொல்ல முடியும். கூட்டணி குறித்து இதுவரை தவெக சார்பில் யாரும் என்னிடம் பேசியதில்லை. ஆனால் மீண்டும் சொல்கிறேன், எதிர்காலத்தில் எது வேண்டுமானாலும் நடக்கலாம்”
என்று வலியுறுத்தினார்.

முதல்வர் ஸ்டாலின் வெளிநாட்டு முதலீட்டுப் பயணத்தைப் பற்றி பேசிய ஓபிஎஸ்,“அந்தப் பயணம் வெற்றியடைய வேண்டும் என வாழ்த்துகிறேன்”
என்றார்.

மேலும், சமீபத்திய டிஜிபி நியமன விவகாரத்தில்,“சில நிர்வாக காரணங்களால் இப்போது நியமனம் செய்யப்பட்டிருக்கலாம். என்ன நடந்தது எனக்கு தெரியாது. ஆனால் மரபுப்படி சீனியாரிட்டி அடிப்படையில் டிஜிபி நியமனம் செய்யப்பட வேண்டும்”
என்று அவர் கருத்து தெரிவித்தார்.