தமிழக அரசியலில் தற்போது பெரிய அதிர்ச்சியை ஏற்படுத்தியிருப்பது, தமிழக வெற்றிக் கழகத்தின் (TVK) தேர்தல் மேலாண்மை பொதுச் செயலாளர் ஆதவ் அர்ஜுனா குறித்து அவரது உறவினரான சார்லஸ் மார்ட்டின் வெளிப்படுத்திய கருத்துகள்தான்.

தனது குடும்ப தொழிலை கைப்பற்றுவதற்கும், திமுகவின் அரசியல் திட்டத்தின் ஒரு பகுதியாக தவெகவில் நுழைந்ததற்கும் ஆதவ் அர்ஜுனா முயன்றதாக சார்லஸ் மார்ட்டின் கடுமையாக குற்றம்சாட்டியுள்ளார்.

சார்லஸ் மார்ட்டின் கூறியதாவது:“ஆதவ் அர்ஜுனா எங்கள் குடும்பத்தில் சேர்ந்த பிறகு, தொழிலை முழுமையாக கைப்பற்றும் முயற்சியில் இறங்கினார். எங்களது நிறுவனங்களையும், சொத்துகளையும் தன் கட்டுப்பாட்டுக்குள் கொண்டு வர திட்டமிட்டார். இதனால்குடும்பத்திற்குள் பெரிய பிளவு ஏற்பட்டது. எனக்கும் என் தந்தைக்கும் இடையே இரண்டு ஆண்டுகள் பேசாத நிலை ஏற்பட்டது,”என்று அவர் கூறியுள்ளார்.

அதோடு,“அவர் நம்முடைய குடும்பத்தில் பிரிவினையை உருவாக்கியதுபோல், அரசியலிலும் பிரச்சனை கிளப்ப நினைத்தார்,”
என்றும் சார்லஸ் மார்ட்டின் குற்றம்சாட்டியுள்ளார்.

அவரது குற்றச்சாட்டின்படி, ஆதவ் அர்ஜுனா கடந்த காலத்தில் திமுகவின் உள்துறை வியூக வகுப்பாளராக இருந்ததாகவும், அப்போது“முதல்வர் மு.க. ஸ்டாலினின் மருமகன் சபரீசனுக்கும், துணை முதல்வர் உதயநிதி ஸ்டாலினுக்கும் இடையில் முரண்பாடு உருவாக்க முயன்றார்,”என கூறியுள்ளார்.

இதன் காரணமாக திமுக தலைமையினர் அவரை அங்கிருந்து விலக்கி அனுப்பியதாகவும், பின்னர் அவர் விசிகவுடன் இணைந்ததாகவும் சார்லஸ் மார்ட்டின் விளக்கம் அளித்துள்ளார்.

விசிகவில் துணை பொதுச் செயலாளராக இருந்த ஆதவ் அர்ஜுனா, திமுக கூட்டணியில் இருந்த போதும் திமுகவையே கடுமையாக விமர்சித்தது நினைவில் உள்ளது.அதன் பின்னர்,“திருமாவளவனின் உத்தரவை மீறி கட்சியை தன் விருப்பப்படி நடத்த முயன்றார். இதனால் திருமாவளவன் அவரை கட்சியில் இருந்து நீக்க வேண்டிய சூழ்நிலை ஏற்பட்டது,”என்று சார்லஸ் மார்ட்டின் தெரிவித்துள்ளார்.

இப்போது அவர் கூறும் மிக முக்கிய குற்றச்சாட்டு —“ஜான் ஆரோக்கியசாமியையும், ஆதவ் அர்ஜுனாவையும் தவெகவிற்கு அனுப்பியதே திமுக தான்.காரணம், விஜய் தலைமையிலான கட்சி எந்த கூட்டணியிலும் சேராமல் தனியாகப் போட்டியிட வேண்டும் என்பதுதான் திமுகவின் திட்டம்.”

அவர் மேலும் விளக்கினார்:“விஜய் எந்தக் கூட்டணியிலும் சேராமல் தனியாக இருந்தால், திமுகவின் வெற்றி வாய்ப்பு அதிகரிக்கும். இதற்காகவே ஆதவ் அர்ஜுனா தவெகவில் நுழைக்கப்பட்டவர். அவர் விஜயை கூட்டணி அமைக்காமல் வைப்பதே திமுகவின் நோக்கம்,”
என்று சார்லஸ் மார்ட்டின் கூறியுள்ளார்.

தவெகவில் இணைந்த பின்னர் ஆதவ் அர்ஜுனா,“தன்னையே கட்சியின் முக்கிய முகமாக மாற்றிக் கொள்ளும் முயற்சியில் உள்ளார்,”
என்றும் அவர் கூறியுள்ளார்.அவரது நடவடிக்கைகள் கட்சிக்குள் சிலரிடையே எதிர்ப்பையும் ஏற்படுத்தியுள்ளதாகவும் தெரிவிக்கப்படுகிறது.

சார்லஸ் மார்ட்டின் வெளிப்படுத்திய இந்த குற்றச்சாட்டுகள் தற்போது தமிழக அரசியல் வட்டாரங்களில் பெரும் பரபரப்பை ஏற்படுத்தியுள்ளன.ஆதவ் அர்ஜுனா குறித்து இது வரை தவெக அதிகாரப்பூர்வமாக எந்த பதிலும் வெளியிடவில்லை.

எனினும்,“விஜயின் அரசியல் வளர்ச்சியை தடுக்க சில வெளிப்புற முயற்சிகள் நடைபெறுகின்றன,”
என்று தவெக ஆதரவாளர்கள் சமூக வலைதளங்களில் கருத்து தெரிவித்து வருகின்றனர்.

சார்லஸ் மார்ட்டின் வெளிப்படுத்திய “ஆதவ் அர்ஜுனா – திமுக இணைப்பு” குற்றச்சாட்டு,தற்போது தவெக உள்கட்சியிலும், எதிர்க்கட்சிகளிடையிலும் பெரும் அதிர்வலைகளை ஏற்படுத்தியுள்ளது.

அரசியல் வல்லுநர்கள் கூறுவதாவது —“இந்த குற்றச்சாட்டு உண்மையா பொய்யா என்பது வரும் நாட்களில் தெளிவாகும்.
ஆனால் இது தவெக–திமுக–அதிமுக அரசியல் சமன்பாட்டில் புதிய திருப்பத்தை உருவாக்கியுள்ளது,”
என்று அவர்கள் கருத்து தெரிவித்துள்ளனர்.