''பரஸ்பர மரியாதையுடன் பரிச்சயமாக அமைச்சர் சகோதரர் வெங்கட்ரமணனிடம் பேசியதைக்கூட வக்கிரமாகச் சித்தரிப்பதா? அரசியலில் கொள்கை முரண்கள் இருக்கலாம். ஆனால் தனிமனித விரோதத்தை நான் ஒருபோதும் பாராட்டியதில்லை.'' என பாஜக நிர்வாகியும், நடிகையுமான கஸ்தூரி கேள்வி எழுப்பியுள்ளார்.

இது குறித்து அவர் கூறுகையில், காமாலைக் கண்ணனுக்கு கண்டதெல்லாம் மஞ்சள். கஸ்தூரி தவெகவில் இணைகிறார். அது பாஜகவின் பி-டீம் என்றெல்லாம் கதறுபவர்களை தமிழக மக்கள் ஒருபோதும் நம்பப்போவதில்லை. இதன் பின்னணியில் இருக்கும் அரசியல் வயிற்றெரிச்சலை மக்கள் தெளிவாகவே உணர்ந்துள்ளார்கள் என்று ஆதங்கத்துடன் பேசியுள்ளார்.

அத்துடன், பாரதப் பிரதமர் நரேந்திர மோடியின் மக்கள் பணியால் ஈர்க்கப்பட்டு பொதுவாழ்வில் அடியெடுத்து வைத்தவள் நான். எக்காலத்திலும் எனக்கு வழிகாட்டி தமிழ்நாடு பாரதிய ஜனதா கட்சியின் மாநிலத் தலைமை மட்டுமே என்றும், என் மீது முழு நம்பிக்கை வைத்துத் துணை நிற்கும் தலைமைக்கும், தோள் கொடுக்கும் கட்சிச் சொந்தங்களுக்கும் என் நெஞ்சார்ந்த நன்றிகள் என்று தெரிவித்துள்ளார்.

மேலும், ஆயிரக்கணக்கான மக்கள், கேமராக்கள், பிரஸ் நிறைந்த அரங்கத்தில், ஒலிபெருக்கி சப்தத்தில், பரஸ்பர மரியாதையுடன் பரிச்சயமாக அமைச்சர் சகோதரர் வெங்கட்ரமணனிடம் பேசியதைக்கூட வக்கிரமாகச் சித்தரிப்பதா? என்று கடுமையாக கூறியதுடன், அரசியலில் கொள்கை முரண்கள் இருக்கலாம். ஆனால், தனிமனித விரோதத்தை நான் ஒருபோதும் பாராட்டியதில்லை என்று தெரிவித்துள்ளார்.

அத்துடன், நாகரிகமான ஓர் உரையாடலைக்கூட தவறாக சித்தரித்து சாதி, தொழில், பெண்மை, அனைத்தையும் இழிவுப்படுத்தும் கயவர்களின் முயற்சி கீழ்த்தர அவதூறுகளுக்கு அஞ்சமாட்டேன் என்று கஸ்தூரி தெரிவித்துள்ளார்.