மயிலாடுதுறை மாவட்டத்தில் உள்ள வரலாற்றுச் சிறப்புமிக்க நீலகண்டேஸ்வரர் திருக்கோவிலில் இருந்து திருடப்பட்ட 500 ஆண்டுகள் பழமையான ஐம்பொன் சிலைகள், கடல் வழியாக இலங்கைக்கு கடத்தப்பட இருந்த நிலையில், காரைக்காலில் நடைபெற்ற அதிரடி நடவடிக்கையில் மீட்கப்பட்டுள்ளன.

இந்த சம்பவம் சிலைக் கடத்தல் கும்பல்களின் செயல்பாடுகள் குறித்து புதிய பரபரப்பை ஏற்படுத்தியுள்ளது.மணல்மேடு அருகேயுள்ள இலுவப்பட்டு கிராமத்தில் அமைந்துள்ள நீலகண்டேஸ்வரர் திருக்கோவிலில் இருந்து அமிர்தகரவல்லி, சண்டிகேஸ்வரர், அப்பர், மங்களநாயகி ஆகிய ஐம்பொன் சிலைகள் மற்றும் வெண்கல பாவை விளக்கு ஆகியவை கடந்த மாதம் மர்ம நபர்களால் திருடப்பட்டன.

இந்த சம்பவம் குறித்து கோவில் நிர்வாகம் அளித்த புகாரின் அடிப்படையில் மணல்மேடு காவலர்கள் வழக்குப்பதிவு செய்து, குற்றவாளிகளை கண்டறியும் பணியில் தீவிரமாக ஈடுபட்டு வந்தனர்.இந்த சூழலில், திருடப்பட்ட சிலைகள் காரைக்கால் வழியாக கடல் மார்க்கத்தில் இலங்கைக்கு கடத்தப்படவுள்ளதாகவும், தருமபுரம் பகுதியில் உள்ள ஒரு வீட்டில் அவை மறைத்து வைக்கப்பட்டுள்ளதாகவும் உளவுத்துறைக்கு ரகசிய தகவல் கிடைத்தது.

இதையடுத்து காரைக்கால் நகர காவலர்கள் சம்பந்தப்பட்ட வீட்டில் திடீர் சோதனை நடத்தினர்.அந்தச் சோதனையில், வீட்டிற்குள் பாதுகாப்பாக பதுக்கி வைக்கப்பட்டிருந்த ஐந்து சிலைகள் மீட்கப்பட்டன. தொடர்ந்து நடைபெற்ற விசாரணையில், அவை இலுவப்பட்டு நீலகண்டேஸ்வரர் திருக்கோவிலில் இருந்து திருடப்பட்ட அதே ஐம்பொன் சிலைகள்தான் என்பது உறுதி செய்யப்பட்டதாக தெரிவிக்கப்பட்டுள்ளது.

இந்த வழக்கில் தொடர்புடைய தருமபுரத்தைச் சேர்ந்த அபிராம சுந்தரம் என்ற அபிராம் (44), நாகை மாவட்டம் கீழ்வேளூர் ரெயிலடி தெருவைச் சேர்ந்த ஷாஜகான் (46) ஆகிய இருவரை காவலர்கள் கைது செய்துள்ளனர். அவர்களிடமிருந்து பயன்படுத்தப்பட்டதாகக் கருதப்படும் கார் மற்றும் செல்போன்களும் பறிமுதல் செய்யப்பட்டுள்ளன.

மீட்கப்பட்ட ஐம்பொன் சிலைகளின் மதிப்பு பல லட்சம் ரூபாய் இருக்கும் என தெரிவிக்கப்பட்டுள்ளது.இதனையடுத்து, கைது செய்யப்பட்ட இருவருக்கும் சர்வதேச சிலைக் கடத்தல் வலையமைப்புடன் தொடர்பு உள்ளதா, இதற்கு முன்பு காரைக்கால் வழியாக வெளிநாடுகளுக்கு பழமையான சிலைகள் கடத்தப்பட்டுள்ளனவா, இந்தக் கடத்தல் முயற்சியில் மேலும் யார் யார் சம்பந்தப்பட்டுள்ளனர் என்பது உள்ளிட்ட பல்வேறு கோணங்களில் காவலர்கள் தீவிர விசாரணை மேற்கொண்டு வருகின்றனர்.

இந்த விசாரணையின் மூலம் நாட்டை அதிரவைத்த சிலைக் கடத்தல் வலையமைப்பு குறித்து மேலும் பல முக்கிய தகவல்கள் வெளிச்சத்துக்கு வரும் என எதிர்பார்க்கப்படுகிறது.