மானாமதுரை பகுதியில் செங்கல் சூளை நடத்தி வரும் நபரிடம், மண் எடுத்து செல்வதற்கான அனுமதி வழங்குவதற்காக ரூ.50 ஆயிரம் லஞ்சம் பெற்றதாக கூறப்படும் பரமக்குடி வருவாய் கோட்டாட்சியர் சரவண பெருமாளை லஞ்ச ஒழிப்புத்துறை காவலர்கள் கைது செய்துள்ளனர். இந்த சம்பவம் பரமக்குடி மற்றும் ராமநாதபுரம் பகுதிகளில் பரபரப்பை ஏற்படுத்தியுள்ளது.ராமநாதபுரம் மாவட்டம் பரமக்குடி வருவாய் கோட்டாட்சியராக சரவண பெருமாள் பணியாற்றி வருகிறார்.

மானாமதுரை பகுதியில் செங்கல் சூளை நடத்தி வரும் ஒருவர், தனது தொழிலுக்காக சவுடு மண் எடுத்து செல்ல உரிய அனுமதி பெறுவதற்காக பரமக்குடி வருவாய் கோட்டாட்சியர் அலுவலகத்தில் விண்ணப்பித்திருந்தார்.அந்த அனுமதி ஆணையை வழங்குவதற்காக வருவாய் கோட்டாட்சியர் சரவண பெருமாள் ரூ.50 ஆயிரம் லஞ்சமாக கேட்டதாக கூறப்படுகிறது.

அரசு அலுவலகத்தில் தனது பணியை முடிப்பதற்காக லஞ்சம் கொடுக்க விரும்பாத அந்த நபர், இதுகுறித்து லஞ்ச ஒழிப்புத்துறை காவலர்களிடம் புகார் அளித்தார்.புகாரை பெற்றுக்கொண்ட காவலர்கள், சம்பவத்தை உறுதி செய்வதற்காக திட்டமிட்டு நடவடிக்கை மேற்கொண்டனர்.லஞ்ச ஒழிப்புத்துறை காவலர்களின் அறிவுறுத்தலின்படி, புகார் அளித்த நபரிடம் ரூ.50 ஆயிரம் பணம் வழங்கப்பட்டது.

அந்த ரூபாய் நோட்டுகளில் ரசாயனப் பொடி தடவி, அவற்றை வருவாய் கோட்டாட்சியரிடம் வழங்க ஏற்பாடு செய்யப்பட்டது.திட்டமிட்டபடி அந்த நபர் ரூ.50 ஆயிரம் பணத்தை சரவண பெருமாளிடம் கொடுத்தார்.அப்போது அங்கு மறைந்திருந்த லஞ்ச ஒழிப்புத்துறை காவலர்கள் உடனடியாக செயல்பட்டு, லஞ்சப் பணத்தை பெற்றதாக கூறப்படும் சரவண பெருமாளை கையும் களவுமாக பிடித்தனர்.

இதையடுத்து வருவாய் கோட்டாட்சியர் சரவண பெருமாளை காவலர்கள் கைது செய்து, அவரிடம் தொடர்ந்து விசாரணை மேற்கொண்டனர்.

அரசு அலுவலகத்தில் அனுமதி வழங்குவதற்காக அதிகாரி ஒருவர் லஞ்சம் பெற்றதாக கூறப்படும் சம்பவம் பரமக்குடி மற்றும் ராமநாதபுரம் சுற்றுவட்டார பகுதிகளில் பெரும் பரபரப்பை ஏற்படுத்தியுள்ளது.அரசு அலுவலகங்களில் லஞ்சம் மற்றும் முறைகேடுகளை தடுக்கும் நடவடிக்கைகள் தொடர்ந்து தீவிரப்படுத்தப்பட்டு வருவதாக லஞ்ச ஒழிப்புத்துறை தரப்பில் தெரிவிக்கப்படுகிறது.