சூர்யகுமார் யாதவ் தலைமையிலான இந்திய டி20 அணி, சமீபத்தில் நடைபெற்ற 2026 டி20 உலகக்கோப்பையை கைப்பற்றி வரலாற்றுச் சாதனை படைத்தது. இதற்கு முன் ரோகித் சர்மா தலைமையில் 2024 டி20 உலகக்கோப்பையையும் வென்றிருந்த இந்தியா, தொடர்ந்து இரண்டு டி20 உலகக்கோப்பைகளை கைப்பற்றிய முதல் அணியாகவும், மொத்தம் மூன்று முறை டி20 உலக சாம்பியன் பட்டம் வென்ற அணியாகவும் சாதனை நிகழ்த்தியது.

இந்த வெற்றிக்குப் பிறகு, 2028 டி20 உலகக்கோப்பையை நோக்கி இந்திய அணியில் பல்வேறு மாற்றங்கள் நடைபெறலாம் என்ற எதிர்பார்ப்பு உருவாகியுள்ளது. குறிப்பாக தற்போதைய கேப்டன் சூர்யகுமார் யாதவின் வயது மற்றும் சமீபத்திய பேட்டிங் ஃபார்ம் குறித்து விவாதங்கள் எழுந்துள்ளதால், எதிர்காலத்தில் புதிய கேப்டன் தேர்வு செய்யப்படலாம் என்ற தகவல்கள் பரவி வருகின்றன.

இந்த நிலையில், அடுத்த இந்திய டி20 கேப்டன் யார் என்ற விவாதம் கிரிக்கெட் வட்டாரங்களில் தீவிரமடைந்துள்ளது. ஷ்ரேயாஸ் ஐயர் மற்றும் சஞ்சு சாம்சன் ஆகியோரின் பெயர்கள் அதிகமாக பேசப்பட்டு வருகின்றன.

இதுகுறித்து ஆஸ்திரேலிய அணியின் முன்னாள் கேப்டனும், டெல்லி அணியின் முன்னாள் பயிற்சியாளருமான ரிக்கி பாண்டிங் தனது கருத்தை தெரிவித்துள்ளார்.

அவர் கூறுகையில், “சூர்யகுமார் யாதவுக்கு பிறகு இந்திய டி20 அணியை வழிநடத்தக்கூடிய பல வீரர்கள் இருக்கிறார்கள். ஆனால் அவர்களில் ஷ்ரேயாஸ் ஐயரே மிகவும் பொருத்தமானவர் என நான் கருதுகிறேன்” என்றார்.

மேலும், “தனது கிரிக்கெட் வாழ்க்கையில் தற்போது தான் ஷ்ரேயாஸ் ஐயர் மிகுந்த முதிர்ச்சியுடன் விளையாடி வருகிறார். அவரது பேட்டிங் ஃபார்ம் மிகவும் சிறப்பாக உள்ளது. அழுத்தமான சூழ்நிலைகளிலும் அமைதியாக முடிவெடுக்கும் திறன் அவரிடம் இருக்கிறது. எனவே தற்போது அவரை இந்திய டி20 அணியின் கேப்டனாக உருவாக்குவது சரியான முடிவாக இருக்கும்” என பாண்டிங் தெரிவித்துள்ளார்.

ஷ்ரேயாஸ் ஐயர் ஏற்கனவே ஐபிஎல் மற்றும் உள்ளூர் போட்டிகளில் தலைமைத்துவ திறனை வெளிப்படுத்தியுள்ளார். அதேநேரத்தில் சஞ்சு சாம்சனும் கேப்டன்சி போட்டியில் முக்கியமானவராக பார்க்கப்படுகிறார்.

இதனால், 2028 டி20 உலகக்கோப்பையை நோக்கி இந்திய அணி எந்த வகையான தலைமை மாற்றத்தை செய்யப்போகிறது என்பது ரசிகர்களிடையே பெரிய எதிர்பார்ப்பை ஏற்படுத்தியுள்ளது.