நடப்பு ஐபிஎல் தொடர் விறுவிறுப்பான இறுதிக்கட்டத்தை எட்டியுள்ள நிலையில், வீரர்களுக்கு இடையிலான தனிப்பட்ட சாதனைகளுக்கான போட்டி தீவிரமடைந்துள்ளது. குறிப்பாக, அதிக விக்கெட்டுகளை வீழ்த்தும் வீரருக்கான 'பர்பிள் கேப்' (Purple Cap) கௌரவத்தைப் பெறுவதில் ஒவ்வொரு போட்டியிலும் பெரும் மாற்றங்கள் நிகழ்ந்து வருகின்றன.

சென்னையில் இன்று நடைபெற்ற லக்னோ சூப்பர் ஜெயண்ட்ஸ் அணிக்கு எதிரான போட்டியில், சிஎஸ்கே அணியின் இளம் வேகப்பந்து வீச்சாளர் அன்ஷுல் கம்போஜ் அபாரமாகச் செயல்பட்டு 2 விக்கெட்டுகளைக் கைப்பற்றினார். இதன் மூலம், இந்தத் தொடரில் மொத்தம் 19 விக்கெட்டுகளை வீழ்த்தி, பர்பிள் கேப் பட்டியலில் முதலிடத்தைப் பிடித்துள்ளார்.

பர்பிள் கேப் நிலவரம்:

நேற்று வரை குஜராத் அணியின் ககிசோ ரபாடா 18 விக்கெட்டுகளுடன் முதலிடத்தில் இருந்தார். இன்று அன்ஷுல் கம்போஜ் அவரை முந்தியுள்ளார். தற்போதைய நிலவரப்படி முதல் ஐந்து இடங்கள்:

அன்ஷுல் கம்போஜ் சிஎஸ்கே 19
ககிசோ ரபாடா குஜராத்    18
புவனேஷ்வர் குமார் ஹைதராபாத் 17
பிரின்ஸ் யாதவ் லக்னோ 16
இஷான் மலிங்கா மும்பை 16

இன்றைய போட்டியில் லக்னோ அணி 203 ரன்கள் குவித்த போதிலும், சிஎஸ்கே தரப்பில் அன்ஷுல் கம்போஜ் மற்றும் 3 விக்கெட்டுகளை வீழ்த்திய ஜேமி ஓவர்டன் ஆகியோரின் பந்துவீச்சு கவனிக்கத்தக்கதாக இருந்தது.

தமிழக முதல்வர் விஜய்யின் பதவியேற்பு விழாவில் பாதுகாப்புப் பணியில் இருந்த காவலர் ஒருவருடன் ஒப்பிடப்பட்டு இணையத்தில் வைரலான அன்ஷுல் கம்போஜ், தற்போது மைதானத்திலும் தனது பந்துவீச்சால் விக்கெட்டுகளைச் சரித்து முதலிடத்தைப் பிடித்துள்ளது ரசிகர்களிடையே பெரும் வரவேற்பைப் பெற்றுள்ளது. தொடரின் எஞ்சிய போட்டிகளில் ரபாடா மற்றும் புவனேஷ்வர் குமாரிடம் இருந்து தனது முதலிடத்தை அன்ஷுல் தக்கவைப்பாரா என்பதே இப்போதுள்ள எதிர்பார்ப்பு.