இந்தியா மற்றும் நியூசிலாந்து அணிகளுக்கு இடையேயான மூன்று போட்டிகள் கொண்ட ஒருநாள் கிரிக்கெட் தொடரின் முதல் போட்டி, நாளை ஜனவரி 11-ஆம் தேதி வதோதராவில் அமைந்துள்ள புதிய கோடாம்பி கிரிக்கெட் மைதானத்தில் நடைபெறுகிறது. புதிதாக கட்டப்பட்ட இந்த மைதானம், இந்திய அணியின் போட்டியை முதன்முறையாக நடத்துவதால் ரசிகர்களிடையே கூடுதல் எதிர்பார்ப்பை ஏற்படுத்தியுள்ளது.

புத்தாண்டின் தொடக்கத்தில் இந்திய அணி புதிய உத்வேகத்துடன் களமிறங்குகிறது. கடந்த ஆண்டு ஒருநாள் கிரிக்கெட்டில் சிறப்பாக விளையாடிய இந்திய அணி, அதே வேகத்தையும் வெற்றித் தொடரையும் தொடர வேண்டும் என்ற நோக்கில் இந்த தொடரை அணுகுகிறது. ஷுப்மன் கில் தலைமையிலான இந்திய அணி, புதிய மைதானத்தில் விளையாட இருப்பது இந்த போட்டிக்கு கூடுதல் சிறப்பை அளிக்கிறது.

வதோதராவில் கட்டப்பட்டுள்ள கோடாம்பி மைதானம் மணல் அடிப்படையிலான ஆடுகளத்தை கொண்டுள்ளது. இதன் காரணமாக மழைக்குப் பிறகும் போட்டிகளை விரைவாகத் தொடங்க முடியும். இங்குள்ள பிட்ச் சிவப்பு மற்றும் கருப்பு மண் கலவையில் உருவாக்கப்பட்டுள்ளது. வீரர்களின் உடல் மீட்பு மற்றும் ஆரோக்கியத்தை கருத்தில் கொண்டு, ஜக்குஸி, ஐஸ் பாத் வசதி, ஒலிம்பிக் அளவிலான நீச்சல் குளம், பிசியோ அறை ஆகியவை அமைக்கப்பட்டுள்ளன. மேலும், ஜிம், டர்ஃப், சிமெண்ட் மற்றும் ஆஸ்ட்ரோடர்ஃப் விக்கெட்டுகளுடன் கூடிய பெரிய பயிற்சிப் பகுதியும் இதில் உள்ளது.

இந்த மைதானத்தின் முக்கியமான சிறப்பம்சமாக இன்டோர் நெட் வசதி அமைக்கப்பட்டுள்ளது. இதன் மூலம் எந்த வானிலையிலும் வீரர்கள் பயிற்சி மேற்கொள்ள முடியும். நேரடி ஒளிபரப்புக்காக நவீன வசதிகளுடன் கூடிய பெரிய பிராட்காஸ்ட் கண்ட்ரோல் ரூம் அமைக்கப்பட்டுள்ளது. வர்ணனையாளர்களுக்காக மீடியா டவரின் உச்சியில் தனி வர்ணனை அறைகளும் கட்டப்பட்டுள்ளன.

கோடாம்பி மைதானம் சுமார் 30,000-க்கும் மேற்பட்ட ரசிகர்கள் அமரும் கொள்ளளவை கொண்டது. இதில் 35 சொகுசு கார்ப்பரேட் பாக்ஸ்கள் அமைக்கப்பட்டுள்ளன. போட்டியை காணும் அனுபவத்தை மேம்படுத்த நவீன கட்டிட வடிவமைப்பு பயன்படுத்தப்பட்டுள்ளது. அணிகளுக்காக இரண்டு பெரிய, வசதியான டிரஸ்ஸிங் ரூம்கள் உள்ளன. மைதானத்தின் வெளிப்புற வடிவமைப்பும் பார்ப்பவர்களை கவரும் வகையில் அமைக்கப்பட்டுள்ளது.

ஊடக அறிக்கைகளின்படி, இந்த மைதானத்தை கட்டுவதற்கு 200 முதல் 215 கோடி ரூபாய் வரை செலவிடப்பட்டுள்ளதாக கூறப்படுகிறது. 2015-ஆம் ஆண்டு ஜனவரியில் பரோடா கிரிக்கெட் சங்கம் மற்றும் குஜராத் அரசு இடையே புரிந்துணர்வு ஒப்பந்தம் கையெழுத்தானது. அப்போது 29 ஏக்கர் நிலத்தில் மைதானம் அமைக்க 200 கோடி ரூபாய் செலவாகும் என மதிப்பிடப்பட்ட நிலையில், பின்னர் அந்த செலவு 215 கோடி ரூபாய் வரை உயர்ந்ததாக தகவல்கள் தெரிவிக்கின்றன.

இவ்வாறு நவீன வசதிகளுடன், கோடிக்கணக்கில் செலவு செய்து உருவாக்கப்பட்டுள்ள கோடாம்பி கிரிக்கெட் மைதானம், இந்தியா – நியூசிலாந்து முதல் ஒருநாள் போட்டியின் மூலம் சர்வதேச கிரிக்கெட் வரைபடத்தில் தனது அடையாளத்தை பதிவு செய்யத் தயாராக உள்ளது.