இந்திய கிரிக்கெட் அணியின் நட்சத்திர வேகப்பந்து வீச்சு ஆல்ரவுண்டரான ஹார்டிக் பாண்டியா, கடந்த பல ஆண்டுகளாக ஒருநாள் மற்றும் டி20 போட்டிகளில் மேட்ச் வின்னராக திகழ்ந்து வருகிறார். ஆனால், காயம் காரணமாக கடந்த ஏழு ஆண்டுகளாக டெஸ்ட் கிரிக்கெட்டில் அவர் தொடர்ந்து விளையாட முடியாமல் இருந்து வருகிறார். 2017ஆம் ஆண்டு டெஸ்ட் கிரிக்கெட்டில் அறிமுகமான ஹார்டிக் பாண்டியா, ஒரு குறுகிய காலத்திற்கு மட்டுமே இந்த வடிவத்தில் இந்திய அணியை பிரதிநிதித்துவப்படுத்தினார்.

டெஸ்ட் போட்டிகளில் இதுவரை 11 ஆட்டங்களில் விளையாடியுள்ள ஹார்டிக் பாண்டியா, ஒரு சதம் மற்றும் நான்கு அரைசதங்கள் உட்பட 532 ரன்களையும், 17 விக்கெட்டுகளையும் கைப்பற்றியுள்ளார். அதிரடி பேட்டிங்குடன், கட்டுப்பாடான வேகப்பந்து வீச்சையும் ஒருங்கே வழங்கும் திறன் கொண்டவர் என்பதால், அவர் இந்திய அணியின் முக்கியமான ஆல்ரவுண்டர்களில் ஒருவராக பார்க்கப்படுகிறார்.

இந்த நிலையில், ஹார்டிக் பாண்டியா மீண்டும் டெஸ்ட் அணிக்கு திரும்பினால் இந்திய அணி மேலும் பலம் பெறும் என முன்னாள் இந்திய வீரர் ராபின் உத்தப்பா கருத்து தெரிவித்துள்ளார். தனது சமீபத்திய பேட்டியில் அவர், “ஹார்டிக் பாண்டியா டெஸ்ட் போட்டிகளில் ஏழாவது இடத்தில் விளையாடினால் அது இந்திய அணிக்கு மிகச் சிறந்த முடிவாக இருக்கும். பிசிசிஐ அவரை மீண்டும் டெஸ்ட் கிரிக்கெட்டுக்கு அழைக்க வேண்டும்” என கூறியுள்ளார்.

தொடர்ந்து பேசிய உத்தப்பா, “ஹார்டிக் பாண்டியா அழைப்பு வந்தால் அதை மறுப்பார் என நான் நினைக்கவில்லை. தற்போது டெஸ்ட் அணியில் வேகப்பந்து வீச்சு ஆல்ரவுண்டராக விளையாடும் நிதீஷ் ரெட்டி ஒரு இன்னிங்சில் 12–15 ஓவர்கள் வரை மட்டுமே வீசுகிறார். அந்த அளவுக்கு, தற்போதைய உடற்தகுதியுடன் ஹார்டிக் பாண்டியா பந்துவீசி, அதே நேரத்தில் பேட்டிங்கிலும் பங்களிக்க முடியும்” என்று தெரிவித்துள்ளார்.

மேலும், ஹார்டிக் பாண்டியா டெஸ்ட் கிரிக்கெட்டில் மீண்டும் விளையாட விரும்பினால், இந்திய அணிக்கு அது மிகப் பெரிய பலமாக இருக்கும் என்றும், அப்படி நடந்தால் ஐசிசி உலக டெஸ்ட் சாம்பியன்ஷிப் பட்டத்தை கைப்பற்ற இந்தியாவுக்கு நல்ல வாய்ப்பு உருவாகும் என்றும் ராபின் உத்தப்பா தெரிவித்துள்ளார்.

இதனால், ஹார்டிக் பாண்டியாவின் டெஸ்ட் கிரிக்கெட் மீள்பிரவேசம் குறித்து ரசிகர்களிடையே மீண்டும் எதிர்பார்ப்பு அதிகரித்துள்ளது.