ஜப்பானின் ஐச்சி-நகோயாவில் நடைபெற்று வரும் 2026 ஆசிய விளையாட்டுப் போட்டியில், இந்தியாவின் நட்சத்திர குத்துச்சண்டை வீராங்கனை லோவ்லினா போர்கோஹெய்ன் மகளிர் 75 கிலோ எடைப்பிரிவில் தங்கப் பதக்கம் வென்று புதிய வரலாறு படைத்துள்ளார்.

பிறந்தநாளில் கிடைத்த வரலாற்றுப் பரிசு:

அசாம் மாநிலத்தைச் சேர்ந்த லோவ்லினா போர்கோஹெய்ன், தனது 29-வது பிறந்தநாளான இன்று (அக்டோபர் 2) நடைபெற்ற விறுவிறுப்பான இறுதிப்போட்டியில் சீனாவின் பாவோ ஜியி (Bao Ziyi) என்பவரை எதிர்கொண்டார். இப்போட்டியில் தொடக்கம் முதலே ஆதிக்கம் செலுத்திய லோவ்லினா, 5-0 என்ற கணக்கில் ஒருமனதான நடுவர்கள் தீர்ப்பு (Unanimous Decision) மூலம் அபார வெற்றி பெற்றுத் தங்கப் பதக்கத்தைத் தட்டிச் சென்றார்.

Lovlina Borgohain wins Gold Medal 🥇 in Women’s 75 Kg event. Lovlina beats China’s Ziyi Bao 5-0 pic.twitter.com/h47LbC3Hif

— Gaurav Gulati (@gulatiLFC) October 2, 2026

மேரி கோமிற்குப் பின் 2-வது சாதனை வீராங்கனை:

ஆசிய விளையாட்டுப் போட்டிகளின் குத்துச்சண்டை பிரிவில் தங்கப் பதக்கம் வெல்லும் 2-வது இந்திய மகளிர் வீராங்கனை என்ற மகத்தான பெருமையை லோவ்லினா இதன் மூலம் பெற்றுள்ளார். இதற்கு முன் கடந்த 2014-ஆம் ஆண்டு ஆசிய விளையாட்டில் வீராங்கனை மேரி கோம் தங்கம் வென்றிருந்தார். கடந்த 2022 ஹங்சோ ஆசிய விளையாட்டில் வெள்ளிப் பதக்கம் வென்றிருந்த லோவ்லினா, இம்முறை அதனைத் தங்கமாக மாற்றித் தனது முந்தைய சாதனையை மேம்படுத்தியுள்ளார்.

தொடரும் பதக்க வேட்டை:

டோக்கியோ ஒலிம்பிக்கில் வெண்கலப் பதக்கமும், 2023 உலகச் சாம்பியன்ஷிப்பில் தங்கப் பதக்கமும் வென்ற லோவ்லினா, தனது பிறந்தநாளில் ஆசிய விளையாட்டில் தங்கம் வென்று நாட்டிற்குப் பெருமை சேர்த்துள்ளது இந்திய விளையாட்டு ரசிகர்களிடையே பெரும் உற்சாகத்தை ஏற்படுத்தியுள்ளது.