தமிழக சட்டமன்றத் தேர்தலில் நடிகர் விஜய்யின் தமிழக வெற்றிக் கழகத்தின் (தவெக) வருகை, அரசியல் கணக்குகளை பெரிதும் மாற்றக்கூடியதாக பார்க்கப்படுகிறது. திமுக மற்றும் அதிமுக கூட்டணிகள் நேரடி போட்டியில் இருந்த சூழல், தற்போது நான்கு முனைப் போட்டியாக மாறியுள்ளதால், வாக்கு சிதறல் முக்கிய காரணியாக உருவெடுத்துள்ளது.

2021 தேர்தலில் திமுக கூட்டணி 45.8% வாக்குகளையும், அதிமுக கூட்டணி 39.7% வாக்குகளையும் பெற்ற நிலையில், இரு அணிகளுக்கும் இடையேயான வித்தியாசம் சுமார் 6% ஆக இருந்தது. இந்த முறை, தவெக மற்றும் நாம் தமிழர் கட்சி இணைந்து அந்த வாக்கு வித்தியாசத்தை பாதிக்கக்கூடிய நிலை உருவாகியுள்ளது.

சர்வே நிறுவனங்களின் கணிப்புப்படி, திமுக சுமார் 41%, அதிமுக 38%, தவெக 8% முதல் 14% வரை வாக்குகள் பெறலாம் என மதிப்பிடப்படுகிறது. இந்த வாக்குகள் யாரிடமிருந்து பிரிகின்றன என்பது தான் இறுதி முடிவை தீர்மானிக்கும் முக்கிய அம்சமாக உள்ளது.

தவெக சுமார் 8% வாக்குகள் பெற்றால், அவை பெரும்பாலும் அதிமுகவிடமிருந்து பிரிந்தால் திமுகக்கு பெரிய சாதகமாக அமையும். இந்த சூழலில் திமுக அதிக தொகுதிகளை வெல்லும் வாய்ப்பு அதிகம். அதேசமயம், அந்த 8% வாக்குகள் திமுகவிடமிருந்து அதிகமாக பிரிந்தால் கூட, திமுக முன்னிலை தக்கவைக்கும் நிலை காணப்படுகிறது.

10% வாக்குகள் பெற்றாலும், அதிமுகவிடமிருந்து அதிக வாக்குகள் விலகினால் திமுக வெற்றி விகிதம் மேலும் உயரும். ஆனால் அதே 10% வாக்குகள் திமுகவிடமிருந்து அதிகமாக பிரிந்தால் போட்டி கடுமையாகி, இரு அணிகளும் நெருக்கடியான நிலைக்கு செல்லலாம்.

முக்கியமாக, தவெக 12% வாக்குகள் பெற்று அதில் பெரும்பங்கு திமுகவிடமிருந்து விலகினால் மட்டுமே ஆட்சிமாற்றத்திற்கு வாய்ப்பு உருவாகும் என கணிக்கப்படுகிறது. இந்த ஒரு சூழ்நிலையே அதிமுகக்கு தெளிவான சாதகமாக பார்க்கப்படுகிறது.

மேலும், தவெக 14% வரை வாக்குகள் பெற்றாலும், அந்த வாக்குகள் அதிமுகவிடமிருந்து அதிகமாக வந்தால் திமுக மிகப்பெரிய வெற்றி பெறும். ஆனால் அதே அளவு வாக்குகள் திமுகவிடமிருந்து விலகினால், தேர்தல் முடிவு கடும் போட்டியாக மாறும்.

மொத்தத்தில், விஜய்யின் தவெக பெறும் வாக்கு சதவீதம் மட்டும் அல்லாமல், அந்த வாக்குகள் எந்த அணியிலிருந்து பிரிகின்றன என்பது தான் தேர்தல் முடிவை தீர்மானிக்கும் முக்கிய காரணி என அரசியல் விமர்சகர்கள் கருதுகின்றனர்.
இந்த நிலையில், தமிழக அரசியல் களம் இறுதிவரை கணிக்க முடியாத திருப்பங்களுடன் நகரும் என எதிர்பார்க்கப்படுகிறது.