நடிகர் விஜய் அரசியலில் களமிறங்கி, தமிழக வெற்றி கழகம் (TVK) என்ற கட்சியை தொடங்கி தேர்தல் அரசியலில் தீவிரமாக செயல்பட்டு வரும் நிலையில், அவருக்கு ஆதரவாக நடிகர் பிரபு தெரிவித்துள்ள கருத்து அரசியல் மற்றும் திரைத்துறையில் கவனம் பெற்றுள்ளது.

தமிழக சட்டமன்றத் தேர்தலை முன்னிட்டு 234 தொகுதிகளிலும் தனித்து போட்டியிடுவதாக அறிவித்திருந்த தவெக, எடப்பாடி தொகுதியில் வேட்பாளர் மனு நிராகரிக்கப்பட்டதால் தற்போது 233 தொகுதிகளில் மட்டுமே களமிறங்கியுள்ளது. இதற்கிடையில் விஜயின் அரசியல் பயணம் குறித்து பல்வேறு தரப்பிலிருந்து ஆதரவும் விமர்சனமும் தொடர்ந்து எழுந்து வருகிறது.

இந்த நிலையில், மூத்த நடிகர் பிரபு விஜய்க்கு வெளிப்படையாக ஆதரவு தெரிவித்துள்ளார். “இது ஜனநாயக நாடு. தம்பி விஜய் களமிறங்கி இருக்கிறார். அவருக்கு அந்த ஆண்டவன் அருளும், என்னுடைய ஆசீர்வாதமும் எப்போதும் இருக்கும். நான் அவருக்கு ஆதரவாக இருக்கிறேன்,” என அவர் கூறியுள்ளார்.

மேலும், திரைத்துறையில் மற்றவர்கள் விஜய்க்கு ஆதரவு தருகிறார்களா என்பது அவர்களது தனிப்பட்ட முடிவு என்றும், “விஜய் நல்லா இருக்கணும் என்பதுதான் என் விருப்பம்” என்றும் தெரிவித்துள்ளார்.

விஜய் பிரச்சாரத்திற்கு செல்லும் இடங்களில் பெரும் கூட்டம் திரளுவது கவனிக்கப்படுகிறது. இதேசமயம், அந்த கூட்டம் வாக்குகளாக மாறுமா என்ற கேள்வியும் எதிர்க்கட்சிகளால் எழுப்பப்படுகிறது. இருந்தாலும், தனது ஆதரவாளர்களை வாக்காளர்களாக மாற்றும் முயற்சியில் விஜய் தீவிரமாக ஈடுபட்டு வருகிறார்.

இந்த சூழலில், திரைத்துறையில் முக்கியமான நபராக கருதப்படும் பிரபு அளித்த இந்த ஆதரவு, தேர்தல் அரசியலில் எந்த அளவிற்கு தாக்கத்தை ஏற்படுத்தும் என்பது கவனிக்கப்பட வேண்டிய விஷயமாக உள்ளது.