கரூர் கூட்ட நெரிசல் வழக்கு – கடந்த சில வாரங்களாக தமிழக அரசியலில் பெரும் அதிர்வை ஏற்படுத்திய இந்த வழக்கில் இன்று உச்சநீதிமன்றம் மிக முக்கியமான தீர்ப்பை வழங்கியுள்ளது.

செப்டம்பர் 27ஆம் தேதி, நடிகர் விஜய் தலைமையிலான தமிழக வெற்றிக் கழகத்தின் பிரச்சார கூட்டத்தில் ஏற்பட்ட கூட்ட நெரிசலில் 41 பேர் உயிரிழந்தது நினைவிருக்கிறதே. இந்தச் சம்பவம் முழு நாட்டையும் உலுக்கியது.

முதலில் இந்த வழக்கை விசாரித்த சென்னை உயர்நீதிமன்றம், சிறப்பு புலனாய்வுக் குழுவை அமைத்திருந்தது. ஆனால், அந்த விசாரணையில் நியாயமில்லை என்று கூறி, தமிழக வெற்றிக் கழகத்தின் நிர்வாகி ஆதவ் அர்ஜுனா உச்சநீதிமன்றத்தை நாடினார்.நேற்று  அதுகுறித்த தீர்ப்பு வெளியாகியுள்ளது.

உச்சநீதிமன்றம் கரூர் கூட்ட நெரிசல் வழக்கை சிபிஐக்கு மாற்றி, மேலும் ஓய்வு பெற்ற உச்சநீதிமன்ற தலைமை நீதிபதி தலைமையில் ஒரு கண்காணிப்பு குழுவையும் அமைக்க உத்தரவிட்டுள்ளது.இது, தமிழ்நாட்டில் இந்த வழக்கின் திசையை முழுமையாக மாற்றக்கூடிய ஒரு தீர்ப்பாகக் கூறப்படுகிறது.

தீர்ப்பு வெளியாகிய பிறகு செய்தியாளர்களைச் சந்தித்த ஆதவ் அர்ஜுனா, மிக உணர்ச்சிகரமாகக் கூறினார் —“கரூர் சம்பவம் நடந்ததிலிருந்து நாங்கள் வலியுடனும், துயரத்துடனும் பயணித்து வருகிறோம்.விஜய் கலந்து கொண்ட பிரச்சாரம் — தமிழகம் கடந்த 50 ஆண்டுகளில் பார்த்திராத அளவுக்கு எழுச்சியைக் கொடுத்தது.ஆனால், அந்த எழுச்சியைக் குலைக்க முயன்றது சில சக்திகள் தான்.”

அவர் மேலும் கூறினார் —“மற்ற மாவட்டங்களில் போல அல்லாமல், கரூரில் காவல்துறையினர் எந்த ஒத்துழைப்பையும் அளிக்கவில்லை.
அவர்கள் சொன்ன நேரத்தில்தான் பிரச்சாரம் செய்தோம்.ஆனால், விஜய் தாமதமாக வந்ததாக தவறான குற்றச்சாட்டு பரப்பினர்.திட்டமிட்டு நெரிசல் அதிகமான வேலுச்சாமிபுரத்தில் எங்களுக்கு இடம் ஒதுக்கப்பட்டது — இது சதியாகும்.இதற்கான ஆதாரங்களை நாங்கள் உச்சநீதிமன்றத்தில் சமர்ப்பித்திருக்கிறோம்.”

அதேபோல் அவர் மேலும் தெரிவித்தார் —“துயரமான விபத்து நடந்த பிறகு, எங்களை வெளியேறச் சொன்னது காவல்துறையினரே.
மக்கள் மருத்துவமனையில் சேர்க்கப்பட்டபோது நாங்கள் இன்னும் கரூர் எல்லையில்தான் இருந்தோம்.ஆனாலும், எங்கள் தொண்டர்களை அடித்து விரட்டியது காவல்துறையே.அரசு அதிகாரிகள் கூட விசாரணை ஆணையத்தின் வரம்பை மீறி பேசினர்.இது முழுக்க முழுக்க ஒருதலைப்பட்சமான நடவடிக்கை தான்.”

அதோடு, சென்னை உயர்நீதிமன்றத்தில் ஒரு நீதிபதி விஜயை குறித்தும், கட்சியை குறித்தும் கடுமையான வார்த்தைகள் பயன்படுத்தினார், ஒரே நாளில் வழக்கு விசாரணை முடிந்து தீர்ப்பு வழங்கப்பட்டது என அவர் குற்றம் சாட்டினார்.“இதுவரை நீதிமன்ற வரலாற்றில் இப்படிச் சீக்கிரமாக தீர்ப்பு வழங்கியதில்லை.எங்களை முடக்க திட்டமிட்டது நாங்கள் புரிந்துகொண்டோம்.அதனால்தான் உச்சநீதிமன்றத்தை நாடினோம்,”என்றார் ஆதவ் அர்ஜுனா.

அவர் மேலும் உறுதியுடன் கூறினார் —“நாங்கள் கேட்ட மூன்று கோரிக்கைகளும் உச்சநீதிமன்றம் ஏற்றுக்கொண்டது —
ஒன்று, சிபிஐ விசாரணை,இரண்டு, ஓய்வு பெற்ற நீதிபதி தலைமையில் கண்காணிப்பு குழு,மூன்று, விசாரணையை உச்சநீதிமன்றமே நேரடியாக கண்காணிக்க வேண்டும் என்பதுதான்.இது மூன்றுமே எங்களுக்கு சாதகமானது.விரைவில் உண்மை வெளிச்சத்துக்கு வரும்.”இந்த உச்சநீதிமன்ற தீர்ப்பால், கரூர் கூட்ட நெரிசல் வழக்கின் விசாரணை புதிய திசையில் நகர்கிறது.

 தமிழக அரசியலில் பரபரப்பை ஏற்படுத்திய இந்த வழக்கில், சிபிஐ தன் விசாரணையை எப்போது தொடங்கும், எந்த ஆதாரங்கள் வெளிச்சத்துக்கு வரும் என்பது இப்போது அனைவரது கவனமும் ஈர்த்துள்ளது.