சென்னை பட்டினப்பாக்கத்தில் புதிய தலைமைச் செயலகம் மற்றும் சட்டப்பேரவை வளாகம் அமைக்கும் திட்டத்திற்கு எதிராக மீனவ மக்கள் மத்தியில் எதிர்ப்பு அதிகரித்து வரும் நிலையில், முதலமைச்சர் விஜய் நேரடியாக அப்பகுதி மீனவப் பிரதிநிதிகளையும் பொதுமக்களையும் சந்தித்துப் பேச உள்ளதாக தகவல்கள் வெளியாகியுள்ளன.

பட்டினப்பாக்கம் போர்ஷோர் எஸ்டேட் பகுதியில் சுமார் 26 ஏக்கர் பரப்பளவில், ரூ.1,200 கோடி மதிப்பீட்டில் புதிய தலைமைச் செயலகம் மற்றும் சட்டப்பேரவை வளாகம் அமைக்கப்படும் என்ற அரசின் முடிவு வெளியானது முதல், கடலோரப் பகுதிகளில் எதிர்ப்புக் குரல்கள் எழுந்துள்ளன. முள்ளிக்குப்பம், சீனிவாசபுரம், நொச்சிக்குப்பம் உள்ளிட்ட பல மீனவக் கிராமங்களைச் சேர்ந்த மக்கள், தங்களது வாழ்வாதாரம் பாதிக்கப்படும் எனக் கூறி திட்டத்தை எதிர்த்து வருகின்றனர்.

இந்தத் திட்டத்தை உடனடியாகத் திரும்பப் பெற வேண்டும் என்று மீனவ மக்கள் தரப்பில் வலியுறுத்தப்பட்டு வரும் நிலையில், அவர்களிடம் நேரடியாகப் பேசி பிரச்சினைக்கு தீர்வு காண முதலமைச்சர் விஜய் திட்டமிட்டுள்ளதாக அரசியல் வட்டாரங்களில் தகவல் வெளியாகியுள்ளது. எனினும், இந்தச் சந்திப்பின் மூலம் திட்டத்தை மறுபரிசீலனை செய்வாரா அல்லது மாற்று ஏற்பாடுகள் மற்றும் நலத்திட்டங்கள் குறித்து பேசி மக்களின் எதிர்ப்பை சமாளிக்க முயற்சிப்பாரா என்பது தற்போது கேள்வியாகியுள்ளது.

தேர்தல் பிரச்சாரத்தின்போது தமிழ்நாட்டின் நிதிநிலைமை, கடன் சுமை மற்றும் அரசு செலவுகள் குறித்து விஜய் பல்வேறு விமர்சனங்களை முன்வைத்திருந்தார். மக்கள் வரிப்பணம் வீணடிக்கப்படாது என்றும் அவர் வாக்குறுதி அளித்திருந்தார். இந்நிலையில், ஆட்சிக்கு வந்த பிறகு எம்.எல்.ஏக்களுக்கு அரசு செலவில் புதிய வாகனங்கள் வழங்கும் திட்டம் உள்ளிட்ட சில முடிவுகள் விமர்சனத்திற்கு உள்ளாகியுள்ளன.

இதற்கிடையே, நாமக்கல் கவிஞர் மாளிகையில் முதலமைச்சர் அலுவலகம் தொடர்பான மாற்றங்களும் விவாதத்தை ஏற்படுத்திய நிலையில், தற்போது ஏற்கனவே செயல்பட்டு வரும் புனித ஜார்ஜ் கோட்டைக்கு மாற்றாக ரூ.1,200 கோடியில் புதிய தலைமைச் செயலகம் அமைக்கப்படுவது குறித்து எதிர்க்கட்சிகள் கேள்வி எழுப்பி வருகின்றன.

புதிய கட்டிடத்துக்காக இவ்வளவு பெரிய தொகையை செலவிடுவதற்கு பதிலாக, மாநிலத்தின் அடிப்படைத் தேவைகளுக்கு அந்த நிதியை பயன்படுத்தலாம் என்ற கருத்துகளும் முன்வைக்கப்பட்டு வருகின்றன. அதேநேரத்தில், புதிய தலைமைச் செயலகம் மற்றும் சட்டப்பேரவை வளாகம் எதிர்கால நிர்வாகத் தேவைகளுக்கான கட்டமைப்பு முதலீடு என அரசு தரப்பில் விளக்கம் அளிக்கப்படுமா என்பதும் எதிர்பார்ப்பை ஏற்படுத்தியுள்ளது.

பட்டினப்பாக்கம் மெரினா லூப் சாலை பகுதி மீனவ மக்களின் அன்றாட வாழ்வாதாரத்துடன் நெருக்கமாக தொடர்புடையதாக உள்ளது. கடலுக்குச் சென்று மீன்பிடித்து திரும்பும் மீனவர்களிடம் இருந்து மீன்களை வாங்கி, சாலையோரக் கடைகளில் விற்பனை செய்வது அப்பகுதியைச் சேர்ந்த ஏராளமான மீனவப் பெண்களின் முக்கிய வாழ்வாதாரமாக உள்ளது.

இந்த நிலையில், தலைமைச் செயலகம் அமைக்கப்பட்டால் அந்தப் பகுதி பாதுகாப்பு முக்கியத்துவம் வாய்ந்த பகுதியாக மாறக்கூடும் என்றும், இதனால் மீன் விற்பனை உள்ளிட்ட அன்றாட நடவடிக்கைகளில் கட்டுப்பாடுகள் அதிகரிக்கலாம் என்றும் மீனவ மக்கள் தரப்பில் அச்சம் தெரிவிக்கப்படுகிறது.

மீனவர்களுக்கு கடற்கரை என்பது தொழில் நடைபெறும் இடம் மட்டுமல்ல; தலைமுறை தலைமுறையாக அவர்கள் வாழ்வுடன் இணைந்த பகுதி என்றும் அப்பகுதி மக்கள் தெரிவிக்கின்றனர். படகுகளை நிறுத்துதல், வலைகளைப் பழுதுபார்த்தல், மீன்களை உலர்த்துதல் உள்ளிட்ட பல்வேறு பணிகளும் கடற்கரையைச் சார்ந்தே நடைபெறுகின்றன.

முக்கிய அரசு நிகழ்ச்சிகள் மற்றும் பாதுகாப்பு ஏற்பாடுகள் காரணமாக ஏற்கனவே சில நேரங்களில் கடலுக்குச் செல்வதில் கட்டுப்பாடுகள் விதிக்கப்படுவதாக மீனவர்கள் குற்றம்சாட்டுகின்றனர். இந்த நிலையில், எதிர்காலத்தில் தலைமைச் செயலகம் மற்றும் சட்டப்பேரவை வளாகம் அமைந்தால் பாதுகாப்பு காரணங்களைக் கூறி தங்களது தொழில் நடவடிக்கைகளுக்கு மேலும் கட்டுப்பாடுகள் விதிக்கப்படலாம் என்ற அச்சம் அவர்களிடம் நிலவுகிறது.

இதனால், தங்களை குடியிருப்பு பகுதிகளில் இருந்து வெளியேற்றி தொலைதூரப் பகுதிகளுக்கு மாற்றும் நிலை உருவாகக்கூடும் என்றும் சில மீனவ குடும்பங்கள் கவலை தெரிவிக்கின்றன. “எங்களுக்கு நவீன கட்டிடங்களை விட கடலோடு இணைந்த வாழ்வும் தொழிலும் தான் முக்கியம்” என்பதே அப்பகுதி மக்களின் முக்கிய கோரிக்கையாக இருப்பதாக கூறப்படுகிறது.

இந்தச் சூழலில், மீனவ பிரதிநிதிகளுடன் முதலமைச்சர் விஜய் நேரடியாகப் பேச்சுவார்த்தை நடத்த உள்ளதாக வெளியாகியுள்ள தகவல் முக்கியத்துவம் பெற்றுள்ளது. சந்திப்பின்போது மீனவர்களின் கோரிக்கைகள், வாழ்வாதார பாதுகாப்பு, மீன் விற்பனைக்கான இடம், கடற்கரை அணுகல் உள்ளிட்ட விவகாரங்கள் குறித்து ஆலோசிக்கப்படலாம் என எதிர்பார்க்கப்படுகிறது.

தலைமைச் செயலகத் திட்டத்தை கைவிடுவது, மாற்று இடத்தைத் தேர்வு செய்வது அல்லது மீனவர்களின் வாழ்வாதாரத்தைப் பாதுகாக்கும் வகையில் திட்டத்தில் மாற்றங்களைச் செய்வது என அடுத்தகட்ட நடவடிக்கை எப்படி இருக்கும் என்பதே தற்போது முக்கிய எதிர்பார்ப்பாக உள்ளது. பட்டினப்பாக்கம் மக்களின் எதிர்ப்புக்கு முதலமைச்சர் விஜய் அளிக்கப்போகும் பதிலும், இந்தச் சந்திப்புக்குப் பிறகு அரசு எடுக்கப்போகும் முடிவும் தமிழக அரசியலில் கவனம் பெறும் விவகாரமாக மாறியுள்ளது.