தாராபுரம் இடைத்தேர்தல் பிரச்சாரம் இறுதிக்கட்டத்தை எட்டியுள்ள நிலையில், அதிமுக பொதுச்செயலாளரும் முன்னாள் முதல்வருமான எடப்பாடி பழனிசாமி, தவெக தலைவர் விஜய் மற்றும் அவரது ஆட்சியை கடுமையாக விமர்சித்து பிரச்சாரம் மேற்கொண்டார். தாராபுரம் தொகுதி அதிமுக வேட்பாளர் கே.பானுமதியை ஆதரித்து தளவாய்பட்டினத்தில் பேசிய அவர், இடைத்தேர்தல் முதல் தமிழக அரசின் செயல்பாடுகள் வரை பல்வேறு விவகாரங்களை முன்வைத்து ஆவேசமாக பேசினார்.

தாராபுரம் இடைத்தேர்தல் இயற்கையாக உருவான தேர்தல் இல்லை என்றும், திணிக்கப்பட்ட தேர்தல் என்றும் எடப்பாடி பழனிசாமி விமர்சித்தார். கடந்த சட்டமன்ற பொதுத்தேர்தலில் அதிமுக சார்பில் போட்டியிட்டு வெற்றி பெற்றவர், பதவியேற்ற சில நாட்களிலேயே ராஜினாமா செய்துவிட்டு தவெகவில் இணைந்து தற்போது அதே தொகுதியில் தவெக வேட்பாளராக போட்டியிடுவதாக அவர் குற்றம்சாட்டினார்.

“அதிமுக எம்எல்ஏவாக பதவியேற்றதும் என்னை வந்து சந்தித்தார். அதன் பிறகு இரண்டு நாட்களிலேயே சபாநாயகரிடம் ராஜினாமா கடிதத்தை கொடுத்தார். அதை பரிசீலிப்பதாக சபாநாயகர் கூறிய நிலையில், அடுத்த சில நிமிடங்களிலேயே தவெகவில் இணைந்தார். இது தர்மமா, நியாயமா?” என்று எடப்பாடி பழனிசாமி கேள்வி எழுப்பினார்.

மேலும், அதிமுகவின் சின்னத்தில் வெற்றி பெற்ற ஒருவரை தங்களது கட்சியில் இணைத்துக்கொண்டு மீண்டும் அதே தொகுதியில் வேட்பாளராக நிறுத்தியிருப்பதாக விமர்சித்த எடப்பாடி பழனிசாமி, மக்கள் தங்களது தீர்ப்பை வழங்க வேண்டும் என கேட்டுக்கொண்டார். ஆயிரக்கணக்கான தொண்டர்களின் உழைப்பால் வெற்றி பெற்றவர், அந்த வெற்றிக்கு பிறகு கட்சி மாறியிருப்பதாகவும் அவர் சாடினார்.

தவெக பிரச்சாரத்தில் வேட்பாளர் சத்தியபாமா உணர்ச்சிவசப்பட்டு பேசியது குறித்தும் எடப்பாடி பழனிசாமி விமர்சனம் செய்தார். “நீலிக்கண்ணீர் வடிக்கிறார். விஜய் படங்களில் நடித்ததைவிட பிரமாண்டமாக நடித்துள்ளார்” என்று அவர் கிண்டலாக குறிப்பிட்டார். விஜய் அவரை நேரில் சந்தித்து ஆறுதல் கூறியதாக கூறப்படும் காட்சியையும் சினிமா பாணியுடன் ஒப்பிட்டு விமர்சித்தார். “ஜனநாயகன் படத்துக்கு பதிலாக இதை படமாக எடுத்திருந்தால் நன்றாக ஓடியிருக்கும்” என்றும் அவர் பேசினார்.

தொடர்ந்து விஜய்யை நேரடியாக குறிவைத்த எடப்பாடி பழனிசாமி, “ஒரு கட்சியில் வெற்றி பெற்ற எம்எல்ஏவை கட்சி மாற வைத்து, பின்னர் அவரையே தங்களது கட்சி வேட்பாளராக அறிமுகப்படுத்தும் அளவுக்கு என்ன தைரியம்?” என்று கேள்வி எழுப்பினார். “ஆடு, மாடு திருடுவது போல எம்எல்ஏவை திருடிவிட்டார்கள்” என்றும் அவர் கடுமையாக விமர்சித்தார்.

தாராபுரத்தில் அதிமுக வேட்பாளருக்கு வாக்களித்து, கட்சி மாறிய வேட்பாளருக்கு எதிராக மக்கள் தங்களது தீர்ப்பை வழங்க வேண்டும் என்றும் எடப்பாடி பழனிசாமி கேட்டுக்கொண்டார். 320 வாக்குச்சாவடிகளிலும் அதிமுக தொண்டர்கள் உழைத்து பெற்ற வெற்றியை மதிக்காமல் கட்சி மாறியதாக அவர் குற்றம்சாட்டினார்.

இதனைத் தொடர்ந்து தமிழகத்தில் சட்டம் ஒழுங்கு தொடர்பான விவகாரங்களையும் எடப்பாடி பழனிசாமி முன்வைத்தார். சட்டப்பேரவையில் திமுக எழுப்பிய கேள்விகளுக்கு முதல்வர் விஜய் உரிய பதில் அளிக்கவில்லை என்றும், சர்க்காரியா கமிஷன் தொடர்பான விவாதத்தை முன்வைத்ததாகவும் அவர் விமர்சித்தார். மேலும், தனது ஆட்சிக் காலத்தில் காவல்துறையை கையில் வைத்திருந்தபோது எதிர்க்கட்சிகளின் கேள்விகளுக்கு பதிலளித்ததாகவும் தெரிவித்தார்.

தமிழகத்தில் கடந்த ஐந்து மாதங்களில் கொலை, பாலியல் குற்றங்கள், போதைப்பொருள் விற்பனை, கட்டப்பஞ்சாயத்து உள்ளிட்ட பல்வேறு பிரச்னைகள் இருப்பதாக குற்றம்சாட்டிய எடப்பாடி பழனிசாமி, இவை குறித்து அரசு உரிய விளக்கம் அளிக்கவில்லை என்றும் கூறினார். சர்க்காரியா கமிஷன் போன்ற பழைய விவகாரங்களை பேசுவதைவிட தற்போதைய சட்டம் ஒழுங்கு பிரச்னைகளுக்கு பதில் அளிக்க வேண்டும் என்றும் அவர் தெரிவித்தார்.

தமிழக அரசின் வரி மற்றும் மின்கட்டண உயர்வுகளையும் எடப்பாடி பழனிசாமி தனது பிரச்சாரத்தில் பட்டியலிட்டார். “ஊரான் வீட்டு நெய்யில் ஸ்வீட் செய்யாதீங்க என்று விஜய் கூறினார். இப்போது அவர் ஸ்வீட் செய்து கொண்டிருக்கிறார். யார் வீட்டு நெய்யில் செய்கிறார்?” என்று கேள்வி எழுப்பிய அவர், நகராட்சி வீட்டுவரி மற்றும் கடை வரி உயர்ந்துள்ளதாக குற்றம்சாட்டினார். மின்கட்டணமும் அதிகரித்துள்ளதாகவும் அவர் கூறினார்.

தமிழக அரசின் கடன் குறித்தும் கேள்வி எழுப்பிய எடப்பாடி பழனிசாமி, ஏற்கனவே பெரும் கடன் இருப்பதாகவும், புதிய கடன்கள் மேலும் சுமையை அதிகரிக்கும் என்றும் தெரிவித்தார். இதுபோன்ற சூழலில் புதிய தலைமைச் செயலகம் மற்றும் முதல்வருக்கான அலுவலக வசதிகளுக்கு அதிகளவில் செலவு செய்வது தேவையா என்றும் அவர் கேள்வி எழுப்பினார்.

மேலும், விஜய் தனது அரசியல் பயணத்தின் தொடக்கத்தில் தன்னை சந்தித்த சம்பவத்தையும் எடப்பாடி பழனிசாமி நினைவுகூர்ந்தார். ஒரு திரைப்படத்தின் வெளியீடு தொடர்பாக விஜய் தன்னை சந்திக்க வந்ததாகவும், அப்போது அதிகாரிகள் விடுமுறையில் இருந்த நிலையிலும் தனது கோரிக்கையை நிறைவேற்ற நடவடிக்கை எடுத்ததாகவும் கூறினார். “அப்போது நான் செய்த உதவி அவருக்கு நினைவில் இருக்கிறதா என்று தெரியவில்லை” என்றும் எடப்பாடி பழனிசாமி குறிப்பிட்டார்.

இறுதியாக, அதிமுகவுக்கு துரோகம் செய்ததாக தான் கருதும் வேட்பாளருக்கு எதிராக தாராபுரம் மக்கள் தேர்தலில் தங்களது தீர்ப்பை வழங்க வேண்டும் என்று எடப்பாடி பழனிசாமி கேட்டுக்கொண்டார். தாராபுரம் மற்றும் மதுராந்தகம் இடைத்தேர்தல் முடிவுகள் நெருங்கியுள்ள நிலையில், ஆளும் தவெக மற்றும் பிரதான எதிர்க்கட்சிகளுக்கு இடையேயான பிரச்சாரம் நாளுக்கு நாள் தீவிரமடைந்து வருகிறது.