2024 மக்களவைத் தேர்தல் காலத்தில் பரபரப்பை கிளப்பிய ரொக்கப் பணம் பறிமுதல் சம்பவம், தற்போது நீதிமன்ற கட்டத்தில் முக்கிய திருப்பத்தை கண்டுள்ளது. தாம்பரம் ரெயில் நிலையத்தில் நெல்லை விரைவு ரெயிலில் பயணம் செய்த ஒருவரிடமிருந்து ரூ.4 கோடி ரொக்கம் கைப்பற்றப்பட்ட சம்பவம் அப்போது அரசியல் வட்டாரத்தில் பெரும் விவாதத்தை ஏற்படுத்தியது.

அந்தப் பணம், நெல்லை மக்களவை தொகுதி பா.ஜ.க. வேட்பாளரான நயினார் நாகேந்திரனின் ஓட்டல் ஊழியரிடம் இருந்து பறிமுதல் செய்யப்பட்டதாகத் தெரிவிக்கப்பட்டது.இந்த பணம் வாக்காளர்களுக்கு வழங்கப்படுவதற்காக கொண்டு செல்லப்பட்டதாக குற்றச்சாட்டு எழுந்த நிலையில், இதுகுறித்து தீவிர விசாரணை நடத்தப்பட வேண்டும் என அரசியல் அழுத்தங்களும் அதிகரித்தன.

இந்த பின்னணியில், நயினார் நாகேந்திரன் மீது அமலாக்கத்துறை வழக்குப்பதிவு செய்ய உத்தரவிட கோரி, தி.மு.க. மாநிலங்களவை உறுப்பினர் கிரிராஜன் சென்னை உயர்நீதிமன்றத்தில் மனுத் தாக்கல் செய்தார்.

அந்த மனுவில், இந்த விவகாரம் தொடர்பாக நயினார் நாகேந்திரன் மற்றும் முன்னாள் அமைப்பு பொதுச்செயலாளர் கேசவ விநாயகம் மீது சிபிசிஐடி ஏற்கனவே வழக்குப்பதிவு செய்துள்ளதாகவும், சட்டவிரோத பணப் பரிமாற்றம் நடந்திருக்க வாய்ப்பு இருப்பதாகவும் குறிப்பிடப்பட்டிருந்தது.

மேலும், இந்த வழக்கில் ஆரம்ப கட்ட விசாரணை அவசியமானது என்பதால், அமலாக்கத்துறையையும் வழக்குப்பதிவு செய்ய நீதிமன்றம் உத்தரவிட வேண்டும் என கோரிக்கை வைக்கப்பட்டது.இந்த மனு இன்று தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள்முருகன் அமர்வில் விசாரணைக்கு வந்தது.

அப்போது, அமலாக்கத்துறை தரப்பில், “சட்டவிரோத பணப்பரிமாற்றத் தடுப்பு சட்டத்தின் கீழ் வழக்குப்பதிவு செய்வது அதிகாரிகளின் சுயாதீன தீர்மானம்; நீதிமன்றம் நேரடியாக உத்தரவிட முடியாது” என வலியுறுத்தப்பட்டது.

இந்த விளக்கத்தை பதிவு செய்த நீதிபதிகள், தி.மு.க. எம்.பி. கிரிராஜன் தாக்கல் செய்த மனுவை தள்ளுபடி செய்து உத்தரவிட்டனர். இந்த தீர்ப்பு, அமலாக்கத்துறையின் சுயாதீன அதிகாரத்தை மீண்டும் வலியுறுத்தும் வகையில் அமைந்துள்ளது என தெரிவிக்கப்படுகிறது.