தமிழக அரசியல் மற்றும் திரைத்துறை இணையும் பரபரப்பான சூழலில், நடிகர் சத்யராஜ் மற்றும் நடிகர் விஜய் தொடர்பான கருத்து மோதல் கவனத்தை ஈர்த்து வருகிறது. திமுகவுக்கு ஆதரவாக பிரசாரம் செய்து வரும் சத்யராஜ், விஜயை திறந்தவெளியில் விமர்சித்து வரும் நிலையில், அதற்கு மாறாக அவரது மகன் நடிகர் சிபிராஜ், விஜய்க்கு உறுதியான ஆதரவை வெளிப்படுத்தி வருவது பேசுபொருளாகியுள்ளது.

சட்டமன்றத் தேர்தல் நடைபெறவுள்ள இந்த முக்கிய தருணத்தில், சமூக வலைதளங்களில் தனது நிலைப்பாட்டை தெளிவாக பதிவு செய்துள்ள சிபிராஜ், “ஒரு குட்டி லெட்டர்” என்ற தலைப்பில் மனமார்ந்த பதிவை வெளியிட்டுள்ளார்.அந்த பதிவில், “அன்புள்ள விஜய் அண்ணா… 1993 அக்டோபர் 3-ஆம் தேதி பொள்ளாச்சியில் நடந்த ஒரு நிகழ்வில் உங்களை முதன்முதலில் பார்த்தேன்.

அப்போது அமைதியாக இருந்த அந்த இளைஞர், பின்னாளில் கோடிக்கணக்கான இதயங்களை கைப்பற்றி, ஒரு மாபெரும் சக்தியாக உருவெடுப்பார் என்று நான் நினைத்ததே இல்லை” என அவர் நினைவுகளை பகிர்ந்துள்ளார்.மேலும், “உங்கள் ‘குட்டி ஸ்டோரி’கள் எங்களுக்கு வாழ்க்கையைப் புரிய வைத்தன.

கடந்த 30 ஆண்டுகளாக மகிழ்ச்சியும் ஊக்கமும் அளித்த உங்களின் பயணம் எங்களுக்கு எப்போதும் ஊற்றாக இருக்கும். திரையில் நீங்கள் கொடுத்த மறக்க முடியாத தருணங்கள் எங்கள் மனதில் என்றும் பதிந்திருக்கும்” என அவர் உருக்கமாக குறிப்பிட்டுள்ளார்.

இறுதியாக, “வெற்றி பெற்று வா தலைவா… நாங்கள் உங்களுடன் இருக்கிறோம்” என உற்சாகமாக தனது ஆதரவை வெளிப்படுத்தியுள்ளார் என தெரிவிக்கப்படுகிறது. இந்த பதிவு, ரசிகர்கள் மத்தியில் பெரும் வரவேற்பையும் விவாதத்தையும் உருவாக்கியுள்ளது.