அதிமுகவில் எடப்பாடி பழனிசாமி மற்றும் சி.வி. சண்முகம் – எஸ்.பி. வேலுமணி அணிகளுக்கு இடையேயான மோதல் தற்போது உச்சக்கட்டத்தை எட்டியுள்ளது. சட்டமன்றத் தேர்தல் தோல்விக்குப் பிறகு தொடங்கிய உட்கட்சி அதிருப்தி, தற்போது வெளிப்படையான அதிகாரப் போட்டியாக மாறியுள்ளது.

ஒருபுறம் பொதுச் செயலாளர் எடப்பாடி பழனிசாமி தனது கட்டுப்பாட்டை கட்சியில் உறுதிப்படுத்த முயற்சி செய்து வருகிறார். மறுபுறம், முன்னாள் அமைச்சர்கள் சி.வி. சண்முகம் மற்றும் எஸ்.பி. வேலுமணி தலைமையிலான அணி, அதிமுக பொதுக்குழுவை கூட்டி கட்சியின் எதிர்காலம் குறித்து திறந்தவெளியில் விவாதிக்க வேண்டும் என வலியுறுத்தி வருகிறது.

தேர்தல் தோல்விக்குப் பிறகு தீவிரமான மோதல்

2026 சட்டப்பேரவைத் தேர்தலில் அதிமுக வெறும் 47 தொகுதிகளில் மட்டுமே வெற்றி பெற்று மூன்றாவது இடத்துக்கு தள்ளப்பட்டது. இந்த தோல்விக்கான காரணங்கள் குறித்து கட்சிக்குள் கடும் அதிருப்தி எழுந்தது.

குறிப்பாக, தமிழக வெற்றிக் கழகத்துடன் (தவெக) கூட்டணி அமைக்காதது மிகப்பெரிய அரசியல் தவறு என சில முன்னாள் அமைச்சர்கள் வெளிப்படையாகவே கருத்து தெரிவிக்கத் தொடங்கினர்.

இந்த சூழலில், சி.வி. சண்முகம் மற்றும் எஸ்.பி. வேலுமணி ஆதரவு 25 எம்.எல்.ஏக்கள் தவெக அரசுக்கு ஆதரவு தெரிவித்தது, அதிமுகவில் பெரும் அதிர்வலைகளை ஏற்படுத்தியது.

நடவடிக்கை எடுத்த எடப்பாடி

இதனைத் தொடர்ந்து கட்சி கட்டுப்பாட்டை மீறி செயல்பட்டதாக கூறி, பல நிர்வாகிகளின் பொறுப்புகளை எடப்பாடி பழனிசாமி பறித்தார். அவர்களுக்கு பதிலாக தனது ஆதரவாளர்களை நியமித்து அதிகாரத்தை தன் வசம் வைத்திருக்க முயன்றார்.

ஆனால் இதற்கு எதிராக சண்முகம் தரப்பும் கடுமையான பதிலடி கொடுத்தது. “பழனிசாமியின் நடவடிக்கைகள் செல்லாது” என்று தெரிவித்த அவர்கள், உடனடியாக பொதுக்குழுவை கூட்ட வேண்டும் என கோரிக்கை விடுத்துள்ளனர்.

மாவட்டச் செயலாளர்கள் கூட்டம்

இந்த நிலையில், சென்னை ராயப்பேட்டையில் உள்ள கட்சி தலைமை அலுவலகத்தில் மாவட்டச் செயலாளர்கள் கூட்டத்தை அவசரமாக கூட்டினார் எடப்பாடி பழனிசாமி.

கூட்டத்திற்குப் பிறகு வெளியிடப்பட்ட அறிக்கையில்,“தமிழகம் முழுவதும் பழனிசாமி தீவிர பிரச்சாரம் செய்ததால்தான் அதிமுக மற்றும் கூட்டணி கட்சிகள் வெற்றி பெற்றன”என்று கூறி, அவருக்கு முழு ஆதரவு தெரிவிக்கப்பட்டது.

ஆனால் இந்த கூட்டமே பழனிசாமிக்கு புதிய சிக்கலை ஏற்படுத்தியுள்ளதாக அரசியல் வட்டாரங்கள் கூறுகின்றன. காரணம், 82 மாவட்டச் செயலாளர்களில் குறைந்த எண்ணிக்கையிலானவர்கள் மட்டுமே நேரடியாக பங்கேற்றதாக தகவல் வெளியாகியுள்ளது.

மேலும், செல்லூர் ராஜூ, ராஜேந்திர பாலாஜி, ராஜன் செல்லப்பா உள்ளிட்ட முக்கிய தலைவர்கள் பங்கேற்காததும் கவனிக்கப்படுகிறது. முன்னாள் அமைச்சர் ஜெயக்குமார் இன்னும் எந்த அணிக்கும் வெளிப்படையான ஆதரவு அளிக்காமல் அமைதியாக இருப்பதும் பேசுபொருளாகியுள்ளது.

“பொதுக்குழு கட்டாயம்” – சி.வி. சண்முகம்

இதற்கிடையில் செய்தியாளர்களை சந்தித்த சி.வி. சண்முகம்,“தோல்விக்கான காரணங்களை திறந்த மனதுடன் விவாதிக்க பொதுக்குழு கூட்டப்பட வேண்டும்”
என்று வலியுறுத்தியுள்ளார்.

மேலும்,“தவெகவுடன் கூட்டணி அமைக்க வேண்டும் என்று நாங்கள் முன்பே கூறினோம். ஆனால் பழனிசாமி அதை ஏற்கவில்லை. இப்போது பிரச்சினை தீவிரமான பிறகு சமரசம் பேசுகிறார்”
என்றும் குற்றம்சாட்டியுள்ளார்.

எடப்பாடி பதவிக்கு ஆபத்தா?

அதிமுக விதிகளின்படி, பொதுக்குழு உறுப்பினர்களில் ஐந்தில் ஒரு பங்கு பேர் கோரிக்கை வைத்தாலே 30 நாட்களுக்குள் பொதுக்குழுவை கூட்ட வேண்டும்.

இதையே ஆயுதமாக பயன்படுத்தி, பொதுக்குழு உறுப்பினர்களிடமிருந்து ஆதரவு கையெழுத்துகளை சண்முகம் தரப்பு திரட்டிவருவதாக தகவல்கள் தெரிவிக்கின்றன.

மேலும், ஐந்தில் ஒரு பங்கு அல்ல, மூன்றில் ஒரு பங்கு உறுப்பினர்களின் ஆதரவு தங்களுக்கு இருப்பதாகவும் அவர்கள் கூறுகின்றனர்.

இதனால், பொதுக்குழு கூட்டப்பட்டால் அது எடப்பாடி பழனிசாமியின் பொதுச் செயலாளர் பதவிக்கே சிக்கலை ஏற்படுத்தக்கூடும் என அரசியல் வட்டாரங்களில் பரபரப்பாக பேசப்படுகிறது.