மத்திய அரசின் நிதி ஆயோக் கூட்டத்தில் தமிழ்நாட்டின் பொருளாதார வளர்ச்சி, மகளிர் முன்னேற்றம், கல்வி மற்றும் சுகாதார துறைகளின் சாதனைகள் குறித்து முதல்-அமைச்சர் ச. ஜோசப் விஜய் பேசியதைத் தொடர்ந்து, அதற்கு எதிர்க்கட்சித் தலைவர் உதயநிதி ஸ்டாலின் கடுமையான விமர்சனங்களை முன்வைத்துள்ளார்.

இதுதொடர்பாக தனது எக்ஸ் தளப் பதிவில் அவர் தெரிவித்திருப்பதாவது,"சட்டமன்றத் தேர்தல் பிரசார காலத்தில் தமிழ்நாட்டின் பொருளாதார நிலை குறித்து பல்வேறு எதிர்மறை கருத்துகளை முன்வைத்தவர்கள், இன்று நாட்டின் முன்னணி மாநிலங்களில் ஒன்றாக தமிழ்நாடு திகழ்வதாக பெருமையுடன் பேசுவது அரசியல் முரண்பாட்டை வெளிப்படுத்துவதாக உள்ளது.நிதி ஆயோக் கூட்டத்தில் தமிழ்நாடு நாட்டின் இரண்டாவது பெரிய பொருளாதார மாநிலமாக இருப்பது, பணிக்குச் செல்லும் பெண்களில் குறிப்பிடத்தக்க பங்கை தமிழ்நாடு வகிப்பது, மகளிர் கல்வி, பாதுகாப்பு, சுகாதாரம் மற்றும் சுய உதவிக்குழுக்களின் வளர்ச்சி போன்ற அம்சங்கள் குறித்து முதல்-அமைச்சர் விரிவாக எடுத்துரைத்துள்ளார்.

ஆனால், இவ்வாறு பட்டியலிடப்பட்டுள்ள முன்னேற்றங்களும் வளர்ச்சி குறியீடுகளும் தற்போதைய ஆட்சியின் குறுகிய கால செயல்பாடுகளால் உருவானவையா அல்லது முந்தைய ஆட்சிக் காலங்களில் செயல்படுத்தப்பட்ட திட்டங்களின் விளைவுகளா என்பதை மக்களுக்கு தெளிவுபடுத்த வேண்டிய அவசியம் இருப்பதாக அவர் குறிப்பிட்டுள்ளார்.

மேலும், தேர்தலுக்கு முன்பு தேசிய தகுதித் தேர்வு தொடர்பாக முன்வைக்கப்பட்ட கருத்துகளுக்கும், தற்போது விலக்கு கோரி வலியுறுத்தப்படும் நிலைப்பாட்டிற்கும் இடையே முரண்பாடு இருப்பதாகவும் அவர் சுட்டிக்காட்டியுள்ளார்.அதேபோல், டெல்லியில் நடைபெற்ற முக்கிய ஆலோசனைக் கூட்டங்களில் பங்கேற்ற முதல்-அமைச்சர், தமிழகத்தின் நீண்டகால உரிமைப் பிரச்சினைகளில் ஒன்றான மேகதாது விவகாரம் குறித்து போதிய அழுத்தத்தை ஏற்படுத்தவில்லை என்றும் அவர் விமர்சித்துள்ளார்.

குறிப்பாக, காவிரி நீர் தொடர்பான பிரச்சினைகள் தீவிரமாக பேசப்பட்டு வரும் சூழலில், அண்டை மாநில அரசுடன் இந்த விவகாரத்தை வலியுறுத்தி எடுத்துரைக்க வேண்டிய தருணத்தில் அதற்கான உறுதியான குரல் எழுப்பப்படவில்லை என அவர் குற்றம்சாட்டியுள்ளார்.

தமிழ்நாட்டின் வளர்ச்சி சாதனைகள் அனைத்தும் நீண்டகால நிர்வாக முயற்சிகள் மற்றும் திட்டமிட்ட செயல்பாடுகளின் விளைவாக உருவானவை என்றும், அவற்றை தற்போதைய ஆட்சியின் சாதனைகளாக முன்னிறுத்த முயற்சிப்பது அரசியல் தோற்றத்தை உருவாக்கும் முயற்சியாகவே பார்க்கப்படுகிறது என்றும் அவர் தெரிவித்துள்ளார்.

பொதுமக்களுக்கு அளிக்கப்பட்ட வாக்குறுதிகள், தேர்தல் கால பேச்சுகள் மற்றும் தற்போதைய ஆட்சியின் செயல்பாடுகள் ஆகியவற்றுக்கு இடையிலான வேறுபாடுகள் நாளடைவில் வெளிச்சத்துக்கு வரும் என்றும், உண்மையின் அடிப்படையிலான அரசியல் மட்டுமே நிலைத்திருக்கும் என்றும் உதயநிதி ஸ்டாலின் தனது பதிவில் தெரிவித்துள்ளார்.