சென்னை உயர் நீதிமன்றத்தில் தமிழ்நாடு அரசின் சிறு தொழில் மற்றும் பொதுப்பணித்துறை அமைச்சர் ஆதவ் அர்ஜுனா சிவில் அவதூறு மனு ஒன்றை தாக்கல் செய்துள்ளார். அதில், முன்னாள் முதலமைச்சரும் திமுக தலைவருமான மு.க.ஸ்டாலினின் நேரடிக் கட்டுப்பாட்டிலும் மேற்பார்வையிலும் இயங்கும் திமுக தகவல் தொழில்நுட்பப் பிரிவு (IT Wing), கடந்த ஜூன் 8-ஆம் தேதி சமூக வலைதளப் பக்கத்தில் தமக்கு எதிராக உண்மைக்கு மாறான அவதூறு பதிவு ஒன்றை வெளியிட்டதாகக் குறிப்பிட்டுள்ளார்.

அமலாக்கத்துறை சென்னை மற்றும் ராமநாதபுரத்தில் பறிமுதல் செய்த ரூ.258 கோடி மதிப்பிலான போதைப்பொருள் கடத்தல் வழக்கில் தொடர்புடைய ஜான் பிரிட்டோ என்பவர், அமைச்சர் ஆதவ் அர்ஜுனாவின் நெருங்கிய உறவினர் என அந்தப் பதிவில் குறிப்பிடப்பட்டிருந்தது தமக்கு மிகப்பெரிய அவப்பெயரை ஏற்படுத்தியுள்ளதாக அவர் தெரிவித்துள்ளார்.

சமூக வலைதளத் தாக்கம் மற்றும் இழப்பீட்டுக் கோரிக்கை

பரவிய விதம்: இப் பொய்யான பதிவு குறுகிய காலத்தில் சுமார் 2 லட்சத்து 67 ஆயிரம் பேரால் பார்க்கப்பட்டு, 2,600 மறுபதிவுகளையும் (Reposts) 4,400 விருப்பங்களையும் (Likes) பெற்றுத் தமக்கு நற்பெயருக்குக் களங்கம் ஏற்படுத்தியதாகத் தெரிவித்துள்ளார்.

மறுப்பும் விளக்கமும்: ஜான் பிரிட்டோ என்பவர் தனக்கு உறவினரே இல்லை என்றும், சம்பந்தப்பட்ட பி.ஜான் பிரிட்டோ என்பவர் சென்னை காவல் ஆணையர் அலுவலகத்தில் புகார் அளித்து, அமலாக்கத்துறை குறிப்பிடும் நபர் தான் இல்லை எனத் தெளிவுபடுத்தியுள்ளதாகவும் மனுவில் சுட்டிக்காட்டப்பட்டுள்ளது.

ரூ.1 கோடி இழப்பீடு: மு.க.ஸ்டாலினின் அனுமதியோடு பராமரிக்கப்படும் கணக்கில் இப் பதிவு வெளியானதால் அவரே இதற்கு முழுப் பொறுப்பு எனக் குறிப்பிட்ட அமைச்சர், திமுக ஐடி விங் மற்றும் மு.க.ஸ்டாலின் ஆகியோர் இணைந்து தமக்கு ரூ.1 கோடி இழப்பீடு வழங்க வேண்டும் என்றும், அப்பதிவை உடனடியாகச் சமூக வலைதளத்தில் இருந்து நீக்க உத்தரவிட வேண்டும் என்றும் கோரியுள்ளார்.

உயர் நீதிமன்ற விசாரணை மற்றும் நோட்டீஸ் உத்தரவு

இவ் வழக்கு சென்னை உயர் நீதிமன்ற நீதிபதி கோவிந்தராஜன் திலகவதி முன்பு விசாரணைக்கு வந்தது. மனுதாரர் சார்பில் வழக்கறிஞர் ஏ.பி.சூரியபிரகாசம் ஆஜராகி வாதாடினார். வாதங்களை ஏற்றுக்கொண்ட நீதிபதி, இப் புகார் மனு தொடர்பாக திமுக தலைவர் மு.க.ஸ்டாலின் மற்றும் திமுக தகவல் தொடர்புக் குழு ஆகிய இரு தரப்பும் வரும் செப்டம்பர் 15-ஆம் தேதிக்குள் விரிவான பதில் மனு தாக்கல் செய்யுமாறு அதிகாரப்பூர்வ நோட்டீஸ் அனுப்ப உத்தரவிட்டுள்ளார்.