தமிழக சட்டமன்றத் தேர்தல் வாக்குப்பதிவு முடிந்து, அதன் அதிகாரப்பூர்வ முடிவுகள் நாளை (மே 4, 2026) வெளியாக உள்ள நிலையில், மாநில அரசியல் களம் மிகுந்த பரபரப்புடன் காணப்படுகிறது. இத்தேர்தலில் முதல்முறையாகத் தனித்துப் போட்டியிட்டுள்ள தமிழக வெற்றிக் கழகத்தின் (தவெக) தலைவர் விஜய், தனது கட்சி வேட்பாளர்களைப் பாதுகாக்கவும், பிற கட்சிகளின் 'குதிரை பேர' முயற்சிகளை முறியடிக்கவும் கடந்த இரண்டு நாட்களாகத் தீவிர ஆலோசனையில் ஈடுபட்டு வருகிறார்.

விஜய் நேரடியாகப் போட்டியிட்டுள்ள பெரம்பூர் மற்றும் திருச்சி கிழக்கு ஆகிய இரு தொகுதிகளின் முடிவுகள் அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளன.

சமீபத்தில் வெளியான பல்வேறு கருத்துக்கணிப்புகள் திமுக-வுக்குச் சாதகமாகத் தெரிந்தாலும், தவெக தரப்பில் கள நிலவரம் தங்களுக்குச் சாதகமாக இருப்பதாகவே நம்பப்படுகிறது.

இச்சூழ்நிலையில், வெற்றி வாய்ப்புள்ள தவெக வேட்பாளர்களை இழுக்க திமுக மற்றும் அதிமுக ஆகிய பிரதான கட்சிகள் திட்டமிட்டுள்ளதாகக் கிடைத்த ரகசியத் தகவல்களே விஜய்யின் இந்த அதிரடி ஆலோசனைகளுக்குக் காரணம் என்று கூறப்படுகிறது.

இதனை முறியடிக்கும் விதமாக, தமிழகத்தின் 234 தொகுதிகளிலும் போட்டியிட்ட தனது வேட்பாளர்களுடன் விஜய் அவசர ஆலோசனையை முடித்துள்ளார்.

இந்த ஆலோசனையின் போது, "தேர்தல் முடிவுகள் அறிவிக்கப்பட்டு வெற்றிச் சான்றிதழைப் பெற்றவுடன், வேட்பாளர்கள் எங்கும் செல்லாமல் நேரடியாகப் பனையூரில் உள்ள கட்சித் தலைமை அலுவலகத்திற்கு வர வேண்டும்" என்று அவர் திட்டவட்டமாகக் கட்டளையிட்டுள்ளார்.

மேலும், வாக்கு எண்ணிக்கை நடைபெறும் மையங்களில் எவ்வித இடையூறுகளும் அல்லது முறைகேடுகளும் ஏற்படாமல் இருக்கக் கூடுதல் பாதுகாப்பு கோரி தலைமைத் தேர்தல் அதிகாரியிடம் மனு அளிக்க ஆதவ் அர்ஜுனாவுக்கு அவர் உத்தரவிட்டார். அதன்படி, தேர்தல் ஆணையத்திடம் பாதுகாப்பு தொடர்பான மனு நேற்று சமர்ப்பிக்கப்பட்டது.

வாக்கு எண்ணிக்கையின் போது ஏதேனும் மிரட்டல்களோ, அச்சுறுத்தல்களோ அல்லது நெருக்கடிகளோ ஏற்பட்டால், வேட்பாளர்கள் தன்னிடம் நேரடியாகப் பேச ஒரு பிரத்யேகத் தொடர்பு எண்ணையும் விஜய் வழங்கியுள்ளார்.

கட்சியின் பொதுச்செயலாளர் புஸ்ஸி ஆனந்த் மற்றும் ஆதவ் அர்ஜுனா ஆகியோரிடம், ஒவ்வொரு வேட்பாளரையும் பத்திரமாகப் பாதுகாத்துப் பனையூருக்குக் கொண்டு வந்து சேர்க்க வேண்டியது அவர்களது தலையாய பொறுப்பு என்று அவர் வலியுறுத்தியுள்ளார். நாளை முடிவுகள் வெளியாக உள்ள நிலையில், விஜய்யின் இந்தத் தற்காப்பு வியூகங்கள் அவரது அரசியல் முதிர்ச்சியைக் காட்டுவதாகத் தொண்டர்கள் மற்றும் அரசியல் விமர்சகர்கள் கருதுகின்றனர்.