தமிழகச் சட்டமன்றத் தேர்தல் முடிவுகளுக்குப் பிந்தைய அரசியல் பரபரப்புகளுக்கு இடையே, விடுதலைச் சிறுத்தைகள் கட்சியின் (விசிக) தலைவர் தொல். திருமாவளவன் தனியார் தொலைக்காட்சி ஒன்றுக்கு அளித்த பிரத்யேகப் பேட்டியில், தவெக ஆட்சியமைப்பதற்கு முன் பின்னணியில் நடந்த அதிரடி அரசியல் நகர்வுகள் மற்றும் சிறுபான்மையின வாக்குகள் தவெக-விற்கு மாறிய விதம் குறித்துப் பல அதிரடி உண்மைகளை உடைத்துள்ளார்.

"என்னை முதலமைச்சராக்க திமுக, அதிமுக முயற்சி":

தேர்தலில் எந்தக் கட்சிக்கும் தனிப் பெரும்பான்மை கிடைக்காத நிலையில், 108 இடங்களைப் பெற்ற தவெக-விற்கு ஆதரவளிப்பதில் விசிக ஏன் காலதாமதம் செய்தது என்ற கேள்விக்குத் திருமாவளவன் பதிலளித்ததாவது:

பின்னால் நடந்த வியூகம்: "நாங்களும் இடதுசாரிகளும் தவெக-விற்கு ஆதரவளிப்பது என்று முடிவெடுத்துக் கடிதத்தைத் தயார் செய்தோம். ஆனால், நாங்கள் ஆதரவுக் கடிதம் கொடுப்பதற்கு முன்பே, என்னை முதலமைச்சராக்க ஒரு மறைமுக முயற்சி நடந்தது. நான் முதலமைச்சராகப் பொறுப்பேற்றால், தங்களுக்குள் பேசி அதிமுக தரப்பில் துணை முதலமைச்சர் பதவிக்கு ஒப்புக்கொள்வதாகவும், நீங்கள் சம்மதித்தால் நாங்கள் (திமுக) வெளியில் இருந்து ஆதரவு தருவதாகவும் எனக்குத் தகவல்கள் வந்தன."

"முதலில் நான் இதை ஒரு வேடிக்கையாக (Fun) தான் எடுத்துக்கொண்டேன். ஆனால், அவர்கள் இந்த நகர்வை மிகவும் தீவிரமாகச் செய்து கொண்டிருக்கிறார்கள் என்று சொன்னார்கள். எனினும், நாங்கள் உடனடியாகப் பத்திரிகையாளர்களைச் சந்தித்து தவெக-விற்கான எங்கள் ஆதரவை முறைப்படி அறிவித்துவிட்டோம்" என்று அந்தப் பரபரப்பான சூழலை விவரித்தார்.

"ஜோசப் விஜய் பிராண்ட்" - சிறுபான்மையினர் வாக்குகள் மாற்றம்:

தேர்தல் களத்தில் தவெக-வின் வாக்கு வங்கிப் பலம் மற்றும் விசிக-விற்கு ஏற்பட்ட பாதிப்புகள் குறித்துத் திருமாவளவன் சுட்டிக்காட்டிய முக்கியக் காரணங்கள்:

கிறிஸ்தவ வாக்குகள் இடமாற்றம்: "சினிமாவில் வெறும் 'விஜய்' என்று அறியப்பட்டவர், அரசியலுக்கு வந்தவுடன் 'ஜோசப் விஜய்' என்று பிராண்ட் படுத்தப்பட்டார். இதன் விளைவாக, எங்களது முக்கிய பலமாக இருந்த சிறுபான்மையின வாக்குகள் பெருமளவில் தவெக பக்கம் சாய்ந்துவிட்டன. குறிப்பாக, சுமார் 80 சதவீத கிறிஸ்தவ வாக்குகள் தவெக-விற்குச் சென்றுவிட்டன."

முஸ்லிம் மற்றும் கோர் வாக்குகளில் சேதாரம்: "திமுக-விற்கு எப்போதும் முழுமையாகக் கிடைக்கும் முஸ்லிம் வாக்குகளில் இந்த முறை 60 முதல் 70 சதவீத வாக்குகள் மட்டுமே கிடைத்துள்ளன; அங்கேயும் பெரிய சேதாரம் ஏற்பட்டுள்ளது. எங்களது பிரச்சாரம் முழுக்க பாஜக-விற்கு எதிராக இருந்ததால், அது தவெக-விற்குச் சாதகமாக அமைந்துவிட்டது. திமுக, அதிமுக, நாதக, பாஜக ஆகிய அனைத்துக் கட்சிகளின் முக்கிய (Core) வாக்குகளும் தவெக பக்கம் நகர்ந்தது எங்களுக்குப் பெரிய பாதிப்பை ஏற்படுத்தியுள்ளது" எனத் திருமாவளவன் ஓப்பனாகத் தெரிவித்துள்ளார்.