இசைஞானி இளையராஜாவுக்கு தற்போது 83 வயதாகிறது. ஆனால், வயதைப் பொருட்படுத்தாமல் தொடர்ந்து பரபரப்பாக இசையமைத்து வருகிறார். தமிழில் அடுத்தடுத்து ‘டோரதி’, ‘லெனின் பாண்டியன்’ உள்ளிட்ட படங்கள் அவரது இசையில் வெளியாக உள்ளன. இதற்கிடையே, இளையராஜா இசையமைத்துள்ள இரண்டு திரைப்படங்கள் ஆஸ்கர் போட்டிக்கான தேர்வில் இடம்பெற்றுள்ள தகவல் அவரது ரசிகர்கள் மத்தியில் மிகப்பெரிய எதிர்பார்ப்பை ஏற்படுத்தியுள்ளது.

இளையராஜா என்ற பெயருக்கு தமிழ் சினிமாவில் எந்த அறிமுகமும் தேவையில்லை. பல தலைமுறைகளைத் தாண்டியும் அவரது இசை ரசிகர்களை கவர்ந்து வருகிறது. குறிப்பாக தற்போதைய இளம் தலைமுறையினரையும் தனது இசையால் ஈர்த்து வரும் அவர், இன்றைய இளம் இசையமைப்பாளர்களுக்கு இணையாக தொடர்ந்து புதிய படங்களுக்கு இசையமைத்து வருகிறார்.

சமீபத்தில் அவரது இசையில் வெளியான ‘ஜமா’, ‘விடுதலை 2’ உள்ளிட்ட படங்களின் பாடல்கள் மற்றும் பின்னணி இசை ரசிகர்களிடையே கவனம் பெற்றன. தொடர்ந்து புதிய படங்களுக்கும் இசையமைத்து வரும் இளையராஜா, தற்போது ‘லெனின் பாண்டியன்’ படத்துக்கும் இசையமைத்துள்ளார்.

அதேபோல், இயக்குநர் கார்த்திக் சுப்புராஜ் இயக்கத்தில் உருவாகியுள்ள ‘டோரதி’ திரைப்படத்துக்கும் இளையராஜா இசையமைத்துள்ளார். கார்த்திக் சுப்புராஜ் இளையராஜாவின் தீவிர ரசிகர் என்பதால், இருவரது கூட்டணியில் உருவாகும் இசை எப்படி இருக்கும் என்ற எதிர்பார்ப்பு ஆரம்பம் முதலே ரசிகர்கள் மத்தியில் இருந்தது.

குறிப்பாக தற்போதைய காலகட்டத்துக்கு ஏற்ற வகையில் இளையராஜா இசையமைக்க முடியுமா என்ற கேள்வியும் சமூக வலைதளங்களில் பேசப்பட்டது. ஆனால், ‘டோரதி’ படத்தின் பாடல்கள் வெளியாகிய நிலையில், தனது இசைக்கு காலம் ஒரு தடையல்ல என்பதை மீண்டும் நிரூபித்திருப்பதாக ரசிகர்கள் கருத்து தெரிவித்து வருகின்றனர்.

இந்தப் படத்தில் இடம்பெற்றுள்ள ‘கல்யாண விருந்து’, ‘முத்துமணிச்சரம்’ உள்ளிட்ட பாடல்கள் ரசிகர்களிடம் வெவ்வேறு விதமான வரவேற்பை பெற்றுள்ளன. குறிப்பாக ‘கல்யாண விருந்து’ பாடல் திருமண நிகழ்ச்சிகளில் அதிகம் ஒலிக்கத் தொடங்கியுள்ளதாக கூறப்படுகிறது. இளையராஜாவின் இசை பல தலைமுறைகளாக திருமண நிகழ்ச்சிகளின் முக்கிய அங்கமாக இருந்து வரும் நிலையில், இந்தப் பாடலும் அந்த வரிசையில் இடம்பெறுமா என்ற எதிர்பார்ப்பு உருவாகியுள்ளது.

இளையராஜாவின் சாதனைகளைப் பொறுத்தவரை, அவர் 1,500-க்கும் மேற்பட்ட திரைப்படங்களுக்கு இசையமைத்துள்ளார். சிம்பொனி உள்ளிட்ட சர்வதேச இசை முயற்சிகளிலும் கவனம் செலுத்தியுள்ளார். மேலும் தேசிய அளவில் பல விருதுகளையும் பெற்றுள்ளார். இருப்பினும், உலகின் மிகப்பெரிய திரைப்பட விருதுகளில் ஒன்றான ஆஸ்கர் விருது அவரது கைகளில் இதுவரை இடம்பெறவில்லை.

இளையராஜாவுக்குப் பிறகு சர்வதேச அளவில் கவனம் பெற்ற ஏ.ஆர்.ரஹ்மான் ஆஸ்கர், கிராமி, கோல்டன் குளோப் உள்ளிட்ட முக்கிய விருதுகளை வென்றுள்ள நிலையில், இளையராஜாவுக்கும் சர்வதேச அளவில் அங்கீகாரம் கிடைக்குமா என்ற எதிர்பார்ப்பு அவரது ரசிகர்களிடம் நீண்ட காலமாக இருந்து வருகிறது.

இந்த நிலையில், அந்த எதிர்பார்ப்பை மேலும் அதிகரிக்கும் வகையில் 2027ஆம் ஆண்டுக்கான ஆஸ்கர் போட்டியில் இளையராஜாவின் இசை இடம்பெற்றுள்ள இரண்டு திரைப்படங்கள் கவனம் பெற்றுள்ளன. இந்தியா சார்பில் சிறந்த சர்வதேச திரைப்படப் பிரிவுக்கான போட்டியில் மராத்தி திரைப்படமான ‘கோந்தல்’ இடம்பெற்றுள்ளதாகவும், இலங்கை சார்பில் ‘அந்தோனி’ திரைப்படம் இடம்பெற்றுள்ளதாகவும் தகவல்கள் தெரிவிக்கின்றன.

இந்த இரண்டு திரைப்படங்களுக்கும் இளையராஜா இசையமைத்துள்ளார் என்பது குறிப்பிடத்தக்கது. இதனால், ஆஸ்கர் போட்டியில் இளையராஜாவின் இசை இடம்பெற்றிருப்பது அவரது ரசிகர்களின் எதிர்பார்ப்பை அதிகரித்துள்ளது. இரண்டு படங்களில் ஏதேனும் ஒரு திரைப்படம் இறுதிப்போட்டிக்கு முன்னேறுமா, அதன் மூலம் இளையராஜாவின் இசைக்கு ஆஸ்கர் அங்கீகாரம் கிடைக்குமா என்பது அடுத்தகட்டத் தேர்வுகளுக்குப் பிறகே தெரியவரும்.