தமிழ்நாட்டிற்குப் புதிய தொழில் முதலீடுகளை ஈர்ப்பதற்காக முதலமைச்சர் ச. ஜோசப் விஜய் அண்மையில் லண்டனுக்கு அரசுமுறைப் பயணம் மேற்கொண்டிருந்தார். அப்பயணத்தின் போது, லண்டனில் நடைபெற்ற கார் பந்தயப் போட்டியில் பங்கேற்ற நடிகர் அஜித்குமாரை நேரில் சந்தித்து, அப்பந்தயத்தை முதலமைச்சர் தொடங்கிவைத்தார். இந்த நிகழ்வில் நடிகை த்ரிஷா உள்ளிட்ட பல திரை பிரபலங்களும் கலந்துகொண்டனர்.

முதலமைச்சரின் இந்த முக்கியப் பயணத்தில் பொதுப்பணித்துறை அமைச்சர் ஆதவ் அர்ஜூனா, முதலமைச்சரின் தனிப் பாதுகாவலர் மற்றும் அவரின் ஜோதிட ஆலோசகர் உள்ளிட்டோர் உடன் சென்றிருந்தனர். ஆனால், மாநிலத்திற்குப் புதிய தொழில் முதலீடுகளை ஈர்க்கச் சென்ற அதிகாரப்பூர்வப் பயணத்தில், தொழில்துறை அமைச்சர் கீர்த்தனா கலந்துகொள்ளாதது அரசியல் களத்தில் பெரும் விவாதப் பொருளானது. தொழில்துறை அமைச்சர் இல்லாமலேயே முதலீடுகளை ஈர்க்கப் பயணம் மேற்கொள்ளப்பட்டுள்ளதாக எதிர்க்கட்சிகள் கடுமையான விமர்சனங்களை முன்வைத்தன.

இதனைத் தொடர்ந்து, அமைச்சர் கீர்த்தனாவுக்கு ஏற்பட்ட திடீர் உடல்நலக் குறைவு காரணமாகவே அவர் லண்டன் செல்லவில்லை என்றும், அதனாலேயே தாம் முதலமைச்சருடன் பயணிக்க நேரிட்டது என்றும் அமைச்சர் ஆதவ் அர்ஜூனா ஏற்கனவே விளக்கமளித்திருந்தார்.

இந்நிலையில், தம் மீதான எதிர்க்கட்சிகளின் விமர்சனங்களுக்கும் வூகங்களுக்கும் முற்றுப்புள்ளி வைக்கும் வகையில், அமைச்சர் கீர்த்தனா தனது சிகிச்சை தொடர்பான மருத்துவச் சான்றிதழ்களை அதிகாரப்பூர்வமாக வெளியிட்டுள்ளார். சென்னை பள்ளிக்கரணியில் உள்ள காமாட்சி மருத்துவமனையில் தாம் அனுமதிக்கப்பட்டுச் சிகிச்சை பெற்றதற்கான மருத்துவ ஆவணங்களை அவர் பகிர்ந்துள்ளார். இதன் மூலம், முதலமைச்சரின் லண்டன் பயணத்தின் போது தாம் உண்மையிலேயே மருத்துவச் சிகிச்சையில் இருந்ததை ஆதாரப்பூர்வமாக உறுதிப்படுத்தியுள்ளார்.