தமிழக சட்டசபை தேர்தலில் யாரும் எதிர்பாராத வகையில் கட்சி தொடங்கிய இரண்டே ஆண்டுகளில் தமிழக வெற்றிக் கழகம் ஆட்சியை பிடித்து, விஜய் முதலமைச்சராக பதவியேற்றது தமிழக அரசியலில் மிகப்பெரிய மாற்றமாக பார்க்கப்படுகிறது. கடந்த பல தசாப்தங்களாக மாறி மாறி ஆட்சி செய்து வந்த திமுக மற்றும் அதிமுக ஆகிய இரு திராவிடக் கட்சிகளுக்கும் இந்த தேர்தல் முடிவு பெரும் அதிர்ச்சியை ஏற்படுத்தியுள்ளது.

1967 முதல் தமிழக அரசியலில் ஆதிக்கம் செலுத்தி வந்த திமுக மற்றும் அதிமுக ஆகிய இரு கட்சிகளையும் எதிர்க்கட்சிப் பெஞ்சில் அமர வைத்திருப்பது விஜய்யின் மிகப்பெரிய அரசியல் சாதனையாக கருதப்படுகிறது.

தேர்தல் தோல்விக்கான காரணங்களை ஆராய திமுக அமைப்பு ரீதியான ஆலோசனைகளை தொடங்கியுள்ளது. மாவட்ட அளவிலான மாற்றங்கள், இளைஞர்களுக்கு முக்கியத்துவம் போன்ற நடவடிக்கைகள் குறித்து கட்சியில் தீவிரமாக பேசப்பட்டு வருகிறது.

ஆனால் அதிமுகவின் நிலைமை இன்னும் சிக்கலானதாக மாறியுள்ளது. எடப்பாடி பழனிசாமி தலைமையிலான அணியும், எஸ்.பி. வேலுமணி - சி.வி. சண்முகம் தலைமையிலான அணியும் தனித்தனியாக செயல்பட்டு வருகின்றன. 47 எம்எல்ஏக்கள் கொண்ட அதிமுக தற்போது இரு அணிகளாகப் பிரிந்திருப்பது கட்சிக்குள் பெரிய அதிருப்தியை ஏற்படுத்தியுள்ளது.

சட்டசபைத் தேர்தலில் வெற்றி பெற்றதோடு மட்டும் இல்லாமல், தற்போது திமுக மற்றும் அதிமுக நிர்வாகிகளை தங்கள் பக்கம் இழுக்கும் பணியிலும் தவெக தீவிரமாக ஈடுபட்டு வருவதாக கூறப்படுகிறது.

தமிழகத்தில் விரைவில் உள்ளாட்சித் தேர்தல் நடைபெறும் என எதிர்பார்க்கப்படும் நிலையில், பல்வேறு மாவட்டங்களில் இருந்து இரு பெரிய கட்சிகளின் நிர்வாகிகள் தவெகவில் இணைந்து வருவது அரசியல் வட்டாரங்களில் பெரும் கவனத்தை ஈர்த்துள்ளது.

குறிப்பாக கொங்கு மண்டலத்தில் திமுக மற்றும் அதிமுக நிர்வாகிகள் தவெகவில் இணையத் தொடங்கியிருப்பது அக்கட்சிகளுக்கு கவலையை ஏற்படுத்தியுள்ளது.

சமீபத்தில்:

• ஈரோடு திமுக மாநில நிர்வாகி எல்லோராபாளையம் ஆர். சிவக்குமார்,

• நாமக்கல் கிழக்கு மாவட்ட பொருளாளர் ஏ.கே. பாலச்சந்தர்,

• ராசிபுரம் முன்னாள் நகராட்சி உறுப்பினர்கள் ராம்குமார் மற்றும் ‘கேட்’ தங்கவேல் ஆகியோர் தவெகவில் இணைந்தனர்.

அதேபோல் அதிமுகவிலிருந்து:

• முன்னாள் அமைச்சர் கே.வி. ராமலிங்கம்,

• சேலம் மாநகர அதிமுக எம்ஜிஆர் மன்ற இணை செயலாளர் கண்ணன்,

• அவரது மகன் சஞ்சய் உள்ளிட்டோர் கே.ஏ. செங்கோட்டையன் முன்னிலையில் தவெகவில் இணைந்தனர்.

தவெக விரிவாக்கத்தில் செங்கோட்டையன் முக்கிய பங்கு?

கொங்கு மண்டலத்தில் அதிமுக மற்றும் திமுக முக்கிய நிர்வாகிகளை தவெகவுக்கு அழைக்கும் பணியில் கே.ஏ. செங்கோட்டையன் மற்றும் அவரது ஆதரவாளர்கள் தீவிரமாக செயல்பட்டு வருவதாக தகவல்கள் வெளியாகியுள்ளன.

இதனால், “இது வெறும் தொடக்கம் மட்டுமே; இன்னும் பலர் தவெகவில் இணைய தயாராக உள்ளனர்” என அரசியல் வட்டாரங்களில் பேசப்படுகிறது.

உள்ளாட்சி தேர்தல் விரைவில் அறிவிக்கப்படும் என்ற எதிர்பார்ப்பும் கட்சித் தாவலுக்கு முக்கிய காரணமாக பார்க்கப்படுகிறது. “சட்டசபை தேர்தலில் கிடைத்த வெற்றியை உள்ளாட்சியிலும் தவெக தொடரும்” என்ற நம்பிக்கையால் பலர் ஆளும் கட்சியை நோக்கி நகர்ந்து வருவதாக திமுக மற்றும் அதிமுக நிர்வாகிகளே ஒப்புக்கொள்கிறார்கள்.

இதனால், வரும் மாதங்களில் தமிழக அரசியலில் மேலும் பல அதிரடி மாற்றங்கள் நிகழக்கூடும் என்ற எதிர்பார்ப்பு அதிகரித்துள்ளது.