சென்னை தலைமைச் செயலகத்தில் செய்தியாளர்களைச் சந்தித்த தவெக அமைச்சர் நிர்மல் குமார், தற்போதைய தவெக ஆட்சியை வீழ்த்துவதற்காகப் பின்னணியில் நடந்து வரும் அதிர்ச்சிகரமான அரசியல் சதித்திட்டங்களை அம்பலப்படுத்தியுள்ளார். தமிழக வெற்றிக் கழகத்தின் அரசை நிலைகுலையச் செய்ய கடந்த 40 நாட்களாகத் திட்டமிட்ட முயற்சிகள் திரைமறைவில் அரங்கேறி வருவதாக அவர் குற்றம் சாட்டியுள்ளார். தவெக சட்டமன்ற உறுப்பினர்களை விலைக்கு வாங்குவதற்காக 10 கோடி ரூபாய் முதல் 50 கோடி ரூபாய் வரை மிகப்பிரமாண்டமான முறையில் குதிரை பேரம் பேசப்பட்டுள்ளதாக அவர் தெரிவித்துள்ளார்.

இந்த சதியின் பின்னணியில் திமுக தலைவர் மு.க.ஸ்டாலினும், அதிமுக பொதுச்செயலாளர் எடப்பாடி பழனிசாமியும் கைகோர்த்துக்கொண்டு, குறுக்கு வழியில் ஆட்சிப்பீடத்தைக் கைப்பற்றத் துடிப்பதாக அமைச்சர் சாடியுள்ளார். குறிப்பாக, திமுக தரப்பிலிருந்து பேரம் பேசப்படாத தவெக எம்எல்ஏக்களே எவருமில்லை என்ற அளவிற்கு அநாகரிக அரசியல் நடப்பதாகவும், கரூரைச் சேர்ந்த முக்கிய நபர்கள் மற்றும் கம்பெனியைச் சேர்ந்தவர்களே இந்த பேரங்களை முன்னின்று நடத்தியதாகவும் அவர் குறிப்பிட்டுள்ளார். மேலும், உதயநிதி ஸ்டாலினின் நேரடி உத்தரவின் பேரிலேயே தவெக எம்எல்ஏக்களுக்குப் பணம் கொடுக்க முயன்றதாக அவர் பகிரங்கமாகத் தெரிவித்துள்ளார்.

தவெகவினர் பண பலத்தாலோ அல்லது ஓட்டுக்கு 2000 ரூபாய் கொடுத்தோ இந்த ஆட்சியை அமைக்கவில்லை, மக்களின் தூய ஆதரவாலேயே வென்றுள்ளனர் என்று குறிப்பிட்ட நிர்மல் குமார், எடப்பாடி பழனிசாமியை மீண்டும் முதலமைச்சராக்க மு.க.ஸ்டாலின் மேற்கொண்ட கேவலமான முயற்சிகள் தோல்வியில் முடிந்துள்ளதாகக் கூறினார். குதிரை பேரத்தில் ஈடுபடும் மு.க.ஸ்டாலினுக்கு அரசியல் நாகரிகம் இருந்தால் அவர் உடனடியாக அரசியலில் இருந்து ஒதுங்க வேண்டும் என்றும் அவர் வலியுறுத்தினார்.

தற்போது மிரட்டலுக்கு உள்ளான தவெக எம்எல்ஏ ஒருவர் அளித்த அதிகாரப்பூர்வ புகாரின் அடிப்படையிலேயே இந்த கைது நடவடிக்கைகள் தொடங்கியுள்ளன. இதில் கைது செய்யப்பட்டுள்ள நாரேஷ் என்பவர் தொடர்ந்து செந்தில் பாலாஜியுடன் தொடர்பில் இருந்து வந்துள்ளார். இந்த குதிரை பேர சதியில் ஈடுபட்ட அனைவர் மீதும் சட்டப்பூர்வமாகக் கடுமையான நடவடிக்கைகள் எடுக்கப்படும் என்றும், தவெக எம்எல்ஏக்களை யாராலும் விலை கொடுத்து வாங்க முடியாது என்றும் அவர் எச்சரித்துள்ளார். எப்போது தேர்தல் வந்தாலும் அதனைச் சந்திக்கத் தவெக தயாராக உள்ளதாகக் கூறிய அவர், திமுகவின் இத்தகைய செயல்பாடுகளைத் தமிழக மக்கள் கூர்ந்து கவனித்து வருவதாகவும், உரிய பாடம் புகட்டுவார்கள் என்றும் கூறினார்.