தமிழகத்தில் மகளிர் உரிமைத் தொகைக்காக இனி யாரும் தனியாக மனு கொடுக்கத் தேவையில்லை என்றும், முதலமைச்சர் விஜய் ரூ.2,500 திட்டத்தை தொடங்கி வைக்கும்போது தற்போது உதவித்தொகை பெறுபவர்கள் மட்டுமின்றி இதுவரை பணம் கிடைக்காத தகுதியான குடும்பத் தலைவிகளுக்கும் தானாகவே பணம் கிடைக்கும் என்றும் இந்து சமய அறநிலையத்துறை அமைச்சர் ரமேஷ் தெரிவித்துள்ளார்.

“இதுவரை மகளிர் உரிமைத் தொகை வாங்கியவர்களாக இருந்தாலும் சரி, இதுவரை ஒரு ரூபாய் கூட வாங்காதவர்களாக இருந்தாலும் சரி, அனைவரின் பெயர்களும் பட்டியலில் சேர்க்கப்படும். இதற்காக தனித்தனியாக மனு கொடுத்து வரிசையில் நிற்க வேண்டாம்” என்று அமைச்சர் ரமேஷ் கூறியிருப்பது பெண்கள் மத்தியில் மிகப்பெரிய எதிர்பார்ப்பை ஏற்படுத்தியுள்ளது.

கடந்த திமுக ஆட்சியில் தொடங்கப்பட்ட மகளிர் உரிமைத் தொகை திட்டம், தற்போது முதலமைச்சர் விஜய் தலைமையிலான தவெக ஆட்சியிலும் தொடர்ந்து செயல்படுத்தப்பட்டு வருகிறது.

இந்தத் திட்டத்தின் கீழ் தகுதியான குடும்பத் தலைவிகளுக்கு மாதந்தோறும் ரூ.1,000 வழங்கப்பட்டு வருகிறது.

ஆனால் 2026 சட்டமன்றத் தேர்தலின்போது தமிழக வெற்றிக் கழகம் வெளியிட்ட தேர்தல் அறிக்கையில், குடும்பத் தலைவிகளுக்கு மாதந்தோறும் ரூ.2,500 மகளிர் உரிமைத் தொகை வழங்கப்படும் என்று வாக்குறுதி அளிக்கப்பட்டிருந்தது.

தவெக ஆட்சியைப் பிடித்து முதலமைச்சராக விஜய் பொறுப்பேற்ற பிறகு, அந்த வாக்குறுதி எப்போது நிறைவேற்றப்படும் என்ற எதிர்பார்ப்பு தமிழக பெண்கள் மத்தியில் தொடர்ந்து இருந்து வருகிறது.

குறிப்பாக, தற்போது ரூ.1,000 பெற்று வரும் பெண்கள், அந்தத் தொகை எப்போது ரூ.2,500 ஆக உயர்த்தப்படும் என்று எதிர்பார்த்து வருகின்றனர்.

அதேபோல், கடந்த ஆட்சியில் விண்ணப்பித்தும் மகளிர் உரிமைத் தொகை கிடைக்காதவர்கள் மற்றும் புதிதாக இந்தத் திட்டத்தில் இணைய விரும்பும் குடும்பத் தலைவிகள் பலரும் தனித்தனியாக மனுக்களை அளித்து வருகின்றனர்.

மாவட்ட ஆட்சியர் அலுவலகங்கள், மக்கள் குறைதீர் கூட்டங்கள் மற்றும் அமைச்சர்களின் தொகுதி அலுவலகங்களில் மகளிர் உரிமைத் தொகை தொடர்பான மனுக்கள் அதிக அளவில் அளிக்கப்பட்டு வருவதாக கூறப்படுகிறது.

இந்த நிலையில்தான், மகளிர் உரிமைத் தொகை தொடர்பாக அமைச்சர் ரமேஷ் முக்கிய விளக்கம் ஒன்றை அளித்துள்ளார்.

திருச்சியில் இன்று நடைபெற்ற மக்கள் குறைதீர் கூட்டத்தில் இந்து சமய அறநிலையத்துறை அமைச்சரும் ஸ்ரீரங்கம் தொகுதி எம்எல்ஏவுமான ரமேஷ் கலந்துகொண்டார்.

அப்போது பொதுமக்களை நேரில் சந்தித்து அவர்களின் குறைகளை கேட்டறிந்த அவர், பல்வேறு கோரிக்கைகள் தொடர்பான மனுக்களையும் பெற்றுக்கொண்டார்.

அப்போது பேசிய அமைச்சர் ரமேஷ், பொதுமக்கள் அளிக்கும் அனைத்து மனுக்களுக்கும் உடனடியாக தீர்வு கிடைத்துவிடும் என்று எதிர்பார்க்க முடியாது என்றாலும், ஒவ்வொரு மனுவும் முறையாக பரிசீலிக்கப்பட்டு உரிய நடவடிக்கை எடுக்கப்படும் என்று உறுதியளித்தார்.

“ஒரு மனு கொடுத்த உடனேயே அதை நிறைவேற்ற முடியாது என்பது அனைவருக்கும் தெரியும். ஆனால் கண்டிப்பாக அந்த மனு மீது உரிய நடவடிக்கை எடுக்கப்படும். கொஞ்சம் கால அவகாசம் மட்டும் கொடுங்கள். நம்முடைய முதலமைச்சர் விஜய் அனைவருக்கும் தேவையானதை செய்து கொடுப்பார்” என்று அவர் கூறினார்.

பொதுமக்கள் மிகப்பெரிய கோரிக்கைகளை முன்வைக்கவில்லை என்றும், பெரும்பாலும் அடிப்படை வசதிகள் தொடர்பான கோரிக்கைகளையே தெரிவித்து வருவதாகவும் அமைச்சர் ரமேஷ் கூறினார்.

அதைத்தொடர்ந்து மகளிர் உரிமைத் தொகை தொடர்பாக அதிக அளவில் மனுக்கள் வருவது குறித்து அவர் பேசினார்.

“மகளிர் உரிமைத் தொகைக்காக நிறைய பேர் மனு கொடுக்கிறார்கள். அந்த மனுக்கள் அனைத்தையும் நாங்கள் பரிசீலித்து வருகிறோம். ஆனால் மகளிர் உரிமைத் தொகைக்காக யாரும் தனியாக மனு கொடுக்க வரிசையில் நிற்க வேண்டாம்” என்று அவர் தெரிவித்தார்.

தேர்தலுக்கு முன்பே தமிழக வெற்றிக் கழகம் குடும்பத் தலைவிகளுக்கு மாதந்தோறும் ரூ.2,500 வழங்குவதாக வாக்குறுதி அளித்திருந்ததை நினைவூட்டிய அமைச்சர், அந்த வாக்குறுதி நிச்சயம் நிறைவேற்றப்படும் என்றும் கூறினார்.

“யாரும் கவலைப்பட வேண்டாம். இப்போது ஒன்றை மட்டும் தெளிவாக சொல்லிக்கொள்கிறேன். மகளிர் உரிமைத் தொகைக்காக தனியாக மனு கொடுக்க வரிசையில் நிற்க வேண்டாம். இங்கே வந்து நேரத்தை வீணாக்க வேண்டாம். உங்கள் வீட்டு வேலைகளை நீங்கள் பார்க்கலாம்” என்று அவர் கூறினார்.

இதுவரை மகளிர் உரிமைத் தொகை பெற்று வருபவர்கள் மட்டுமின்றி, இதுவரை அந்தத் தொகை கிடைக்காதவர்களும் புதிய திட்டத்தில் சேர்க்கப்படுவார்கள் என்றும் அமைச்சர் தெரிவித்தார்.

“இப்போது மகளிர் உரிமைத் தொகை வாங்குபவர்களாக இருந்தாலும் சரி, இதுவரை வாங்காதவர்களாக இருந்தாலும் சரி, அனைவரின் பெயர்களும் மொத்தமாக பட்டியலில் சேர்க்கப்படும்” என்று அவர் கூறினார்.

முதலமைச்சர் விஜய் ரூ.2,500 மகளிர் உரிமைத் தொகை திட்டத்தை தொடங்கி வைக்கும் போது, தகுதியான அனைவருக்கும் தானாகவே பணம் கிடைக்கும் வகையில் ஏற்பாடுகள் செய்யப்படும் என்றும் அவர் தெரிவித்தார்.

“முதலமைச்சர் விஜய் இதற்கான அறிவிப்பை வெளியிட்டு திட்டத்தை தொடங்கி வைக்கும்போது, அனைவருக்கும் ஆட்டோமேட்டிக்காக பணம் வந்துவிடும். இதற்காக தனித்தனியாக மனு கொடுக்க வேண்டிய அவசியம் இல்லை” என்று அமைச்சர் ரமேஷ் கூறினார்.

அதுமட்டுமின்றி, தற்போது உதவித்தொகை பெற்று வருபவர்கள் மற்றும் இதுவரை பெறாதவர்கள் என அனைவரின் பெயர்களையும் ஒருங்கிணைத்து பட்டியல் தயாரிக்கப்படும் என்றும் அவர் தெரிவித்துள்ளார்.

“நாங்கள் தேர்தல் வாக்குறுதியில் சொன்னது போலவே மாதந்தோறும் ரூ.2,500 வழங்குவோம். அந்தத் திட்டத்தை முதலமைச்சர் விஜய் தொடங்கி வைக்கும் போது அனைவருக்கும் பணம் கிடைக்கும்” என்று அவர் உறுதியளித்தார்.

இந்த அறிவிப்பு எப்போது வெளியாகும் என்ற கேள்விக்கும் அமைச்சர் ரமேஷ் பதில் அளித்துள்ளார்.

தவெக அரசு இன்னும் தனது முதல் பட்ஜெட்டை தாக்கல் செய்யவில்லை என்பதை சுட்டிக்காட்டிய அவர், விரைவில் பட்ஜெட் தாக்கல் செய்யப்படும் போது மகளிர் உரிமைத் தொகை தொடர்பான முக்கிய அறிவிப்பு வெளியாகும் என்று தெரிவித்துள்ளார்.

இதனால் வரும் பட்ஜெட்டில் மகளிர் உரிமைத் தொகையை ரூ.1,000-ல் இருந்து ரூ.2,500 ஆக உயர்த்தும் அறிவிப்பு இடம்பெறுமா என்ற எதிர்பார்ப்பு அதிகரித்துள்ளது.

அதேநேரத்தில், புதிய பயனாளிகள் அனைவரும் தானாகவே திட்டத்தில் சேர்க்கப்படுவார்களா, அதற்கான தகுதி விதிமுறைகள் என்ன, குடும்ப வருமான வரம்பு உள்ளிட்ட தற்போதைய நிபந்தனைகளில் மாற்றம் செய்யப்படுமா என்பது குறித்த அதிகாரப்பூர்வ அறிவிப்பு இன்னும் வெளியாகவில்லை.

இருப்பினும், மகளிர் உரிமைத் தொகைக்காக தனித்தனியாக மனு கொடுக்க வேண்டாம் என்றும், ரூ.2,500 திட்டம் தொடங்கும்போது அனைவரின் பெயர்களும் ஒருங்கிணைக்கப்படும் என்றும் அமைச்சர் ரமேஷ் கூறியிருப்பது பெண்கள் மத்தியில் பெரும் கவனத்தை ஈர்த்துள்ளது.

இதுவரை மாதம் ரூ.1,000 பெற்று வரும் பெண்களுக்கு ரூ.2,500 கிடைக்குமா?

இதுவரை மகளிர் உரிமைத் தொகை கிடைக்காத குடும்பத் தலைவிகளும் புதிய பட்டியலில் சேர்க்கப்படுவார்களா?

வரும் பட்ஜெட்டிலேயே முதலமைச்சர் விஜய் இந்த மெகா அறிவிப்பை வெளியிடுவாரா?

என்பதே தற்போது தமிழக பெண்கள் மத்தியில் எழுந்துள்ள மிகப்பெரிய எதிர்பார்ப்பாக உள்ளது.