ஓமன் வளைகுடாவில் இந்திய மாலுமிகள் பயணித்த கப்பல் மீது அமெரிக்கப் படைகள் நடத்திய தாக்குதலில் மூன்று இந்தியர்கள் உயிரிழந்த சம்பவம், சர்வதேச அளவில் பெரும் அரசியல் விவாதத்தை ஏற்படுத்தியுள்ளது. இந்த விவகாரத்தில் இந்தியா தனது கண்டனத்தை அமெரிக்க வெளியுறவுத் துறையிடம் பதிவு செய்துள்ளதாகத் தகவல்கள் தெரிவிக்கின்றன.

இந்தச் சூழலில், பிரதமர் நரேந்திர மோடி இந்த விவகாரத்தில் மௌனம் காப்பதாக மக்களவை எதிர்க்கட்சித் தலைவர் ராகுல் காந்தி கடும் விமர்சனங்களை முன்வைத்துள்ளார். தனது சமூக வலைதளப் பதிவில் அவர் கூறியுள்ளதாவது, அமெரிக்கத் தாக்குதலில் மூன்று இந்தியர்கள் உயிரிழந்தது குறித்து எந்த வருத்தமோ அல்லது மன்னிப்போ தெரிவிக்காத அமெரிக்கா, தொடர்ந்து அதிகாரப்பூர்வ உத்தரவுகளைப் பிறப்பித்து வருவதைச் சுட்டிக்காட்டியுள்ளார்.

மேலும், அமெரிக்க ராணுவத்தின் உத்தரவுகளுக்கு உடனடியாகக் கீழ்ப்படிய வேண்டும் என்றும், எந்த மீறலும் பொறுத்துக்கொள்ளப்படாது என்றும் அமெரிக்கா எச்சரித்துள்ளது. இத்தகைய கட்டளைகளை எந்தவொரு சுதந்திர நாடும் ஏற்காது. ஆனால், பிரதமர் மோடி ஒரு கீழ்ப்படிதலுள்ள பணியாளரைப் போல நடந்துகொள்கிறார் என்று ராகுல் காந்தி சாடியுள்ளார். நாட்டின் மரியாதையை விட, தங்களை அவமதிப்பவர்களின் கட்டுப்பாட்டில் பிரதமர் இருப்பதாக அவர் குற்றம் சாட்டியுள்ளார்.

ஏப்ரல் 13 முதல் ஹோர்முஸ் நீரிணையைத் தனது கட்டுப்பாட்டில் வைத்துள்ள அமெரிக்கா, ஈரானுடனான கப்பல் போக்குவரத்தைத் தடுத்துள்ளது. இது தொடர்பாக அமெரிக்க வெளியுறவுத்துறை செய்தித் தொடர்பாளர் டாமி பிகோட், மத்திய வெளியுறவுத்துறை அமைச்சர் ஜெய்சங்கரிடம், பிராந்திய அமைதி மற்றும் பாதுகாப்பிற்காக அனைத்து வணிகக் கப்பல்களும் அமெரிக்கப் படைகளின் உத்தரவுகளுக்குக் கீழ்ப்படிய வேண்டும் என்றும், ஈரான் எண்ணெய் கடத்தலை அனுமதிக்க முடியாது என்றும் வலியுறுத்தியுள்ளார்.

இந்தியக் குடிமக்களின் உயிர் மற்றும் நாட்டின் இறையாண்மை தொடர்பான இந்த விவகாரத்தில், அரசு எடுத்து வரும் நடவடிக்கைகள் மற்றும் பிரதமர் மோடியின் மௌனம் எதிர்க்கட்சிகளின் கேள்விகளுக்கும், நாட்டு மக்களின் கவலைக்கும் உள்ளாகியுள்ளது. இந்த விவகாரத்தில் அரசு எடுக்கும் அடுத்தகட்ட நடவடிக்கைகள் என்ன என்பது பெரும் எதிர்பார்ப்பை உருவாக்கியுள்ளது.