சென்னை: முதலமைச்சர் விஜய் சட்டப்பேரவை உறுப்பினர் பதவியை ராஜினாமா செய்ததையடுத்து காலியாக உள்ள திருச்சி கிழக்கு தொகுதிக்கு விரைவில் இடைத்தேர்தல் நடைபெறலாம் என்ற எதிர்பார்ப்பு நிலவி வருகிறது. இந்த நிலையில், அந்தத் தொகுதியில் நடிகர் ராகவா லாரன்ஸ் போட்டியிடுவார் என்ற தகவல்களுக்கு அவர் நேரடியாக விளக்கம் அளித்துள்ளார்.

சமூக சேவை நடவடிக்கைகளுக்காகவும், தமிழ் திரையுலகில் நடிகர், இயக்குநர், நடன இயக்குநர் எனப் பல்வேறு துறைகளில் செயல்பட்டு வருவதாலும் ராகவா லாரன்ஸ் பொதுமக்கள் மத்தியில் தனி கவனத்தைப் பெற்றவர். கடந்த சில ஆண்டுகளாக அவரது அரசியல் வருகை குறித்த தகவல்கள் அவ்வப்போது வெளியாகி வந்தாலும், இதுவரை அவர் எந்த அரசியல் கட்சியிலும் அதிகாரப்பூர்வமாக இணையவில்லை.

சமீபத்தில் திருச்சி கிழக்கு இடைத்தேர்தலில் ராகவா லாரன்ஸ் போட்டியிடலாம் என்ற தகவல்கள் சமூக வலைதளங்களில் பரவின. இதையடுத்து வீடியோ ஒன்றை வெளியிட்ட அவர், அந்த தகவல்களுக்கு விளக்கம் அளித்தார்.

அதில், "என் குடும்பத்தினரிடம் கருத்து கேட்பது போல மக்களிடமும் அவர்களின் எண்ணங்களை அறிந்து கொள்கிறேன். அதில் தவறு எதுவும் இல்லை. ஆனால், திருச்சி கிழக்கு தொகுதியில் நான் போட்டியிட மாட்டேன். விஜய் நடிகராக இருந்த காலத்திலிருந்தே அவருடன் இருந்து கட்சிக்காக உழைத்தவர்கள் இருக்கிறார்கள். அவர்கள் இருக்கும்போது நான் வந்து அந்த வாய்ப்பை எடுத்துக்கொள்வது சரியாக இருக்காது" என்று தெரிவித்துள்ளார்.

மேலும், "ஒருவர் மரம் நட்டு வளர்த்துவிட்டு, அதன் பலனை வேறு ஒருவர் அனுபவிப்பது போல இருக்கக் கூடாது. கட்சிக்காக நீண்ட காலமாக உழைத்தவர்களுக்கே அந்த வாய்ப்பு கிடைக்க வேண்டும் என்பதே என் கருத்து" என்றும் அவர் கூறியுள்ளார்.

அதேநேரத்தில், திருச்சி கிழக்கு தொகுதியில் போட்டியிட மாட்டேன் என்று கூறியதையே தவிர, அரசியலுக்கு வரமாட்டேன் என்று எங்கும் கூறவில்லை என்றும் ராகவா லாரன்ஸ் விளக்கமளித்துள்ளார். "சரியான நேரத்தில் அரசியல் தொடர்பான முடிவை அறிவிப்பேன். அவசரமாக எந்த முடிவையும் எடுக்க விரும்பவில்லை. மக்களின் நலனுக்காக செயல்பட வேண்டும் என்பதே என் நோக்கம்" என்றும் தெரிவித்துள்ளார்.

இதற்கிடையில், திருச்சி கிழக்கு இடைத்தேர்தல் வேட்பாளர் தொடர்பாக பல்வேறு பெயர்கள் சமூக வலைதளங்களிலும் அரசியல் வட்டாரங்களிலும் தொடர்ந்து பேசப்பட்டு வருகின்றன. குறிப்பாக நடிகை திரிஷா போட்டியிடலாம் என்ற தகவல்களும் பரவி வருகின்றன. எனினும், இதுகுறித்து சம்பந்தப்பட்ட தரப்புகள் எதுவும் அதிகாரப்பூர்வ அறிவிப்பு வெளியிடவில்லை.

ராகவா லாரன்ஸ் போட்டியிட மாட்டேன் என்று அறிவித்ததைத் தொடர்ந்து, சமூக வலைதளங்களில் பல்வேறு ஊகங்கள் மீண்டும் பரவி வருகின்றன. இருப்பினும், திருச்சி கிழக்கு தொகுதியில் யார் வேட்பாளராக அறிவிக்கப்படுவார்கள் என்பது தொடர்பாக தமிழக வெற்றிக் கழகம் இதுவரை எந்த அதிகாரப்பூர்வ அறிவிப்பையும் வெளியிடவில்லை. எனவே, வேட்பாளர் தேர்வு குறித்த தகவல்கள் அனைத்தும் தற்போது ஊகங்களாகவே உள்ளன.