தமிழகத்தின் கடன் சுமை கடந்த ஐந்து ஆண்டுகளில் இருமடங்காக உயர்ந்து 10 லட்சம் கோடி ரூபாயை எட்டியுள்ளதாக ஆளுநர் உரையில் கவலை தெரிவிக்கப்பட்டுள்ளது. கடுமையான நிதிப்பற்றாக்குறை நிலவினாலும், தவெக அரசு மக்களுக்கு அளித்த வாக்குறுதிகள் அனைத்தும் முழுமையாக நிறைவேற்றப்படும் என்று உறுதியளிக்கப்பட்டுள்ளது. லஞ்ச, ஊழலற்ற நேர்மையான நிர்வாகத்தை வழங்குவதே புதிய அரசின் முதன்மை நோக்கம் என்றும், கனிமவளத்துறையில் நடக்கும் ஊழல்கள் மற்றும் இயற்கை வளக் கொள்ளை திட்டவட்டமாகத் தடுக்கப்பட்டு அரசின் வருவாய் பெருக்கப்படும் என்றும் கூறப்பட்டுள்ளது.

சமூக நலன் மற்றும் விவசாயப் பாதுகாப்பிற்கு இந்த உரையில் முக்கியத்துவம் அளிக்கப்பட்டுள்ளது. அதன்படி, சிறு மற்றும் குறு விவசாயிகள் கூட்டுறவு வங்கிகளில் பெற்ற 75 ஆயிரம் ரூபாய் வரையிலான கடன்கள் முற்றிலும் தள்ளுபடி செய்யப்பட்டுள்ளன. மேலும், நீர்நிலைகளில் இருந்து வண்டல் மண் எடுக்க விவசாயிகளுக்கு மட்டுமே பிரத்யேக அனுமதி வழங்கப்பட்டுள்ளது. போதைப்பொருள் நடமாட்டத்தை முற்றிலும் ஒழிக்கவும், பெண்கள் மற்றும் குழந்தைகளுக்குப் பாதுகாப்பான சூழலை உருவாக்கவும் கடுமையான சட்ட நடவடிக்கைகள் எடுக்கப்படும். இதன் ஒரு பகுதியாக, பள்ளிகள் மற்றும் வழிபாட்டுத் தலங்களுக்கு அருகில் இருந்த 717 மதுக்கடைகள் அதிரடியாக மூடப்பட்டுள்ளன.

மாநில உரிமைகள் மற்றும் கல்விக் கொள்கையில் தவெக அரசு தனது உறுதியான நிலைப்பாட்டை வெளிப்படுத்தியுள்ளது. தமிழகத்தில் இருமொழிக் கொள்கையே தொடர்ந்து பின்பற்றப்படும் என்றும், புதிய கல்விக் கொள்கை முற்றிலுமாக எதிர்க்கப்படும் என்றும் அறிவிக்கப்பட்டுள்ளது. கல்வியைப் பொதுப் பட்டியலிலிருந்து மீண்டும் மாநிலப் பட்டியலுக்கு மாற்ற மத்திய அரசை வலியுறுத்த உள்ளதோடு, கல்வித்துறையில் காலியாக உள்ள பணியிடங்கள் விரைந்து நிரப்பப்படும். சென்னை உயர்நீதிமன்றத்தில் தமிழை வழக்காடு மொழியாக்கவும், சென்னையில் உச்சநீதிமன்றக் கிளையை அமைக்கவும் தொடர்ந்து வலியுறுத்தப்படும். மத்திய அரசு சாதிவாரி கணக்கெடுப்பை விரைந்து முடிக்க வேண்டும் என்றும், அது முடிந்தவுடன் தமிழகத்தில் சமூக நீதி சர்வே நடத்தப்படும் என்றும் கூறப்பட்டுள்ளது.

அண்டை மாநிலச் சிக்கல்களில், மேகேதாட்டு விவகாரத்தில் தமிழகத்தின் சட்டப் போராட்டம் தொடரும் என்றும், முல்லைப் பெரியாறுக்கு மாற்றாகப் புதிய அணை கட்டும் கேரளாவின் முயற்சி தடுத்து நிறுத்தப்படும் என்றும் தெளிவுபடுத்தப்பட்டுள்ளது. மீனவர் பிரச்சினைக்கு ஒன்றிய அரசு நிரந்தரத் தீர்வு காண வேண்டும் என வலியுறுத்தப்பட்டுள்ளது. மாநிலத்தில் தற்போது நடைமுறையில் உள்ள 69 சதவீத இடஒதுக்கீடு தொடர்ந்து பாதுகாக்கப்படும். தொழில் தொடங்குவதை எளிதாக்க ஒற்றை சாளர முறை அமல்படுத்தப்பட்டு, வரும் 2031-க்குள் இந்தியாவிற்கே முன்மாதிரி மாநிலமாகத் தமிழ்நாடு மாற்றப்படும். இந்து சமய அறநிலையத்துறையிலும் கட்டமைப்பு ரீதியான பல மாற்றங்கள் செய்யப்படும் என்று ஆளுநர் உரையில் குறிப்பிடப்பட்டுள்ளது.