தமிழகத்தின் எதிர்கால பொருளாதார வளர்ச்சியில் முக்கியமான உள்கட்டமைப்பு திட்டமாக கருதப்படும் பரந்தூர் பசுமை வழி பன்னாட்டு விமான நிலையத் திட்டம் தற்போது நிறுத்தி வைக்கப்பட்டுள்ள நிலையில், இந்தத் திட்டம் முழுமையாக கைவிடப்பட்டால் மாநிலம் ரூ.50,000 கோடி முதல் ரூ.1 லட்சம் கோடிக்கும் அதிகமான பொருளாதார இழப்பைச் சந்திக்க நேரிடும் என பொருளாதார நிபுணர்கள் எச்சரிக்கை விடுத்துள்ளனர். மேலும், இந்த முடிவு தமிழ்நாட்டின் உள்கட்டமைப்பு வளர்ச்சியை பல ஆண்டுகள் பின்னோக்கித் தள்ளக்கூடும் என்றும் அவர்கள் கூறுகின்றனர்.

காஞ்சிபுரம் மாவட்டம் பரந்தூரில் முன்மொழியப்பட்ட இந்த விமான நிலையம், சென்னை மீனம்பாக்கம் விமான நிலையத்தின் அதிகப்படியான பயணிகள் மற்றும் சரக்கு நெரிசலை குறைக்கும் நோக்கில் திட்டமிடப்பட்டது. ஆண்டுக்கு சுமார் 10 கோடி பயணிகளைக் கையாளும் திறன் கொண்ட இந்தத் திட்டத்தின் மதிப்பு ரூ.20,000 கோடி முதல் ரூ.32,700 கோடி வரை இருக்கும் என மதிப்பிடப்பட்டுள்ளது. இரண்டு இணை ஓடுபாதைகள், உலகத் தரம் வாய்ந்த சரக்கு மையம் மற்றும் ஏரோசிட்டி உள்ளிட்ட வசதிகளும் இதில் இடம்பெறவிருந்தன.

இந்தத் திட்டத்துடன் தொடர்புடைய பல்வேறு துணைத் திட்டங்களும் மாநில வளர்ச்சிக்கு முக்கியமானதாக கருதப்படுகின்றன. சென்னையை பரந்தூருடன் இணைக்கும் ரூ.15,906 கோடி மதிப்பிலான 53 கிலோமீட்டர் மெட்ரோ ரயில் விரிவாக்கத் திட்டம், பூந்தமல்லி, ஸ்ரீபெரும்புதூர், சுங்குவார்சத்திரம் மற்றும் பரந்தூர் உள்ளிட்ட பகுதிகளில் 20 மெட்ரோ நிலையங்களை உருவாக்கும் வகையில் திட்டமிடப்பட்டுள்ளது. இதற்கான ஆரம்பகட்ட நிதியாக ரூ.2,126 கோடி ஒதுக்கப்பட்டுள்ளதாக கூறப்படுகிறது.

மேலும், சென்னை-பெங்களூரு அதிவேக நெடுஞ்சாலையுடன் பரந்தூரை இணைக்கும் திட்டமும் முன்மொழியப்பட்டுள்ளது. இதன் மூலம் மேற்கு சென்னை பகுதி ஒரு முக்கிய பொருளாதார வளையமாக மாறி, லாஜிஸ்டிக்ஸ் பூங்காக்கள், சர்வதேச தர விடுதிகள், வணிக வளாகங்கள் மற்றும் புதிய தொழிற்சாலைகள் உருவாகும் வாய்ப்பு இருப்பதாக வல்லுநர்கள் கூறுகின்றனர்.

இந்தத் திட்டம் கைவிடப்பட்டால், விமான நிலையம், மெட்ரோ, சாலை மற்றும் ஏரோசிட்டி உள்ளிட்ட தொடர்புடைய திட்டங்களில் ரூ.50,000 கோடிக்கும் அதிகமான முதலீடுகள் பாதிக்கப்படலாம் என நிபுணர்கள் எச்சரிக்கின்றனர். அதேபோல், ஸ்ரீபெரும்புதூர்-பரந்தூர் பகுதியை மையமாகக் கொண்டு உருவாக இருந்த நேரடி மற்றும் மறைமுக வேலைவாய்ப்புகளும் குறையக்கூடும்.

விமானப் போக்குவரத்து, லாஜிஸ்டிக்ஸ், ஹோட்டல் மற்றும் சேவைத் துறைகளில் ஆயிரக்கணக்கான வேலைவாய்ப்புகள் உருவாகும் என எதிர்பார்க்கப்பட்ட நிலையில், திட்டம் கைவிடப்பட்டால் இளைஞர்களுக்கான புதிய வேலை வாய்ப்புகள் பாதிக்கப்படும் எனவும் கூறப்படுகிறது.

அதேநேரத்தில், பன்னாட்டு நிறுவனங்கள் பெங்களூரு, ஹைதராபாத், புனே போன்ற நகரங்களை நோக்கி நகரும் போக்கு மேலும் அதிகரிக்கக்கூடும் என பொருளாதார ஆய்வாளர்கள் கருதுகின்றனர். குறிப்பாக ஆட்டோமொபைல், மின்னணு உற்பத்தி மற்றும் ஏற்றுமதி துறைகள் இதனால் பாதிக்கப்பட வாய்ப்பு இருப்பதாகவும் கூறப்படுகிறது.

ஸ்ரீபெரும்புதூர் மற்றும் ஒரகடம் போன்ற தொழில் மையங்களில் உற்பத்தியாகும் பொருட்களை உலக சந்தைகளுக்கு விரைவாக அனுப்புவதற்கு சரக்கு மைய வசதி அவசியம் என்பதால், பரந்தூர் திட்டம் கைவிடப்பட்டால் அண்டை மாநிலங்கள் அதனால் பலனடையக்கூடும் என்றும் நிபுணர்கள் சுட்டிக்காட்டுகின்றனர்.

இந்நிலையில், விவசாயிகளின் நில உரிமை, வாழ்வாதாரம் மற்றும் சுற்றுச்சூழல் பாதுகாப்பு ஆகியவற்றை உறுதி செய்யும் வகையில் உரிய இழப்பீடு மற்றும் மாற்று வாழ்வாதாரத் திட்டங்களுடன் சமரச தீர்வுகளை கண்டறிந்து திட்டத்தை முன்னெடுப்பதே நீண்டகால நலனுக்கு உகந்ததாக இருக்கும் என வல்லுநர்கள் வலியுறுத்தியுள்ளனர்.