தமிழக அரசியலில் திராவிட இயக்கத்தின் அடையாளமாக விளங்கும் தந்தை பெரியாரின் குடும்பத்திலிருந்து, ஐந்தாம் தலைமுறையாக அரசியலில் கால் பதித்துள்ளார் சமண்ணா. ஈவிகேஎஸ் இளங்கோவனின் பேத்தியும், மறைந்த ஈரோடு கிழக்கு சட்டமன்ற உறுப்பினர் திருமகன் ஈ.வெ.ரா.வின் மகளுமான சமண்ணா, டெல்லியில் காங்கிரஸ் கட்சியில் அதிகாரப்பூர்வமாக இணைந்துள்ளார். இந்த அரசியல் நகர்வு தமிழக அரசியல் வட்டாரங்களில் கவனம் பெற்றுள்ளது.

சமூக நீதி, சுயமரியாதை, சமத்துவம் ஆகிய கொள்கைகளை தமிழக அரசியலில் விதைத்த தந்தை பெரியாரின் சிந்தனைகள், பல தசாப்தங்களாக அரசியல் மற்றும் சமூக தளங்களில் ஆழமான தாக்கத்தை ஏற்படுத்தி வருகின்றன. அந்த பாரம்பரியத்தின் தொடர்ச்சியாக அரசியலில் செயல்பட்டவர் ஈவிகேஎஸ் இளங்கோவன். பெரியாரின் பேரன் என்ற அடையாளத்துடன், தமிழக காங்கிரஸ் அரசியலில் முக்கிய முகமாக இருந்த இளங்கோவன், மூன்று முறை தமிழக காங்கிரஸ் தலைவராகவும், மத்திய அமைச்சராகவும், இரண்டு முறை சட்டமன்ற உறுப்பினராகவும் பதவி வகித்தவர்.

இளங்கோவனின் மகனான திருமகன் ஈ.வெ.ரா., 2021 சட்டசபை தேர்தலில் ஈரோடு கிழக்கு தொகுதியில் வெற்றி பெற்று, இளம் வயதிலேயே அரசியலில் கவனம் பெற்றார். ஆனால், அவரது திடீர் மறைவு தமிழக அரசியலில் பெரும் அதிர்ச்சியை ஏற்படுத்தியது. இதனைத் தொடர்ந்து நடைபெற்ற இடைத்தேர்தலில் ஈவிகேஎஸ் இளங்கோவன் போட்டியிட்டு வெற்றி பெற்றார். பின்னர் அவரும் உடல்நலக் குறைவு காரணமாக உயிரிழந்ததால், அந்த குடும்பத்தின் அரசியல் பயணம் தற்காலிகமாக நிறுத்தம் பெற்றது.

ஈரோடு கிழக்கு தொகுதியில் அடுத்த இடைத்தேர்தலில் காங்கிரசுக்கு வாய்ப்பு வழங்கப்படாமல் திமுக வேட்பாளர் களமிறக்கப்பட்டதன் பின்னணியில், காங்கிரஸ் மேலிடத்தில் அதிருப்தி ஏற்பட்டதாக கூறப்பட்டது. இந்த சூழலில்தான், இளங்கோவன் குடும்பத்தைச் சேர்ந்த சமண்ணாவை மீண்டும் அரசியல் களத்தில் முன்னிறுத்தும் முயற்சிகள் தீவிரமானதாக தகவல்கள் வெளியாகின.

அந்தத் தொடர்ச்சியாக, சமண்ணா டெல்லியில் காங்கிரஸ் கட்சியில் இணைந்துள்ளார். முன்னாள் காங்கிரஸ் தலைவர் சோனியா காந்தி முன்னிலையில் நடைபெற்ற இந்த நிகழ்ச்சியில், ராகுல் காந்தி மற்றும் பிரியங்கா காந்தி ஆகியோரும் பங்கேற்றனர். இளங்கோவனின் பிறந்தநாளை முன்னிட்டு சமண்ணா காங்கிரசில் இணைந்ததாக அறிவிக்கப்பட்டுள்ளது.

தந்தை பெரியாரின் குடும்ப மரபும், ஈவிகேஎஸ் இளங்கோவனின் அரசியல் பாரம்பரியமும், திருமகன் ஈ.வெ.ரா.வின் அடையாளமும் ஒருங்கே இணைந்து, சமண்ணா அரசியலில் காலடி எடுத்திருப்பது, தமிழக காங்கிரஸ் அரசியலில் புதிய அத்தியாயமாக பார்க்கப்படுகிறது. வரவிருக்கும் சட்டசபை தேர்தலை முன்னிட்டு, அவரது அரசியல் பயணம் எவ்வாறு வடிவெடுக்கும் என்பதைக் காண அரசியல் வட்டாரங்கள் கவனமாக நோக்கி வருகின்றன.