பீகார் மாநில அரசியலில் தற்போது பெரிய மாற்றம் ஏற்பட்டுள்ளது. கடந்த இருபது ஆண்டுகளுக்கும் மேலாக அந்த மாநில அரசியலில் முக்கிய பங்கு வகித்த நிதிஷ் குமார், தனது முதல்வர் பதவியை ராஜினாமா செய்வதாக அறிவித்துள்ளார். இதன் மூலம் பீகார் அரசியலில் ஒரு புதிய கட்டம் தொடங்கியுள்ளது.

நிதிஷ் குமார் தனது ட்விட்டர் பதிவில், நாடாளுமன்றத்தின் இரு அவைகளிலும் மற்றும் மாநில சட்டமன்றத்தின் இரு அவைகளிலும் உறுப்பினராக இருப்பது தனது நீண்டநாள் விருப்பம் என்று தெரிவித்துள்ளார். ஏற்கனவே அவர் மக்களவையிலும், மாநில சட்டமன்றத்திலும் மற்றும் சட்ட மேலவையிலும் உறுப்பினராக இருந்த நிலையில், தற்போது மாநிலங்களவை உறுப்பினராகவும் வருவதன் மூலம் அந்த இலக்கை நிறைவேற்ற உள்ளதாக கூறியுள்ளார். மேலும், இதுவரை தன்னை நம்பி ஆதரவு அளித்த அனைவருக்கும் நன்றி தெரிவித்துள்ளார்.

பீகார் சட்டசபையில் மொத்தம் 243 தொகுதிகள் உள்ளன. இதில் பாஜகவுக்கு 89 இடங்களும், நிதிஷ் குமார் தலைமையிலான ஜேடியூ கட்சிக்கு 85 இடங்களும் உள்ளன. பாஜகவே அந்த கூட்டணியில் பெரிய கட்சியாக இருந்தாலும், தேர்தலுக்குப் பிறகு நிதிஷ் குமார் முதல்வராகத் தொடர்ந்தார். ஆனால் தற்போது அவர் பதவியில் இருந்து விலகியுள்ளதால், பாஜகவிலிருந்து நேரடியாக ஒருவர் முதல்வராக பொறுப்பேற்கலாம் என்று கூறப்படுகிறது. அதே நேரத்தில் நிதிஷ் குமாரின் மகனுக்கு துணை முதல்வர் பதவி வழங்கப்படும் என்ற தகவலும் அரசியல் வட்டாரங்களில் பேசப்படுகிறது.

இந்த திடீர் மாற்றம் பல்வேறு கேள்விகளை எழுப்பியுள்ளது. பீகார் சட்டசபைத் தேர்தலுக்கு முன்பே முதல்வர் வேட்பாளர் தொடர்பாக தேசிய ஜனநாயக கூட்டணிக்குள் குழப்பம் ஏற்பட்டது. தேர்தல் நெருங்கியபோது தான் நிதிஷ் குமார் முதல்வராகத் தொடர்வார் என்று மத்திய உள்துறை அமைச்சர் அமித் ஷா அறிவித்தார். அதன் பின்னரே பீகாரில் என்டிஏ கூட்டணிக்கு ஆதரவு அதிகரித்ததாக கூறப்பட்டது. ஆனால் தேர்தலுக்குப் பிறகு ஐந்து மாதங்கள் கூட ஆகாமல் அவர் பதவி விலகியிருப்பது அரசியல் அரங்கில் பல்வேறு விவாதங்களை ஏற்படுத்தியுள்ளது.

இதற்கிடையில், பீகாரில் நடந்த இந்த அரசியல் மாற்றத்தை எடுத்துக்காட்டாகக் கொண்டு, தமிழ்நாட்டின் அரசியல் சூழலும் சமூக வலைதளங்களில் பேசப்படுகிறது. சில நெட்டிசன்கள், பீகாரில் நடந்தது போல எதிர்காலத்தில் தமிழ்நாட்டிலும் அரசியல் மாற்றங்கள் ஏற்படலாம் என்று கருத்து தெரிவித்து வருகின்றனர்.

தமிழ்நாட்டில் அதிமுக மற்றும் பாஜக கூட்டணி அமைந்துள்ள நிலையில், அதிமுக தலைவர்கள் தனிப்பெரும்பான்மையுடன் ஆட்சியை அமைப்போம் என்று கூறி வருகின்றனர். ஆனால் பாஜக தலைவர்கள் பலர் “என்டிஏ அரசு” என்றே தொடர்ந்து குறிப்பிடுகின்றனர். என்டிஏ கூட்டங்களில் பிரதமர் நரேந்திர மோடியும் பெரும்பாலும் அதிமுக என்ற வார்த்தையை பயன்படுத்தாமல், கூட்டணியை மட்டுமே குறிப்பிடுவதாக சிலர் சுட்டிக்காட்டுகின்றனர்.

இதற்கிடையில் திமுக, விசிக உள்ளிட்ட எதிர்க்கட்சிகள், எதிர்காலத்தில் பாஜக அதிமுகவை அரசியல் ரீதியாக பலவீனப்படுத்திவிடும் என்று விமர்சித்து வருகின்றன. சமீபத்தில் நடைபெற்ற ஒரு கூட்டத்தில் பேசிய காங்கிரஸ் மூத்த தலைவர் ப.சிதம்பரம் கூட, அடுத்த சில ஆண்டுகளில் அதிமுகவே அரசியல் அரங்கில் இருக்காது என்று கடுமையாக விமர்சித்திருந்தார்.

இந்த சூழலில் பீகாரில் பாஜக நேரடியாக ஆட்சியை கைப்பற்றும் நிலை ஏற்பட்டது அரசியல் விவாதங்களை மேலும் தூண்டியுள்ளது. இதனால், ஒருவேளை தமிழ்நாட்டில் அதிமுக ஆட்சி அமைந்தாலும், எடப்பாடி பழனிசாமி எவ்வளவு காலம் முதல்வராகத் தொடர்வார் என்ற கேள்வியையும் சிலர் எழுப்பி வருகின்றனர்.

எனினும், இவை அனைத்தும் தற்போது அரசியல் வட்டாரங்களில் பேசப்படும் கருத்துக்களாகவே உள்ளன. தமிழ்நாட்டின் அரசியல் சூழல் எவ்வாறு மாறும் என்பது வரவிருக்கும் தேர்தல்களின் முடிவுகள் மற்றும் கூட்டணிகளின் நிலைப்பாடுகளைப் பொறுத்தே தீர்மானிக்கப்படும் என அரசியல் ஆய்வாளர்கள் கூறுகின்றனர்.