தமிழகத்தில் டாஸ்மாக் கடைகளில் மதுபானங்களை கொள்முதல் செய்வதற்கான நடைமுறையில் முக்கிய மாற்றம் கொண்டுவரப்பட்டுள்ளது. வரும் செப்டம்பர் 10-ம் தேதி முதல், காகிதப் படிவங்கள் மூலம் மதுபானங்களுக்கான சரக்கு கோரிக்கை வைக்கும் நடைமுறை ரத்து செய்யப்பட்டு, கையடக்க கருவி (Handheld Device) மூலமாக மட்டுமே சரக்கு கோரிக்கை மேற்கொள்ள வேண்டும் என டாஸ்மாக் நிர்வாகம் அறிவித்துள்ளது.

தமிழக அரசின் மதுவிலக்கு மற்றும் ஆயத்தீர்வைத் துறையின் கட்டுப்பாட்டில் டாஸ்மாக் நிறுவனம் செயல்பட்டு வருகிறது. தமிழகம் முழுவதும் 2,000-க்கும் மேற்பட்ட மதுபான சில்லறை விற்பனைக் கடைகள் மற்றும் அவற்றுடன் இணைந்த மதுக்கூடங்கள் செயல்பட்டு வருகின்றன.

டாஸ்மாக் மூலம் தினசரி சராசரியாக ரூ.100 கோடிக்கும் அதிகமான வருவாய் கிடைப்பதாக கூறப்படுகிறது. வார இறுதி நாட்கள் மற்றும் தீபாவளி, புத்தாண்டு, பொங்கல் உள்ளிட்ட முக்கிய பண்டிகை காலங்களில் விற்பனை பல மடங்கு அதிகரிப்பது வழக்கம். குறிப்பாக தீபாவளி காலகட்டத்தில் சில நாட்களிலேயே ரூ.750 கோடிக்கும் அதிகமான மதுபான விற்பனை நடைபெறும் அளவுக்கு விற்பனை அதிகரிக்கிறது.

தமிழகத்தில் உள்ள டாஸ்மாக் கடைகளில் 180 மில்லி, 360 மில்லி மற்றும் 720 மில்லி அளவுகளில் மதுபானங்கள் விற்பனை செய்யப்படுகின்றன. அதேநேரத்தில் குறிப்பிட்ட சில நிறுவனங்களின் பிராண்டுகள் மட்டுமே பல கடைகளில் கிடைப்பதாகவும், தங்களுக்கு விருப்பமான மதுபானங்கள் கிடைப்பதில்லை என்றும் வாடிக்கையாளர்கள் தொடர்ந்து புகார் தெரிவித்து வருகின்றனர்.

மதுபான கொள்முதலில் குறிப்பிட்ட நிறுவனங்களுக்கு முன்னுரிமை வழங்கப்படுவதாகவும், இதில் முறைகேடுகள் இருப்பதாகவும் சில தரப்பினர் குற்றச்சாட்டுகளை முன்வைத்து வருகின்றனர். இந்தச் சூழலில், கொள்முதல் நடைமுறையில் டாஸ்மாக் நிர்வாகம் புதிய மாற்றத்தை கொண்டுவந்துள்ளது.

டாஸ்மாக் நிர்வாகம் வெளியிட்டுள்ள அறிவிப்பின்படி, செப்டம்பர் 10-ம் தேதி முதல் ஒவ்வொரு டாஸ்மாக் கடைக்கும் தேவையான சரக்குகளுக்கான கோரிக்கை கையடக்க கருவி மூலமாக மட்டுமே பதிவு செய்ய வேண்டும்.

ஒவ்வொரு கடைக்கும் தேவையான மதுபானங்களின் அளவு, அந்தக் கடையின் முந்தைய விற்பனை விவரங்களின் அடிப்படையில் கணினி மூலம் தானாக உருவாக்கப்படும். முதல் முறையாக மட்டும் மேற்பார்வையாளரின் கோரிக்கை அடிப்படையாக எடுத்துக்கொள்ளப்படும்.

இந்தக் கோரிக்கையில் மதுபானத்தின் பிராண்ட் பெயர், பேக் அளவு மற்றும் தேவையான சரக்கு அளவு உள்ளிட்ட விவரங்கள் இடம்பெறும். தேவையான சூழலில் கணினி நிர்ணயித்த அளவை அதிகபட்சமாக 120 சதவீதம் வரை அதிகரிக்க முடியும். ஆனால், நிர்ணயிக்கப்பட்ட அளவை குறைக்க முடியாது என தெரிவிக்கப்பட்டுள்ளது.

நாள் முடியும் வரை சரக்கு கோரிக்கையை சமர்ப்பித்த பின்னரும், அதன் அளவை மேற்பார்வையாளர் தேவைக்கேற்ப மாற்றியமைக்க முடியும். இருப்பினும், மேற்பார்வையாளரின் செல்போன் எண்ணுக்கு அனுப்பப்படும் OTP-யை சரிபார்த்த பிறகே இறுதி கோரிக்கையை சமர்ப்பிக்க முடியும்.

மேலும், கையடக்க கருவியில் உறுதிப்படுத்தல் பக்கத்தை அச்சிட்டு வைத்துக்கொள்ளும் வசதியும் வழங்கப்பட்டுள்ளது. அந்த அச்சு நகலை டெப்போவில் நேரடியாக சமர்ப்பிக்க வேண்டிய அவசியம் இல்லை என்றும் டாஸ்மாக் தெரிவித்துள்ளது.

முக்கியமாக, இரண்டாவது சரக்கு கோரிக்கையிலிருந்து மாவட்ட மேலாளரின் தனிப்பட்ட அனுமதி தேவையில்லை என்றும், கோரிக்கைக்கு தானியங்கி முறையில் அனுமதி வழங்கப்படும் என்றும் அறிவிக்கப்பட்டுள்ளது.

இதன் மூலம் அனைத்து வகையான மதுபானங்களும், அனைத்து பிராண்டுகளும் தேவைக்கேற்ப பட்டியலில் இடம்பெறும் வகையில் புதிய நடைமுறை செயல்படுத்தப்பட உள்ளதாக டாஸ்மாக் நிர்வாகம் தெரிவித்துள்ளது.

அத்துடன், ஒவ்வொரு கடைக்கும் எந்தெந்த மதுபானங்களை வாடிக்கையாளர்கள் அதிகம் விரும்பி கேட்கிறார்கள் என்பதையும் சரக்கு கோரிக்கையில் பதிவு செய்ய வேண்டும் என அறிவுறுத்தப்பட்டுள்ளது. இதனால் வாடிக்கையாளர்களின் உண்மையான தேவையின் அடிப்படையில் மதுபானங்களை கொள்முதல் செய்து விநியோகிப்பதற்கான வாய்ப்பு அதிகரிக்கும் என எதிர்பார்க்கப்படுகிறது.

புதிய கையடக்க கருவி அடிப்படையிலான நடைமுறை மூலம் மதுபான கொள்முதல் மற்றும் விநியோகத்தில் வெளிப்படைத்தன்மை அதிகரிக்குமா, குறிப்பிட்ட சில பிராண்டுகளுக்கு வழங்கப்பட்டு வந்ததாக கூறப்படும் முன்னுரிமை குறையுமா என்பது செப்டம்பர் 10-ம் தேதிக்குப் பிறகு தெரியவரும்.