தமிழ்நாட்டின் காங்கிரஸ் தலைவர் மாணிக்கம் தாகூர் எம்.பி., தனது எக்ஸ் சமூக வலைதளப் பதிவில் மத்திய அரசின் தேர்வு நடைமுறைகளை கடுமையாக விமர்சித்துள்ளார்.அவர் வெளியிட்டுள்ள பதிவில், "முதலில் நீட் தேர்வு, தற்போது வெளிநாட்டு மருத்துவ பட்டதாரிகளுக்கான தகுதித் தேர்வு என தொடர்ந்து மருத்துவ மாணவர்களின் எதிர்காலம் கேள்விக்குறியாக்கப்பட்டு வருகிறது.

நடுத்தர வர்க்கத்தைச் சேர்ந்த மருத்துவ மாணவர்களின் கனவுகளை மோடி அரசு தொடர்ந்து சிதைத்து வருவதாக உணரப்படுகிறது" என தெரிவிக்கப்பட்டுள்ளது.மேலும், "தேர்வு நடைபெறுவதற்கு முன்பாக எந்தவித முன்னறிவிப்பும் வழங்காமல், நீண்ட நேரம் எடுத்துக்கொள்ளும் காணொளி அடிப்படையிலான வினாக்கள் மற்றும் மருத்துவ நடைமுறை சார்ந்த புதிய கேள்வி வடிவங்கள் திடீரென அறிமுகப்படுத்தப்பட்டன.

இதன் விளைவாக மருத்துவ அறிவியல் தேசிய தேர்வு வாரியம் நடத்திய தேர்வில் தேர்ச்சி விகிதம் வெறும் 12.78 சதவீதமாக சரிந்துள்ளதுடன், 31 ஆயிரத்திற்கும் அதிகமான மாணவர்கள் தோல்வியடைந்துள்ளனர்" எனவும் தெரிவிக்கப்பட்டுள்ளது.

அதேபோல், "தேர்வு முறையில் காணொளி அடிப்படையிலான வினாக்கள் உள்ளிட்ட முக்கிய மாற்றங்களை மேற்கொள்ளும் முன்பு, தேர்வர்கள் போதுமான அளவில் தயாராகும் வகையில் முன்கூட்டியே அறிவிப்பு வெளியிடப்பட வேண்டும்.

தேர்வு நடைபெறும் நாளிலேயே விதிமுறைகளை மாற்றுவது என்பது நியாயமான மதிப்பீடு அல்ல; அது மாணவர்களை திட்டமிட்டு பாதிக்கும் செயலாகவே பார்க்கப்படுகிறது" எனவும் தெரிவிக்கப்பட்டுள்ளது.இறுதியாக, "இந்த விவகாரத்தில் தமிழ்நாடு மருத்துவ மாணவர் சங்கத்தின் கோரிக்கைக்கு முழு ஆதரவு அளிக்கிறோம்.

மத்திய சுகாதார அமைச்சகம் உடனடியாக வெளிப்படையான ஆய்வை மேற்கொண்டு, இந்தத் தேர்வுக்கான தகுதி மதிப்பெண்ணை குறைத்து மாணவர்களுக்கு நியாயமான வாய்ப்பை வழங்க வேண்டும்" என மாணிக்கம் தாகூர் வலியுறுத்தியுள்ளதாக தெரிவிக்கப்பட்டுள்ளது.