நடிகர் விஜய்யின் கடைசித் திரைப்படமான "ஜனநாயகன்" திரைப்படத்தைச் சுற்றித் தொடர்ந்து சர்ச்சைகள் நீடித்து வரும் நிலையில், தற்போது படத்தின் முக்கியக் காட்சிகள் மற்றும் விமர்சனங்கள் இணையதளங்களில் கசிந்தது பெரும் அதிர்ச்சியை ஏற்படுத்தியுள்ளது. தணிக்கை வாரியத்தின் (CBFC) இழுபறியால் படத்தின் வெளியீடு தள்ளிப்போய்க்கொண்டிருக்கும் சூழலில், படக்குழுவினர் இந்தக் கசிவு தொடர்பாகத் தற்போது சட்ட ரீதியான சிக்கல்களைச் சந்தித்து வருகின்றனர். ஒரு தனியார் திரையிடலின் (Test Screening) போது இந்தக் காட்சிகள் ரகசியமாகப் படம்பிடிக்கப்பட்டதாகக் கூறப்படுகிறது.

இந்த நிலையில், படத்தின் அறிமுகக் காட்சி மற்றும் முக்கியமான அரசியல் வசனங்கள் அடங்கிய வீடியோக்கள் எக்ஸ் (X) மற்றும் டெலிகிராம் தளங்களில் பரவி வருகின்றன. இதனை பார்த்த அமீர், ஜனநாயகம் படத்தில் இஸ்லாமியர்கள் தான் தீவிரவாதிகளா? இதுதான் தங்களின் அரசியலா? எப்போது மாறும் இந்த மனநிலை என்று கேள்வி எழுப்பி உள்ளார்.

இயக்குநர் அமீரின் இந்த கருத்துக்கு, விஜய் ரசிகர்கள் அமீரிடம் கேள்விகளை எழுப்பி வருகின்றனர். திரையுலகைச் சேர்ந்த பலர் ஜனநாயகன் கசிவைக் கண்டித்து, திருட்டுப் பிரதிகளை ஊக்குவிக்க வேண்டாம் என்று பார்வையாளர்களை வலியுறுத்தி வரும் நிலையில், கண்டனம் கூட தெரிவிக்காத அமீரின் இந்த கருத்து மிக தவறானது என்று பதிவிட்டு வருகின்றனர். 
 

இதைக் கட்டுப்படுத்தத் தவறியதாகத் தயாரிப்பு நிறுவனம் மற்றும் இயக்குனர் மீது சமூக வலைதளங்களில் விமர்சனங்கள் எழுந்துள்ளன. இந்தக் கசிவு படத்தின் வசூலை மற்றும் எதிர்பார்ப்பைப் பாதிக்கும் என்பதால், சைபர் கிரைம் போலீசில் படக்குழுவினர் அவசரப் புகார் அளித்துள்ளனர்.

குறிப்பாக, தணிக்கை வாரியத்தின் மறுஆய்வுக் குழுவின் (Revising Committee) பரிசீலனையில் இருக்கும் ஒரு படத்தின் காட்சிகள் எப்படி வெளியே கசிந்தது என்பது குறித்து உளவுத்துறையும் விசாரணை நடத்தி வருகிறது. தேர்தல் ஆணையத்தின் பார்வைக்கு இந்தப் படம் கொண்டு செல்லப்பட்டுள்ள நிலையில், இத்தகைய கசிவுகள் திட்டமிட்ட சதியா என்ற கோணத்திலும் ஆய்வுகள் நடைபெறுகின்றன.