மதுராந்தகம், தாராபுரம் சட்டசபை தொகுதிகளுக்கான இடைத்தேர்தலை திமுக புறக்கணிக்க ஆலோசித்து வருவதாக அரசியல் வட்டாரங்களில் தகவல் வெளியாகியுள்ளது. அதேநேரத்தில், கட்சி தலைமை பரிசீலித்து வரும் இந்த முடிவுக்கு துணை முதல்வர் உதயநிதி ஸ்டாலின் எதிர்ப்பு தெரிவித்து வருவதாகவும் கூறப்படுகிறது. இதனால், தவெகவை எதிர்த்து அதிமுக வெற்றி பெறுவதற்கு திமுக களத்தில் இருந்து விலகுகிறதா என்ற விவாதம் தமிழக அரசியலில் எழுந்துள்ளது.

2026 சட்டசபை தேர்தலில் மதுராந்தகம் மற்றும் தாராபுரம் தொகுதிகளில் அதிமுக சார்பில் போட்டியிட்ட மரகதம் குமரவேல் மற்றும் சத்யபாமா ஆகியோர் வெற்றி பெற்றிருந்தனர். பின்னர் இருவரும் தங்களது எம்எல்ஏ பதவிகளை ராஜினாமா செய்து தமிழக வெற்றிக் கழகத்தில் இணைந்ததால், அந்த இரு தொகுதிகளும் காலியானதாக அறிவிக்கப்பட்டன.

இதையடுத்து, இரு தொகுதிகளுக்கும் அக்டோபர் 6ஆம் தேதி இடைத்தேர்தல் நடைபெறும் என தேர்தல் ஆணையம் அறிவித்துள்ளது. செப்டம்பர் 9ஆம் தேதி வேட்புமனு தாக்கல் தொடங்கும் நிலையில், செப்டம்பர் 16ஆம் தேதி வரை மனுக்களை தாக்கல் செய்யலாம். தவெகவும் அதிமுகவும் இடைத்தேர்தலில் போட்டியிடுவது உறுதியாகியுள்ள நிலையில், திமுக தரப்பில் இதுவரை வேட்பாளர் குறித்த அறிவிப்பு வெளியாகவில்லை.

தமிழகத்தில் தவெக ஆட்சி அமைந்து சுமார் நான்கு மாதங்களே ஆன நிலையில், மதுராந்தகம் மற்றும் தாராபுரம் இடைத்தேர்தல் முக்கியமான அரசியல் சோதனையாக பார்க்கப்படுகிறது. இந்த சூழலில் திமுகவும் அதிமுகவும் தனித்தனியாக களமிறங்கினால், எதிர்க்கட்சிகளின் வாக்குகள் பிரிந்து ஆளும் தவெக வேட்பாளர்களுக்கு சாதகமாக அமைய வாய்ப்புள்ளதாக திமுக தலைமை கருதுவதாக கூறப்படுகிறது.

அதேநேரத்தில், இந்த இரு தொகுதிகளிலும் தவெகவை தோற்கடித்தால், முதல்வர் விஜய்யின் அரசியல் செல்வாக்கு மற்றும் ஆட்சி குறித்த பிம்பத்தில் தாக்கத்தை ஏற்படுத்த முடியும் என்றும் திமுக தரப்பில் கணக்கு போடப்படுவதாக தகவல்கள் தெரிவிக்கின்றன.

இதன் காரணமாக, திமுக நேரடியாக போட்டியிடாமல் அதிமுகவுக்கு களத்தை விட்டுக்கொடுப்பது குறித்து ஆலோசனை நடைபெறுவதாக அரசியல் வட்டாரங்களில் பேசப்படுகிறது. ஆனால் இந்த முடிவு திமுகவுக்கே எதிர்மறையான அரசியல் விளைவுகளை ஏற்படுத்தக்கூடும் என்ற கருத்தும் கட்சிக்குள் இருப்பதாக கூறப்படுகிறது.

திமுகவின் முடிவில் கூட்டணி அரசியலும் முக்கிய பங்கு வகிப்பதாக கூறப்படுகிறது. இதுவரை திமுக கூட்டணியில் இடம்பெற்றிருந்த காங்கிரஸ், விசிக, ஐயூஎம்எல், மதிமுக, சிபிஐ, சிபிஎம் உள்ளிட்ட கட்சிகள் தற்போது தவெக அரசுக்கு ஆதரவாக இருப்பதாக கூறப்படும் நிலையில், இந்த இடைத்தேர்தலை திமுக தனித்து எதிர்கொள்ள வேண்டிய சூழல் உருவாகியுள்ளது.

இதனால் கூட்டணி பலம் இல்லாமல் இரு தொகுதிகளிலும் போட்டியிடுவதால் கிடைக்கக்கூடிய அரசியல் பலனை விட, தவெகவை வீழ்த்துவதற்கு அதிமுகவுக்கு வாய்ப்பளிப்பது தந்திரமான முடிவாக இருக்குமா என்ற ஆலோசனை திமுக தலைமை மட்டத்தில் நடைபெற்று வருவதாக தகவல்கள் தெரிவிக்கின்றன.

ஆனால், இடைத்தேர்தலை புறக்கணிக்கும் முடிவுக்கு உதயநிதி ஸ்டாலின் உடன்படவில்லை எனக் கூறப்படுகிறது. திமுக களத்தில் இருந்து விலகினால், “விஜய்யின் அரசியல் வளர்ச்சியை பார்த்து திமுக பயந்துவிட்டது” என்ற விமர்சனம் உருவாகும் என அவர் கருதுவதாக தகவல்கள் தெரிவிக்கின்றன.

மேலும், திமுக போட்டியிடவில்லை என்றால், அக்கட்சி தமிழக அரசியல் களத்தில் இல்லை என்ற நரேட்டிவை தவெக உள்ளிட்ட எதிரணிகள் முன்வைக்கக்கூடும் என்றும் உதயநிதி தரப்பில் கருதப்படுவதாக கூறப்படுகிறது.

திமுக இந்த இடைத்தேர்தலில் போட்டியிட முடிவு செய்தால், மதுராந்தகம் தொகுதியில் சமீபத்தில் விசிகவில் இருந்து திமுகவில் இணைந்த பனையூர் பாபுவுக்கு வாய்ப்பு வழங்கப்படலாம் என்றும் கட்சி வட்டாரங்களில் பேசப்படுகிறது. ஆனால் வேட்பாளர் தேர்வு உள்ளிட்ட எந்த முடிவும் இதுவரை இறுதி செய்யப்படவில்லை என கூறப்படுகிறது.

இதற்கிடையே, திமுக தலைமை நிர்வாகிகளுடன் முன்னாள் முதல்வர் மு.க.ஸ்டாலின் ஆலோசனை நடத்த உள்ளதாக தகவல்கள் வெளியாகியுள்ளன. அந்த ஆலோசனையில் மதுராந்தகம், தாராபுரம் தொகுதிகளுக்கான வேட்பாளர்கள் தேர்வு, தேர்தலை சந்திப்பதா அல்லது புறக்கணிப்பதா என்பது உள்ளிட்ட பல்வேறு அம்சங்கள் குறித்து விவாதிக்கப்படலாம் என எதிர்பார்க்கப்படுகிறது.

இதனால், அறிவாலயத்தில் நடைபெற உள்ள ஆலோசனையில் திமுக எடுக்கப்போகும் முடிவு என்ன என்பது தமிழக அரசியல் வட்டாரங்களில் எதிர்பார்ப்பை ஏற்படுத்தியுள்ளது. திமுக போட்டியிலிருந்து விலகினால், அது அதிமுக–தவெக நேரடி மோதலாக மாறும் என்பதால், இந்த இடைத்தேர்தல் அரசியல் முக்கியத்துவம் மேலும் அதிகரிக்கும்.