தமிழக சட்டசபை இடைத்தேர்தலில் போட்டியிட்டு வெற்றி பெற்று அமைச்சரவையில் இடம்பெறுவதற்கான முயற்சிகளில் தமிழக வெற்றிக் கழகத்தின் முக்கிய ஆலோசகரான ஜான் ஆரோக்கியசாமி ஈடுபட்டு வருவதாக தகவல்கள் வெளியாகியுள்ளன. இதுவரை திரைமறைவில் இருந்து தவெகவின் அரசியல் வியூகங்களை வகுத்து வந்த அவர், தற்போது நேரடியாக ஆட்சி மற்றும் அதிகாரத்தில் பங்கேற்க விரும்புவதாக கூறப்படுகிறது.

வரவிருக்கும் இடைத்தேர்தலில் தவெகவுக்கு செல்வாக்கு அதிகம் உள்ள பாதுகாப்பான தொகுதி ஒன்றில் போட்டியிட்டு, அதன் பிறகு நடைபெறும் அமைச்சரவை மாற்றத்தில் முக்கிய இலாகாவை பெற வேண்டும் என்பதே ஜான் ஆரோக்கியசாமியின் திட்டம் என்று அரசியல் வட்டாரங்களில் பேசப்படுகிறது.

ஆனால் இந்த நகர்வுக்கு தவெகவுக்குள்ளேயே சில மூத்த நிர்வாகிகளும் செல்வாக்கு மிக்க தலைவர்களும் கடும் எதிர்ப்பு தெரிவித்து வருவதாக கூறப்படுகிறது.

2026 தமிழக சட்டமன்றத் தேர்தல் முடிவுகளுக்குப் பிறகு, தமிழக வெற்றிக் கழகத்தின் தலைவர் சி.ஜோசப் விஜய் தலைமையில் புதிய அரசு பொறுப்பேற்றுள்ளது. இந்த நிலையில், தமிழகத்தில் விரைவில் பல சட்டசபை தொகுதிகளுக்கு இடைத்தேர்தல் நடைபெற உள்ளதாக கூறப்படுகிறது.

இந்த இடைத்தேர்தல் தவெக அரசுக்கு மிக முக்கியமான அரசியல் சோதனையாக பார்க்கப்படுகிறது. சட்டசபையில் தனிப்பெரும்பான்மை இல்லாத நிலையில் ஆட்சி அமைத்துள்ள தவெக, காலியாக உள்ள தொகுதிகள் அனைத்திலும் வெற்றி பெற்று தனிப்பெரும்பான்மையை பெற வேண்டும் என்ற திட்டத்தில் இருப்பதாக தகவல்கள் தெரிவிக்கின்றன.

இதற்காக ஒவ்வொரு தொகுதிக்கும் வலுவான வேட்பாளர்களை தேர்வு செய்வது தொடர்பாக தவெக தலைமை தீவிர ஆலோசனையில் ஈடுபட்டு வருவதாக கூறப்படுகிறது.

இந்த சூழலில்தான் ஒரு தொகுதியில் போட்டியிட்டு எம்எல்ஏவாகி, பின்னர் அமைச்சராக வேண்டும் என்ற திட்டத்தில் ஜான் ஆரோக்கியசாமி இருப்பதாக தகவல் வெளியாகியுள்ளது.

இதுவரை தவெகவின் திரைமறைவு அரசியல் வியூக வகுப்பாளராகவே ஜான் ஆரோக்கியசாமி அறியப்பட்டு வந்தார். கட்சியின் முக்கிய அரசியல் முடிவுகள் மற்றும் தேர்தல் வியூகங்களில் அவரது பங்கு இருந்ததாக கூறப்பட்டாலும், பொதுமேடைகளிலோ அல்லது கட்சியின் வெளிப்படையான நிகழ்ச்சிகளிலோ அவர் பெரிய அளவில் காணப்பட்டதில்லை.

ஜான் ஆரோக்கியசாமி தவெகவின் முக்கிய ஆலோசகர் என்பது கட்சியின் முக்கிய நிர்வாகிகளுக்கு தெரிந்திருந்தாலும், அவர் பொதுவெளியில் அதிகம் தோன்றாமல் திரைமறைவிலேயே செயல்பட்டு வந்ததாக கூறப்படுகிறது.

ஆனால் கடந்த சில நாட்களாக தவெகவின் முக்கிய உள்கட்சி ஆலோசனைகள் மற்றும் அரசு சார்ந்த கூட்டங்களில் அவர் தொடர்ந்து பங்கேற்று வருவதாக தகவல்கள் வெளியாகியுள்ளன.

இதனால் திரைமறைவில் இருந்த ஜான் ஆரோக்கியசாமி, தற்போது நேரடியாக அதிகார மையத்தை நோக்கி நகர்கிறாரா என்ற கேள்வி அரசியல் வட்டாரங்களில் எழுந்துள்ளது.

சமீபத்தில் நடைபெற்ற அமைச்சரவைக் கூட்டங்களில் ஜான் ஆரோக்கியசாமி மற்றும் விஷ்ணு ரெட்டி ஆகியோர் பங்கேற்றதாக எதிர்க்கட்சிகளான திமுக மற்றும் பாஜக குற்றம்சாட்டியுள்ளதாக கூறப்படுகிறது.

இந்த விவகாரம் தொடர்பாக ஆளுநரிடம் அதிகாரப்பூர்வமாக புகார் அளிக்கப்பட்டதாகவும் தகவல்கள் வெளியாகியுள்ளன.

அமைச்சர்களுக்கான கூட்டங்களில் அரசுப் பதவியில் இல்லாதவர்கள் எவ்வாறு பங்கேற்க முடியும் என்ற கேள்வியை எதிர்க்கட்சிகள் எழுப்பியுள்ளதாக கூறப்படுகிறது.

இந்த சர்ச்சைக்கு மத்தியில் ஜான் ஆரோக்கியசாமி தொடர்ந்து முக்கிய ஆலோசனைகளில் பங்கேற்று வருவது, அவரது அடுத்தகட்ட அரசியல் திட்டம் குறித்த விவாதத்தை மேலும் தீவிரப்படுத்தியுள்ளது.

அரசியல் வட்டாரங்கள் மற்றும் தவெக உள்கட்சி தகவல்களின்படி, ஜான் ஆரோக்கியசாமி தமிழக அமைச்சரவையில் முக்கிய இலாகா ஒன்றை பெற விரும்புவதாக கூறப்படுகிறது.

குறிப்பாக நிதித்துறை அல்லது முதலமைச்சர் வசம் உள்ள உள்துறை ஆகியவற்றில் ஏதாவது ஒரு முக்கிய பொறுப்பை பெற அவர் விரும்புவதாக தகவல்கள் தெரிவிக்கின்றன.

ஆனால் அமைச்சராக பதவியேற்ற ஒருவர் ஆறு மாதங்களுக்குள் சட்டமன்ற உறுப்பினராக வேண்டும் என்பதால், வரவிருக்கும் இடைத்தேர்தல் அவருக்கு முக்கிய வாய்ப்பாக பார்க்கப்படுவதாக கூறப்படுகிறது.

இதனால் தவெகவுக்கு அதிக செல்வாக்கு உள்ள பாதுகாப்பான தொகுதி ஒன்றில் அவரை போட்டியிட வைப்பது குறித்து ஆலோசனை நடைபெற்று வருவதாக தகவல்கள் வெளியாகியுள்ளன.

முதலமைச்சர் விஜய் 2026 சட்டசபைத் தேர்தலில் பெரம்பூர் மற்றும் திருச்சி கிழக்கு ஆகிய இரண்டு தொகுதிகளில் போட்டியிட்டு வெற்றி பெற்றதாக கூறப்படுகிறது.

இதையடுத்து, திருச்சி கிழக்கு தொகுதி எம்எல்ஏ பதவியை அவர் முறைப்படி ராஜினாமா செய்துள்ளதாக தகவல்கள் தெரிவிக்கின்றன. இதனால் அந்த தொகுதிக்கு இடைத்தேர்தல் நடைபெற வேண்டிய சூழல் உருவாகியுள்ளது.

தவெகவுக்கு அதிக செல்வாக்கு உள்ள தொகுதியாக திருச்சி கிழக்கு கருதப்படுவதால், அங்கு ஜான் ஆரோக்கியசாமி போட்டியிட வாய்ப்பு உள்ளதா என்ற கேள்வியும் எழுந்துள்ளது.

தேர்தல் முடிவுகளுக்குப் பிறகு அதிமுகவில் இருந்து தவெகவில் இணைந்த பல முன்னாள் எம்எல்ஏக்கள் தங்களது பதவிகளை ராஜினாமா செய்ததால், மேலும் சில தொகுதிகள் காலியாகியுள்ளதாக கூறப்படுகிறது.

பெருந்துறை தொகுதியைச் சேர்ந்த எஸ்.ஜெயக்குமார், மதுராந்தகம் தொகுதியைச் சேர்ந்த மரகதம் குமரவேல், தாராபுரம் தொகுதியைச் சேர்ந்த பி.சத்யாபாமா மற்றும் அம்பாசமுத்திரம் தொகுதியைச் சேர்ந்த இசக்கி சுப்பையா உள்ளிட்டோர் தங்களது எம்எல்ஏ பதவிகளை ராஜினாமா செய்துள்ளதாக தகவல்கள் தெரிவிக்கின்றன.

மேலும், விராலிமலை தொகுதி எம்எல்ஏவான சி.விஜயபாஸ்கர் ஜூன் 16ஆம் தேதியும், கரூர் தொகுதி எம்எல்ஏவான எம்.ஆர்.விஜயபாஸ்கர் ஜூன் 29ஆம் தேதியும் தங்களது பதவிகளை ராஜினாமா செய்துவிட்டு தவெகவில் அதிகாரப்பூர்வமாக இணைந்துள்ளதாக கூறப்படுகிறது.

இதனால் காலியாக உள்ள தொகுதிகளில், தவெகவுக்கு அதிக வெற்றி வாய்ப்பு உள்ள ஒரு பாதுகாப்பான தொகுதியில் ஜான் ஆரோக்கியசாமியை களமிறக்க திட்டமிடப்பட்டு வருவதாக தகவல்கள் தெரிவிக்கின்றன.

இடைத்தேர்தல் முடிவடைந்த பிறகு தமிழக அமைச்சரவையில் மாற்றம் செய்யப்படலாம் என்ற பேச்சும் தவெக வட்டாரங்களில் இருப்பதாக கூறப்படுகிறது.

அந்த அமைச்சரவை மாற்றத்தில் ஜான் ஆரோக்கியசாமிக்கு அமைச்சர் பதவி வழங்கப்படலாம் என்றும், முக்கிய இலாகா ஒதுக்கப்பட வாய்ப்பு இருப்பதாகவும் தகவல்கள் தெரிவிக்கின்றன.

உள்துறை கிடைக்காத பட்சத்தில் தொழில்துறை போன்ற முக்கிய இலாகா அவருக்கு வழங்கப்படலாம் என்றும் அரசியல் வட்டாரங்களில் பேசப்படுகிறது.இருப்பினும், இவை அனைத்தும் தற்போது அதிகாரப்பூர்வமாக உறுதி செய்யப்படாத தகவல்களாகவே உள்ளன.ஜான் ஆரோக்கியசாமியின் இந்த நகர்வு தவெகவுக்குள் எளிதாக ஏற்றுக்கொள்ளப்படவில்லை என்று கூறப்படுகிறது.

கட்சியின் மூத்த நிர்வாகிகள் மற்றும் சில செல்வாக்கு மிக்க தலைவர்கள், அவருக்கு நேரடியாக அமைச்சரவை அந்தஸ்து வழங்கப்படுவதற்கு கடும் எதிர்ப்பு தெரிவித்து வருவதாக தகவல்கள் வெளியாகியுள்ளன.

குறிப்பாக தேர்தல் பணிகளில் முக்கிய பங்காற்றிய இரண்டு முக்கிய தலைவர்களின் ஆதரவாளர் வட்டாரங்கள், ஜான் ஆரோக்கியசாமியின் திடீர் எழுச்சியை விரும்பவில்லை என்று கூறப்படுகிறது.

“தேர்தல் நேரத்தில் திரைமறைவில் இருந்து வியூகம் வகுத்த ஒருவருக்கு நேரடியாக அமைச்சரவை அந்தஸ்து வழங்குவது நியாயமல்ல. கட்சி தொடங்கிய காலத்திலிருந்து கொடி பிடித்து, தேர்தல் களத்தில் நின்று உழைத்த நிர்வாகிகளை இது அவமதிக்கும் செயலாக இருக்கும்” என்ற அதிருப்தி தவெகவின் ஒரு தரப்பினரிடம் இருப்பதாக கூறப்படுகிறது.

ஏற்கனவே மாற்றுக் கட்சிகளில் இருந்து தவெகவுக்கு வரும் தலைவர்களுக்கு முக்கிய பொறுப்புகள் வழங்கப்படுவது தொடர்பாக பழைய நிர்வாகிகள் மத்தியில் அதிருப்தி இருப்பதாக தகவல்கள் வெளியாகி வருகின்றன.

இந்த நிலையில், இதுவரை திரைமறைவில் செயல்பட்ட ஆலோசகர் ஒருவருக்கு நேரடியாக எம்எல்ஏ வாய்ப்பும், பின்னர் அமைச்சர் பதவியும் வழங்கப்படலாம் என்ற தகவல், கட்சிக்குள் புதிய அதிகார மோதலை உருவாக்கக்கூடும் என்று அரசியல் வட்டாரங்கள் கருதுகின்றன.

வரவிருக்கும் இடைத்தேர்தலில் ஜான் ஆரோக்கியசாமி உண்மையிலேயே களமிறங்குவாரா? அவர் வெற்றி பெற்றால் அமைச்சரவையில் இடம் கிடைக்குமா? அல்லது தவெகவுக்குள் எழுந்துள்ள எதிர்ப்பு அவரது திட்டத்திற்கு முட்டுக்கட்டையாக மாறுமா? என்பதே தற்போது அரசியல் வட்டாரங்களில் முக்கிய கேள்வியாக மாறியுள்ளது.