தமிழக முதல்வர் விஜய் ஆகஸ்ட் முதல் வாரத்தில் கர்நாடகா செல்ல உள்ளதாக வேளாண் அமைச்சர் வினோத் தெரிவித்திருந்த நிலையில், அந்த தகவலை அமைச்சர் ராஜ்மோகன் மறுத்துள்ளார். முதல்வரின் பயணம் தொடர்பாக இதுவரை எந்த அதிகாரப்பூர்வ முடிவும் எடுக்கப்படவில்லை என்றும், இதுகுறித்த அறிவிப்பை முதல்வர் விஜய்யே வெளியிடுவார் என்றும் அவர் தெரிவித்துள்ளார்.

காவிரி நதியின் குறுக்கே மேகதாது அணை கட்டும் திட்டத்தை கர்நாடக அரசு தொடர்ந்து முன்னெடுத்து வரும் நிலையில், தமிழ்நாடு அதற்கு கடும் எதிர்ப்பு தெரிவித்து வருகிறது. அதேசமயம், காவிரி நீர் பகிர்வு தொடர்பாகவும் இரு மாநிலங்களுக்கும் இடையே கருத்து வேறுபாடு நீடித்து வருகிறது.

இந்த சூழலில், நதிநீர் பங்கீடு மற்றும் மேகதாது அணை விவகாரம் குறித்து ஆகஸ்ட் 3-ஆம் தேதி பெங்களூருவில் தமிழ்நாடு மற்றும் கர்நாடகா முதல்வர்கள் சந்தித்து ஆலோசனை நடத்தலாம் என கர்நாடக நீர்ப்பாசனத் துறை அதிகாரிகள் மின்னஞ்சல் மூலம் அழைப்பு விடுத்துள்ளதாக தகவல்கள் வெளியாகின.

இதையடுத்து, முதல்வர் விஜய் அந்த சந்திப்பில் பங்கேற்க கர்நாடகா செல்ல உள்ளதாக வேளாண் அமைச்சர் வினோத் தெரிவித்திருந்தார். இந்த தகவலுக்கு திமுக, அதிமுக, பாமக உள்ளிட்ட எதிர்க்கட்சிகள் எதிர்ப்பு தெரிவித்ததுடன், முன்னாள் முதல்வர்களான மு.க. ஸ்டாலின் மற்றும் எடப்பாடி கே. பழனிசாமியும் சட்டரீதியாக பெற்ற உரிமைகளை பேச்சுவார்த்தை மூலம் பாதிக்கக் கூடாது என்று எச்சரித்திருந்தனர்.

இந்நிலையில், சென்னைவில் செய்தியாளர்களிடம் பேசிய அமைச்சர் ராஜ்மோகன், "முதல்வர் விஜய் மாநிலத்திற்கு வெளியே செல்லும் பயணமாக இருந்தாலும், நதிநீர் பிரச்சினை அல்லது தேசிய முக்கியத்துவம் வாய்ந்த விவகாரமாக இருந்தாலும், அதுகுறித்த அறிவிப்பை முதல்வர் விஜய்யே அதிகாரப்பூர்வமாக வெளியிடுவார். வேறு யார் கூறினாலும் அது அதிகாரப்பூர்வ தகவலாக கருத முடியாது. தற்போது வெளியாகியுள்ள தகவல் உறுதியானது அல்ல" என்று விளக்கம் அளித்தார்.

அமைச்சர் ராஜ்மோகனின் இந்த விளக்கத்தால், ஆகஸ்ட் 3-ஆம் தேதி முதல்வர் விஜய் கர்நாடகா சென்று கர்நாடக முதல்வரை சந்திப்பாரா என்பது குறித்து மீண்டும் குழப்பம் ஏற்பட்டுள்ளது. இதுகுறித்து முதல்வர் அலுவலகத்தின் அதிகாரப்பூர்வ அறிவிப்பு வெளியாகும் வரை காத்திருக்க வேண்டிய நிலை உருவாகியுள்ளது.