'வாக்குத் திருட்டு' விவகாரத்தை முன்னிறுத்தியும், தலைமைத் தேர்தல் ஆணையர் ஞானேஷ் குமார் உடனடியாகப் பதவி விலக வலியுறுத்தியும் இந்தியா கூட்டணி தலைவர்கள் இன்று பிற்பகல் 1:30 மணிக்கு உச்ச நீதிமன்றத்தை நோக்கிப் பேரணி செல்லத் திட்டமிட்டுள்ளனர்.

முன்னதாக, வாக்குத் திருட்டுக்கு முற்றுப்புள்ளி வைப்பது, வாக்காளர் பட்டியல் சிறப்புத் தீவிர திருத்தத்தை நிறுத்துவது மற்றும் மீண்டும் வாக்குச் சீட்டு முறைக்குத் திரும்புவது ஆகிய கோரிக்கைகள் அடங்கிய மனுவைச் சமர்ப்பிக்க, உச்ச நீதிமன்றத் தலைமை நீதிபதி சூர்யகாந்தை சந்திக்க ராகுல் காந்தி மற்றும் மல்லிகார்ஜுன் கார்கே ஆகியோர் அனுமதி கோரிக் கடிதம் எழுதியிருந்தனர். ஆனால், இந்தச் சந்திப்பிற்கு நேரம் ஒதுக்கத் தலைமை நீதிபதி மறுத்துவிட்டார்.

தேசிய மனித உரிமைகள் ஆணைய நிகழ்வில் பேசிய தலைமை நீதிபதி சூர்யகாந்த், கடிதத்திற்கு நேற்று இரவே பதிலளித்துவிட்டதாகவும், சந்திக்க இயலாததற்கான காரணங்கள் அதில் குறிப்பிடப்பட்டுள்ளதாகவும் தெரிவித்தார். மேலும், உச்ச நீதிமன்றத்தின் கதவுகள் சாதாரணக் குடிமகன் முதல் பிரதிநிதிகள் வரை அனைவருக்கும் திறந்தே இருக்கும் என்றும், சட்டப்படி நிவாரணம் வழங்கப்படும் என்றும் கூறிய அவர், டெல்லி சட்டம் ஒழுங்கு பிரச்சனை குறித்து கருத்து தெரிவிக்க மறுத்துவிட்டார்.

தலைமை நீதிபதியின் அனுமதி மறுக்கப்பட்ட போதிலும், திட்டமிட்டபடி இந்தியா கூட்டணித் தலைவர்கள் உச்ச நீதிமன்றம் நோக்கிப் பேரணியைத் தொடங்குவதில் உறுதியாக உள்ளனர். இந்தப் பேரணிக்குக் கரப்பான்பூச்சி ஜனதா கட்சியும் (CJP) தங்கள் ஆதரவைத் தெரிவித்துள்ளதோடு, போராட்டத்திலும் பங்கேற்கவுள்ளதாக அதன் செய்தித் தொடர்பாளர் சவுரவ் தாஸ் அறிவித்துள்ளார்.