2026 சட்டப்பேரவைத் தேர்தல் தோல்விக்குப் பிறகு திமுகவை முழுமையாக மறுசீரமைக்கும் பணியில் கட்சித் தலைவர் மு.க.ஸ்டாலின் தீவிரமாக ஈடுபட்டு வருவதாகக் கூறப்படும் நிலையில், பொதுச்செயலர் துரைமுருகனின் எதிர்காலம் குறித்து புதிய தகவல்கள் வெளியாகியுள்ளன. உடல்நிலை காரணமாக அவர் பொதுச்செயலர் பதவியில் இருந்து விலகலாம் என்ற தகவல்கள் பரவிய நிலையில், "பதவியை விட்டுக் கொடுக்க மாட்டேன்" என்ற உறுதியான நிலைப்பாட்டில் துரைமுருகன் இருப்பதாகக் கூறப்படுகிறது.

சட்டப்பேரவைத் தேர்தலில் ஆட்சியை இழந்த பிறகு, திமுகவில் விரிவான ஆய்வுப் பணிகள் மேற்கொள்ளப்பட்டு வருகின்றன. தேர்தல் தோல்விக்கான காரணங்கள் மற்றும் கட்சியில் செய்ய வேண்டிய மாற்றங்கள் குறித்து தலைமைக்கு அறிக்கைகள் சமர்ப்பிக்கப்பட்டுள்ளதாக தகவல்கள் தெரிவிக்கின்றன. அதன் அடிப்படையில், கட்சி அமைப்பில் பல்வேறு மாற்றங்களை மேற்கொள்ள ஸ்டாலின் திட்டமிட்டு வருவதாக அரசியல் வட்டாரங்கள் கூறுகின்றன.

இந்தச் சூழலில், திமுக பொதுச்செயலராக நீண்டகாலமாக செயல்பட்டு வரும் துரைமுருகனின் பதவி குறித்து கட்சிக்குள் ஆலோசனைகள் நடந்ததாகக் கூறப்படுகிறது. "எனது பதவிக்காலம் 2027 வரை உள்ளது. உடல்நலக் குறைவு இருந்தபோதும் மறைந்த பேராசிரியர் அன்பழகன் பொதுச்செயலராகத் தொடர்ந்தார். அவரிடம் யாரும் பதவி விலகக் கோரவில்லை. அதுபோல நானும் என் பொறுப்பைத் தொடர்ந்து மேற்கொள்வேன்; இந்தப் பதவியை விட்டுக் கொடுக்க மாட்டேன்" என்று துரைமுருகன் கூறியதாக தகவல்கள் வெளியாகியுள்ளன.

கடந்த சில மாதங்களாக துரைமுருகன் கட்சியில் ஓரங்கட்டப்படுகிறாரா என்ற கேள்வியும் திமுக வட்டாரங்களில் எழுந்து வருகிறது. தேசிய அளவிலான கூட்டணி அரசியல் தொடர்பான சில முடிவுகள் மற்றும் தேர்தலுக்குப் பிந்தைய முக்கிய ஆலோசனைகளில் அவர் பங்கேற்கவில்லை என்ற பேச்சுகளும் பரவி வருகின்றன.

மேலும், சட்டப்பேரவை கூட்டத் தொடர் தொடர்பான எம்.எல்.ஏ.க்கள் கூட்ட அறிவிப்புகள் வழக்கமாக பொதுச்செயலரின் பெயரில் வெளியிடப்பட்ட நிலையில், சமீபத்தில் அவை கட்சியின் கொறடா பெயரில் வெளியிடப்பட்டதாகக் கூறப்படுகிறது. இதுவும் துரைமுருகனின் அதிகாரம் குறைக்கப்படுகிறதா என்ற கேள்வியை எழுப்பியுள்ளது.

இதற்கிடையில், பொதுச்செயலர் பதவியில் மாற்றம் செய்வது சாத்தியமில்லாத சூழல் ஏற்பட்டால், கட்சியில் புதிய நிர்வாக அமைப்பை உருவாக்கும் திட்டமும் பரிசீலனையில் இருப்பதாக தகவல்கள் வெளியாகியுள்ளன. அதன்படி, திமுக வரலாற்றில் முதல் முறையாக "இணை பொதுச்செயலர்" என்ற புதிய பதவியை உருவாக்கும் வாய்ப்பு இருப்பதாகக் கூறப்படுகிறது.

இந்த புதிய பதவியின் மூலம், கட்சியின் தினசரி நிர்வாக மற்றும் அமைப்பு சார்ந்த பணிகளை மற்றொரு மூத்த தலைவரிடம் ஒப்படைத்து, அதேநேரத்தில் துரைமுருகன் பொதுச்செயலராகத் தொடரும் வகையில் ஏற்பாடுகள் செய்யப்படலாம் என்றும் தகவல்கள் தெரிவிக்கின்றன.

திமுகவில் இளைஞர் தலைமுறைக்கு அதிக பொறுப்புகள் வழங்க வேண்டும் என்ற கோரிக்கையும் வலுப்பெற்று வரும் நிலையில், மூத்த தலைவர்களின் அனுபவத்தையும் கட்சி தொடர்ந்து பயன்படுத்த வேண்டும் என்ற கருத்து நிலவுகிறது. தேர்தல் தோல்விக்குப் பிறகு கட்சியை மீண்டும் எழுச்சி பாதைக்கு கொண்டு செல்லும் முயற்சியில் இருக்கும் ஸ்டாலின், இந்த விவகாரத்தில் என்ன முடிவு எடுக்கப் போகிறார் என்பது திமுக நிர்வாகிகள் மத்தியில் பெரும் எதிர்பார்ப்பை ஏற்படுத்தியுள்ளது.