சுப்மன் கில் தலைமையிலான இந்திய அணி, சொந்த மண்ணில் நடைபெற்ற மூன்று போட்டிகள் கொண்ட ஒருநாள் தொடரில் ஆப்கானிஸ்தானை 3-0 என்ற கணக்கில் வீழ்த்தி தொடரைக் கைப்பற்றியது. இதனைத் தொடர்ந்து, ஷ்ரேயாஸ் ஐயர் தலைமையிலான இந்திய டி20 அணி அயர்லாந்து மற்றும் இங்கிலாந்து சுற்றுப்பயணத்திற்கு தயாராகி வருகிறது.

இந்த சுற்றுப்பயணத்தின் முதல் கட்டமாக, இந்திய அணி அயர்லாந்துக்கு சென்று ஜூன் 26 மற்றும் 28-ஆம் தேதிகளில் நடைபெறும் இரண்டு போட்டிகள் கொண்ட டி20 தொடரில் விளையாட உள்ளது. இந்தத் தொடருக்கான இந்திய அணி ஏற்கனவே அறிவிக்கப்பட்டுள்ளது.

இந்நிலையில், இந்திய அணியின் முன்னணி சுழற்பந்து வீச்சாளரான வருண் சக்கரவர்த்தி அயர்லாந்து தொடருக்கான அணியுடன் பயணிக்க வாய்ப்பில்லை என்ற தகவல் வெளியாகியுள்ளது. 2026 ஐபிஎல் தொடரின் இறுதிக்கட்டத்தில் அவர் காலில் ஏற்பட்ட காயம் காரணமாக தற்போது சிகிச்சை பெற்று வருகிறார். காயத்திலிருந்து மீண்டு வருவதில் முன்னேற்றம் இருந்தாலும், முழுமையாக குணமடைய இன்னும் சில காலம் தேவைப்படும் என கூறப்படுகிறது.

இதன் காரணமாக, அயர்லாந்து டி20 தொடரில் வருண் சக்கரவர்த்தி பங்கேற்க முடியாது என்று தகவல்கள் தெரிவிக்கின்றன. இதனால் இந்திய அணியின் முதன்மை சுழற்பந்து வீச்சாளராக அக்சர் படேல் முக்கிய பொறுப்பை ஏற்க உள்ளார்.

மேலும், வருண் சக்கரவர்த்தியின் காயம் நீடித்தால், அயர்லாந்து தொடரைத் தொடர்ந்து நடைபெறவுள்ள இங்கிலாந்து டி20 தொடரிலும் அவர் விளையாட முடியாத நிலை உருவாகலாம் என்று கூறப்படுகிறது. இதனால் இந்திய அணியின் சுழற்பந்து வீச்சுத் திட்டத்தில் மாற்றங்கள் ஏற்படக்கூடும் என கிரிக்கெட் வட்டாரங்கள் எதிர்பார்க்கின்றன.