தமிழக அரசியலில் அடுத்த பெரிய மாற்றத்தைக் குறிக்கும் வகையில், நடிகரும் தமிழக வெற்றிக் கழகத் தலைவருமான விஜயை, பாஜக கூட்டணிக்குள் இழுக்க தீவிர முயற்சிகள் நடைபெற்று வருவதாக தகவல்கள் தெரிவிக்கின்றன.

பா.ஜ.க மற்றும் அதிமுக – இரு கட்சிகளின் மூத்த தலைவர்களும், விஜயின் அணியை அணுகி, “கூட்டணி ஆட்சிக்கு வந்தால், துணை முதலமைச்சர் பதவி உங்களுக்கு வழங்கப்படும்” என்ற வாக்குறுதியை முன்வைத்துள்ளனர்.

ஆனால், விஜய்க்கு நெருக்கமான வட்டாரங்கள் கூறுவது வேறு மாதிரி தான். “விஜய்க்கு இந்த கூட்டணியில் சேர எந்த ஆர்வமும் இல்லை. அவர் தற்போது சில விசாரணை அழுத்தங்களில் இருப்பதால் வெளிப்படையாக பேசவில்லை என்றாலும், மனதளவில் NDA கூட்டணிக்கு எதிராகவே உள்ளார்,” என்கிறார்கள்.

தனது நெருங்கிய நண்பர்களிடம் விஜய், “துணை முதலமைச்சர் பதவிக்கு உண்மையான அதிகாரம் இருக்குமா? அது வெறும் பெயரளவில் இருக்கும் என்றால் என்ன பயன்?” என்று கேள்வி எழுப்பியுள்ளதாக கூறப்படுகிறது. மேலும் அவர், “பவன் கல்யாண் துணை முதலமைச்சர் ஆனாலும், அவருக்கு எந்த அதிகாரமும் இல்லை. நான் அவரைப் போல ஆக விரும்பவில்லை!” எனவும் வெளிப்படையாக கூறியிருப்பதாக தகவல்கள் தெரிவிக்கின்றன.

இதனால் விஜய் தற்போது ஒரு முக்கியமான முடிவெடுக்கும் கட்டத்தில் உள்ளார். டெல்லியில் உள்ள பாஜக தலைவர்கள் அவரிடம், “ஒரு தீர்மானத்தை எடுங்கள் – NDA கூட்டணியில் இணையுங்கள் அல்லது அரசியலை விட்டு விலகுங்கள்” என அழுத்தம் கொடுத்து வருவதாகவும் அரசியல் வட்டாரங்கள் கூறுகின்றன.

அவர்களின் கணிப்புப்படி, “விஜய் NDAவில் சேர்ந்தால் எதிர்க்கட்சி வாக்குகளை ஒருங்கிணைக்கலாம், இல்லையென்றால் அவர் விலகினால் அவரது ரசிகர்கள் இயற்கையாகவே NDA முகாமில் சேர்வார்கள்” என பாஜக நம்புகிறது.

ஆனால் விஜய் இந்த இரண்டு வழிகளிலும் எதையும் ஏற்காமல், தனது தனித்துப் பாதையைத் தேர்வு செய்யும் வாய்ப்பு அதிகம் என்று அரசியல் வட்டாரங்கள் குறிப்பிடுகின்றன.

இந்த சூழலில், விஜயின் “பவன் கல்யாண் போல ஆக விரும்பவில்லை!” என்ற கூற்று, தமிழக அரசியலில் பெரும் விவாதத்தையும் அதிர்வையும் ஏற்படுத்தியுள்ளது.

 இது ஒரு முக்கிய அரசியல் திருப்புமுனையாக பார்க்கப்படுகிறது. அடுத்த சில வாரங்களில் விஜய் எடுக்கும் முடிவு, தமிழக அரசியலின் திசையை தீர்மானிக்கக்கூடும்.